15
Sabbath kum chamlhatna
1 Kum sagi kichai seh leh min nasum abat chu abat a na simpeh louding ahitai.
2 Hiche thudol chu hitia hi bol ding ahi. Mijousen a Israel mi chanpi bat chu abat sah tah louding ahi. Koiman asopi aheng kom'a asuh thei louding ahitai. ajeh chu Pakai phattep dungjuiya lha ongna phat hunglhung ahitai.
3 Hiche bat kisim louna hi Israel mite insunga ding bou ahin—nalah uva cheng kholjin miho a ding ahipoi.
4 Koima vaichatah a umlou ding, Pakai na Pathen uvin gou lutah napeh nau gamsunga phatthei naboh diu ahi.
5 Pakai Pathen keiman tunia kapeh u thupeh ho hi chingthei tah a najabol uva ahileh phatthei nachan diu ahi.
6 Pakai na Pathen uvin akitepna banga phatthei naboh tei diu ahi. Nam tampin naheng uva sumpa ahinlah diu chule nang hon vang bat a ima nalah lou diu ahitai. Nam tamtah vaihoma napan diu, hinlah amahon nangho chunga vai ahop lou diu ahi.
7 Hinlah Pakai na Pathen uvin napeh nau gam nalhun uva Israel insunga konna avaicha aum khah leh ama chu nadal bol louhel diu ahi.
8 Chusang chun, hongphal tah a amaho chu angaichat chan'u namansah diu ahi.
9 Bat a thilpeh ding hijongleh itlouhel a napeh diu ahi. Ajeh chu khat leh khat bat a konna kilepehna phat chu nakhut uva um jing ahi. Bat a peh ding nada uva mikhat nachung uva lhisona aneiya ahileh, phat louna chonset a chu lhalut nahi tauve.
10 Vaichaten angaichat banga hongphal tah a napeh diu ahi. Ajeh chu Pakai, na Pathen uvin natohna lam lam uva phatthei naboh diu ahi.
11 Na chennau gamsunga chu vaicha um jing ding ahi. Hijeh a chu hiche thupeh hi Israel mite lah a vaicha hon angaichat uchu manbeiya nahop diu ahi.
Hebrew Soh ho kilhadoh
12 Hebrew mite lah a konna numei hileh pasal hileh soh dinga kiphal aum leh kum gup sunga nangho najen diu, kum sagina leh ama chu chamlhatna napeh diu ahi.
13 Soh pasal chu na soldoh tengu leh, khutgoh keova nasol lou diu ahi.
14 Lhahna thilpeh dia na gancha lah a kon, na changphol a kon, na lengpi hehna a konna napeh diu ahi. Pakai na Pathenin phatthei nabohna a konna chan naneipi diu ahi.
15 Egypt gam'a khatvei chu soh nahi nauva konna Pakai na Pathen uvin na lhatdoh u ahi chu geldoh jingun! Hijeh a chu keiman hiche thupeh hi nangho kapeh nahiuve.
16 Hinlah soh chun ‘Keiman ka dalhah louding nahi’ tia aseiya ahileh, ajeh chu aman nangma leh na insung mite angailut jal ahi.
17 Hitobang dinmun'a chu, kotphung a thihhem a abil navu ding ahi. Chujou leh, ama chu hinkhoa nasoh hi ding ahitai. Chule chutobanga chu sohnu jong abil navu ding ahi.
18 Nasoh uchu na soldoh tengu leh hahsa tah a nagel lou diu ahi. Na suhmil lou diu chu kum gup sunga nagoi u soh chun akop a na natohpeh u ahitan, Pakai na Pathen uvin natohna lam lam uva phatthei naboh diu ahi.
Gancha peng masa kitohdoh
19 Na ganchate lah uva konna apeng masa jouse Pakai na Pathen a dinga nachom khen diu ahi. Na gancha teu lah a apeng masa kiti phot chu nalouva na natoh sah lou diu, chule amul navo lou diu ahi.
20 Hiche sanga chu, Pakai na Pathen umpina a hiche gancha ho chu nang leh na insung miten kumseh leh aman alhenna mun'a naneh diu ahi.
21 Hinlah hiche gancha pengmasa chu a elbai ham ahilouleh mitcho ahikhah leh nang hon Pakai na Pathen'u henga na todoh lou diu ahi.
22 Hiche sanga chu, na insung mite toh na inmun uva naneh diu ahi. Koi hileh hou thudol'a miboh hihen mitheng hijongleh sajuh le sakhisa naneh bang uva naneh thei diu ahi.
23 Ahin athisan chu naneh lou diu ahi. Hichu tol lham'a twi banga nasun lhah diu ahi.