17
1 Ana damlou gancha kiti phot Pakai na Pathen henga na todoh theilou diu ahi. Ajeh chu Pakaiya dia hitobang thilpeh ho hi thet um ahi.
2 Pakai na Pathen'un napeh nau gam'a nachen tengu leh, nalah uva konna numei hileh pasal hileh Pakai na Pathen'u mitmua aphalou nabol theilou diu chule kitepna na suhboh theilou diu ahi.
3 Semthu pathen dang angsung, nisa chule ahsiho vamthamjol kitiho jouse angsunga na bohkhup theilou diu ahi.
4 Hitobang ho hi na kholchil sohkei diu ahi. Ajeh chu Israel mite lah a hitobang hi umkha get inte.
5 Numei hileh pasal hileh hitobanga chon chu, khopi pam lama nodoh ding songa selih ding ahi.
6 Hinlah mikhat jeng seh thutan nan mi that hih un, mithum beh thutanna a chu thina nachan sah thei diu ahi.
7 Thutanpa chun songa ase masat ding, chuteng mipin ase ding ahi. Hitia chu nalah uva konna aphalouva chon chu na nodoh diu ahi.
8 Nalah uva thilsoh chung thutanna ahahsat behseh a, hichu phatlouna, tol-that, mithat chule dan chung kalval'a chon achungthu a boina chom chom neiya auma ahileh, hitobang chu Pakai na Pathen henga nalhut diu ahi.
9 Chule hitobang ho chu danthempuho henga aphatcha napui diu ahi. Ama hon achung chang thu angai diu chuteng thulhuhna asem diu ahi.
10 Ama hon thulhuhna asem uchu Pakai muntheng lama nahin lhut diu, ama hon asei bang uva nabol diu ahi.
11 Dan dungjuiya thulhuhna chu ahin phondoh tengu leh, thulhuhna jouse chu ahina banga chelha ding, imacha na hapbe thei tah lou diu ahi.
12 Koi hileh Pakai na Pathen angsunga thutan vaihom ho natohna deilou vetsahna jal'a kisa auma ahileh, thina chang ding ahi. Hitia chu phatlouna kiti phot Israel mite lah a konna na nomang diu ahi.
13 Hitobang chu mijousen ahin jah sohkei diu, chuteng koima aphalouva chon ngam talou ding ahi.
Leng ding kilhenna
14 Ajeh chu Pakai na Pathen'un napeh nau gamsung nalhun diu ahitai. Hiche gamsung nalhun tengu leh, ilamkai diuvin leng khat, namdang te kivaipohna bangin tungdoh tau hite tia nasei diu ahi.
15 Chutengleh Israel mite lah a Pakai na Pathen'un atundoh ding ahi. Hichu nalah uva mikhat pen pang ding, amavang kholjin mi nalhen theilou diu ahi.
16 Lenga pang ding pen chun, sakol kangtalai ngaichat jeh a mikhat tou Egypt gam'a sakol kangtalai cho dinga asol theilou ding ahi. Ajeh chu nangho Egypt gam nakile kit theilou diu ahitai.
17 Lengpa chun jitampi anei theilou ding ahi. Ajeh chu ama hon Pakai a konna apuimang thei u ahi. Chule ama ding jenga jong sana leh dangka akikhol theilou ding ahi.
18 Leng touna mun alo tengleh, amapa chun danbu akilah ding, alal-touna mun'a chu akikoi ding ahi.
19 Hiche danbu lekhajol chu akom'a akoi ding adamlai sunga asim jing ding ahi. Hichea konna chu dan leh thupeh ijakai Pakaiya kon'in aum'e ti amu chet ding, dengchang tah a ajui jing ding ahi.
20 Hiche lekhajol asima konna chu kiletsahna pum'a, achenkhompi mijouse sanga chungnung kahi tia umlou ding ahi. Chule hichea konna hi lamchom'a kihei mang louva um jing ding kahi tijong ahetdoh thei ding ahi. Keima leh ka chilhah ten Israel sung hi akhang akhanga ka vaihop diu ahi, tijong hetdohna anei thei diu ahi.