19
Bitna khopi ho
1 Pakai na Pathen'un nangho napeh nau gamsunga cheng mite ahin suhgam teng, nang hon agamsung pumpiu chuleh a in jouseu nalo diu akhopi uva nachen diu ahi.
2 Pakai na Pathen'un napeh nau gamsunga na chenlut tengu leh, nang hon hiche gamsung chu chenna dinga khopi thum na lhendoh diu ahi.
3 Hitia chu Pakaijin napeh nau gamsung chu gamkai thum naso diu, hiche gamkaiya chu khopi khat cheh um ding ahi. Nalah uva konna koi tobang mithat auma ahileh, ama chu hiche sunga chu jamlut a kihuhdoh thei ding ahi.
4 Mikhat touvin kidoupi beiya, khat chu amoh tha khah tah a ahileh, khopi khat pen pen achu jamlut a kihuhhing thei ahi.
5 Tekahnan, mikhat chu asopipa toh gamlah lama thing phuh dinga akon doh a thing aphuh laitah a aheicha lap chu aki khodoh a, asopipa chu akhokhah jeng tah a ahileh, aheicha chun asopi chu akho khah a thina atokhah a ahileh, mithat khapa chu khopi thum holah a khat pen pen a jamlut a ahinkho aki huhdoh ding ahi.
6 Chule kihuhdohna dinga khopi chu agamlat behseh a ahileh, akahlah a phula thei khat touvin ahin delkhum'a atha jeng thei ahi. Hinlah mithat khapa chun akidoupi hilouvin, khutsoi jeh a atha khah ahi.
7 Hitobanga kon kivendoh theina ding chun, keiman naheng uva khopi thum sem uvin kati ahi.
8 Pakai na Pathen'un napu napa teu khanga pat napehsau gamsung hi akehlet ding, agamsung hi aboncha na pehdoh diu
9 chuteng nang hon khopi thum na lhendoh bediu ahi. (Chingthei tah a ka thupeh na ngaiyuva Pakai na Pathen na ngailut uva alampi nache uva ahileh Aman hiche gam pumpi hi napeh diu ahi).
10 Hitia chu nabol uva ahileh, Pakai na Pathen'un napeh nau hiche gamsunga hi mona beihel'a thina umlou ding ahi. Chuteng monabei ho thina jal'a mo nachan lou diu ahitai.
11 Hinlah koitobang khat chun asopi ahotbol'a, chang lhih jinga aum a, adel khum jenga ahileh, hiche tolthatpa chu khopi ho lah a khat pen'a chu jamlut a kisel jeng thei ahi.
12 Chuteng upa chense chu kon uva mithat pa chu khopi sunga aga holdoh diu, ama hon aga mudoh diu amapa chu phulahna a ahin lhut diu, athina ding chan gotna apeh uva, thina achansah diu ahi.
13 Tolthatpa chunga chu lainatna ima na neilou diu ahi! Hichu Israel mite lah a konna thisan sona chu na suhbei diu; hichu nangho dinga aphalam'a pang ding joh ahi.
Adih a thutan khohsah ding
14 Pakai na Pathen'un napeh nau gamsung nalhun tengu leh nanei nagou hou, napu napa teuva pat gamgi song kitung ho chu khat jeng cha jong na bodoh lou diu ahi.
15 Themmona jouse lah a konna mikhat sehseh in themmo thu aseiya konna, adang khat chu themmo namoh chansah lou diu ahi. Hitobang chu hettohsah mini ham mithum ham ahi tengleh bou themmo kichan sah bep ding ahi.
16 Midang khat chu muda man maimaiya konna adih louva bol jeng louding, hettohsah tothoa doumah a abolthei louding,
17 chule mini chu akidouva ahileh anigel'a Pakai angsung leh thempu ho masang leh thutan vaihom ho henga hung cheh ding ahi.
18 Chutengleh thutan vaihom hon achan chin thu chu giltah a akhol diu ahi. Hinlah jou leh nal thua Israel khattou ahehset a ahileh,
19 hitobanga ahehsepa chu gotna peh chang ding ahi. Hitobang thil phalou chu nalah uva konna na suhmang diu ahi.
20 Chuteng midang jousen ahin jah sohkei uva, kichat nan alhun den diu, nangho jouse lah a thilse kiti him him abolkit tah lou diu ahi.
21 Hiche ho tobang gitlouna ahin koima khoto hih un! Gotna chang dia dan chu, hinkho khel'a hinkho, mit khel'a mit, ha khel'a ha, khut khel'a khut chule keng khel'a keng lah ding ahi.