18
Thempuho chanvou
1 Thempu hon hiche hi na geldoh jing diu ahi, ajeh chu Israel insung mijouse lah a Levi insung kailhah hi chenna ding gam changlou ahiuve. Hijeh a chu Thempua pang Levi mite hon Pakaiya dia kitodoh chengse hi chang diu ahi.
2 Israel nam sunga konna gamtum neilou ahiuvin, Pakai hi amaho dinga agoulupen'u ahitan, hichu aheng uva Pakai kitepna ahi.
3 Hichengse hi mihon gancha dinga ahin choi lah a thempu ho chan ding chu ahi: bongchal ahin kelngoi hijongleh ama hon adah, abieng, agilpi chengse chu thempupa henga apehlut diu ahi.
4 Nanghon jong na lousoh gau lhung masaho, lengpitwi, chang, thaotwi chule na kelngoi mul kivou masapen chu napeh diu ahi.
5 Ajeh chu Pakai na Pathen'un phung jouse lah a Levi insung mite hi imatih chan'a ama lhacha a pang dia alhen doh ahi.
6 Chule Israel mite chenna khopiho lah a chu Levi miten adeisah laiyu Pathen houna mun'a ahin lhendoh diu ahi.
7 Levi dang ho banga kigel'a Pakai na Pathen min pan a akin bol'a pang jeng thei diu, chuteng Pakai angsunga natong jing Levi mite banga akin bol'a pang diu ahi.
8 Ama insung mite a kon thilpeh ijat um jongleh, thil kitohdoh jouse aneh khopset aneh thei diu ahi.
Atheng dinga kouna
9 Nangho Pakai na Pathen'un napeh nau gamsung nahin jot tengu leh, chingtheiyun hiche gamsunga namtin vaipi chonna dan thet umtah tah ho khu najui louhel diu ahi.
10 Nangho lah a konna koiman achanu ham achapa ham khat chu meiya agoa kilhaina a amanchah thei louhel ding ahi. Doithu hihen, phunsanna hihen, ipi doi mangcha hijongleh,
11 bum'a bolna hihen, thilha a konna gao boltheina hihen, mitphel doithepna chule thilha a konna gaothem kiti jong khat jeng cha nalah uva konna um thei louding ahi.
12 Hitobanga chon mihem chu Pakaiya dinga thet umtah ahi. Hijeh a chu Pakai na Pathen'un nangho masanga hiche lai mun'a cheng ho jouse ana delmang ahi.
13 Chule nangho Pakai na Pathen uva dia mikitah nahi tei diu ahi.
14 Ajeh chu hiche mun'a cheng mite hon doithem ho thusei angaiyun, amavang Pakai na Pathen'un hitobang hoa na chon diu aphal pon ahi.
Themgao atah le alhem ho
15 Mose'n avelin aseikit in, Israel te lah a konna Pakai na Pathen'un kei bang banga thempu khat nahin tundoh peh diu ahi. Chuteng nang hon ama thu chu na ngai uva na khohsah cheh diu ahi.
16 Nanghon Sinai Molchunga mipi ho kikhop nikhon Pakai na Pathen'u henga nadei, nangai chan hiti hin na seiyun ahi. Pakai ka Pathen'u awgin leh ama a konna meikong kilah chu neijah sah kit hih hel un, ajeh chu hitobang kajah uva kamu uva konna chu keiho ka thilo jeng theiyu ahi, natiuve.
17 Chuin Pakaijin keima henga aseijin, ama hon asei chan uhi adih lheh jeng'e, ati.
18 Chule Pakaijin aseijin keiman na sopite lah a konna hi nang tobang khat ka tundoh ding, hiche themgaopa kamsunga chu ijakai ka thumop sohkei ding, hichea konna chu keiman ama ka thumop bang banga aman jong mite jouse athupeh son ding ahi.
19 Koi hijongleh hiche themgaopa thusei nahsah lou aum'a ahileh, amapa chunga chu lhenchilna lhung ding ahi.
20 Keima thupeh kalval'a chon auma chule pathen limsemthu minpan'a thuseiya pang themgao khattou aum ngei ngeiya ahileh, amapa chunga chu thina lhung teitei ding ahi, tin aseiye.
21 Hichea chu nang hon Pakai thusei ahipoi, tia lung opkaina na lungthim sung uva nanei khah uva ahileh,
22 themgao khat in thu aseiya athu seidoh aguilhun'a ahilouleh adihlou tengleh, hitobang chu Pathen akon mong ahipoi ti photchetna ahi. Themgaopa chun ama macham cham'a asei ahin, hitobang themgao chu gin jong nagin louhel diu ahi.