20
Galsat miho dinga dan kisem ho
1 Na galmi teu toh kisat dinga na kondoh tengu leh, sakol ahin kangtalai, nanghoa sanga tamjo namu diu, hinlah na kichat loudiu ahi. Ajeh chu nangho Egypt gamsunga konna nahin puidoh pau Pakai na Pathen'un naumpi jing uve!
2 Galmun nalhun kahseuva, nalah uva thempupa chu mipi jouse masang lam'a na makai sah diu ahi.
3 Chule mipi henga thu asei ding, 'Ngaiyun, vo Israel te ! Kichatna jong neihih un, ajeh chu tunia nangho nacheuva amaho khu naga kisatpi diu ahi! Na galmi teu kichat nan kihot hih unlang, gin jong nagin loudiu ahi.
4 Ajeh chu Pakai na Pathen'un nangho na lhonpi diu ahi! Na masang lam uva lamkai jing ding, galjona nachan diu ahi!'
5 Chuphat leh gal vaipoa pang hon mipi henga hitia hi asei diu, 'Koiham inthah tungdoh a thenso louva koi? Nalah uva hitobang mihem chu auma ahileh, ama chu in a kile hen! Galmun'a na athiden khah tah a ahileh, na in chu midangin athenso khah ding ahi.
6 Lengpilei laiya natonga lengpi thei tepkha lou koiham? Amapa jong chu inlama kile jeng thei ahi. Achuti louva ahileh galmun'a thina ato jeng thei, alengpi lei jeng jong midang chan lo ding ahi.
7 Hiche bang chun pasal koi tobang khat chu jinei dinga kigosa dem a umta, ahinlah jinei loulai koi ham? Ama jong chu in kilea jinei thei ahi. Ajeh chu galmun'a thina nachan'a naji ding nu chu midang chang jeng thei ahi.
8 Chule sepai vaihom natonga pang hon mipi henga hitia hi asei nahlai diu ahi. Meidoi, kichase um em? Aumleh in a kile hen, ajeh chu midang asuh meidoilo ding ahi, tia asei diu ahi.
9 Sepai vaihom natonga pangho chun sepai ho henga hitia chu asei chai sohkei tengu leh, aloi loiya lamkai alhendoh diu ahi.
10 Chule khopi khat na bulu kon uleh, amasan hiche khopi chu kichampi din tem un.
11 Hiche khopi chun natep nau ahin ngaiyuva, kelkotpi chu na honpeh uva ahileh, na vaihomna noiyuva um diu, nakin'u bollea pang diu ahi.
12 Ahinlah kicham ding gel louva kidoupi ding joh agel uva ahileh, khopi chu nabulu tei ding ahi.
13 Chuteng Pakai na Pathen'un hiche khopi chu nangho khut a ahin pehlut ding, na chemjam uva pasal jouse natha diu ahi.
14 Hinlah numei le chapang, thilkeo ho nakikoi khom diu ahi. Ajeh chu Pakai na Pathen'un khopi sunga konna chu nopsa tah a na manchah diuva napeh u ahitai.
15 Nachen nauva konna gamla tah a um khopi ho, hitia chu nabol sohkei diu ahi.
16 Pakai na Pathen'un napeh nau hiche khopi chengsea chu naum tengu leh, ahing thei jouse na suhgam diu ahi.
17 Ajeh chu Pakai na Pathen'un naseipeh bang uva, Hit mite, Amor mite, Canan mite, Periz mite, Hiv mite chule Jebus mite hijongleh abonchauva na suhgam hel diu ahi.
18 Chutileh hiche mite a konna chu milim doi kisemthu ho a konna na kihei mang thei diu, amaho pathen semthua konna na kiventup uva, nalhah lutlou diu ahi.
19 Khopi khat bulu dinga phat sotpi naum kim tengu leh thingphung naphuh lou diu ahi. Aga neuvin, hinlah aphung phuh hih un, thingphung ho chu na galmi teu ahipoi.
20 Hinlah thingphung aphachompoi tia nagel houvang chu naphuh uva, khopi sunga gal mite toh kidouna gal manchah a naman theiyu ahi.