16
Kalchuh Kut le Chol Solou Changlhah Kut
1 Pakai na Pathen u jabolna in, kumseh leh khal kipat til Abib lha a Kalchuh lopna nabol diu ahi, ajeh chu hiche lha a hi Pakai na Pathen'un jan muthim noiya Egypt apat nahin puidoh u ahi.
2 Na Kalchuh satha diu chu na gancha teu lah a kon aman amin kijabolna dia adeilhenna mun a chu Pakai na Pathen'u houna a na todoh diu ahi.
3 Hichu cholsolou changlhah toh naneh tha diu ahi. Nisagi sunga naneh diu changlhah chu chol kisolou hi ding, ajeh chu Egypt gam'a konna kinotah a nahung nau avetsah ahi. Hiche changlhah chu neuvin—suhgim vetsahna changlhah ahin—na damsung uva Egypt nahin dalhah u na geldoh diu ahi.
4 Hiche nisagi sunga hin koima in'ah chol kimu hih hen. Chule Kalchuh Kut adia nikho masapenni nilhah a kelngoi na todoh tengu leh, asa chu ajing jingkah geiya ahalsi cha jong na umsah loudiu ahi.
5 Kalchuh Kut a todoh ding hi Pakai na Pathen uvin napeh u khopi ho lah a khat pen a nato jeng lou diu ahi.
6 Pakai na Pathen'un—amin kijabolna dinga adeilhenna—ama houna ding mun a bou chu na todoh diu ahi. Nisa alep lhah tengleh hichu Egypt gam'a nahung potdoh nau vetsahna na todoh diu ahi.
7 Sa chu na sahgep uva Pakaijin alhenna mun'a chu naneh diu ahi. Chule jingkah lam leh na ponbuh mun cheh uva nakile diu ahi.
8 Aban nigup sunga chu chol jaona changlhah naneh lou diu ahi. Anisagi lhinni chu Pakai na Pathen'u jabolna nikho thenga na phondoh diu, koiman na atoh thei louding ahi.
Lho Lhun kut
9 Lousohga khoptup laiya chang le mim na at masatpen uva pat hapta sagi na simdoh diu ahi.
10 Chujou tengleh Pakai na Pathen uva dinga Kalchuh Kut golvah nabol diu ahi. Pakaiya konna phatthei na channa hou ijakai nahin choi sohkei diu ahi.
11 Hiche phat hi Pakai na Pathen uvin adeilhenna mun'a chu ama min kijabolna phat hi ding ahi. Na chanu teu leh na chapa teu, soh numei le pasal, khopi ho a Levi mite, gamdang miho, chagate, chule meithai ho toh golvah nabol khom diu ahi.
12 Egypt gam'a sohchanga hinkho mang nahiuve ti nageldoh jing diu, hijeh a chu chingthei tah a thupeh ho hi na jabol diu ahi.
Lhambuh kut
13 Lhosohga na khoptup chai uva lengpiga naheh chai tengu leh nisagi sunga Lhambuh Kut naman diu ahi.
14 Kipa umtah hiche golvah hi na chanu teu leh na chapa teu, soh numei le pasal, khopi ho a Levi mite, gamdang miho, chagate, chule meithai ho toh naman diu ahi.
15 Nisagi sunga Pakai na Pathen'un alhenna mun'a chu golvah nabol diu ahi, ajeh chu ama a konna phatthei na chan uva natohna jouseuva na lolhin'u ahi. Hiche kut hi mijousea dinga nasatah a kipana phat hi ding ahi.
16 Kumseh leh Israel miten hiche kut thum ho hi aman jing diu ahi: Changlhah Kut, Lholhun Kut chule Lhambuh Kut ahi. Hiche kin ho a hi, pasal jouse Pakai na Pathen uvin alhenna mun a kilah cheh diu, ahin koiman khutgoh keuva Pakai angsung anailut thei louding ahi.
17 Pakai na Pathen uvin phatthei abohna dungjuiya ajokham khama apeh cheh diu ahi.
Thudih a vaihom
18 Pakai na Pathen'un napeh nau khopi jousea nangma phung cheh in thutan vaihoma pang ding naki lhen sohkei diu ahi. Amaho chun miho chunga chamdel'a thu atan diu ahi.
19 Koima chunga langnei sihneiya thil ima nabol lou diu ahi. Nehguh nalah lou diu ahi, ajeh chu nehguh in miching ho mit achotsah in Pathen dei banga thulhuh semna asuse in ahi.
20 Adih a kivaihomna chu um jing hen, chutileh Pakai na Pathen uvin napeh nau gamsunga lungmonga nachen diu ahi.
21 Pakai na Pathen maicham nasem nau vel a chu Asherah khom na tundoh louhel diu ahi.
22 Chule hou dinga khom dang naphu louhel diu ahi, ajeh chu Pakai na Pathen adia hitobang chu thet umtah ahi.