14
Hou lamdol'a Satheng leh saboh
1 Nangho Pakai na Pathen a nahitah jeh un thipul douna nanei tengu leh chalsam kitan ahilouleh kivomui nabol louhel diu ahi.
2 Pakai na Pathen diuva nangho atheng dia khindoh nahi tauve, chule Aman leiset chunga nam jouse lah a Ama goulupen a na lhendoh u ahitai.
3 Chule gancha boh kiti phot naneh theilou diu ahi.
4 Hichengse vang hi naneh thei diu ahi: bongchal, kelngoi, kelcha,
5 sajuh, pelkai, sakhi, gam kel, chule molchunga kelngoi ahi.
6 Nanghon atin kika leh a-ih lhaikit tapou sa naneh thei diu,
7 hinlah hiche teni neilou sa vang chu naneh lou diu ahi. Hijeh a chu sangongsang, talep, bui amaho cheng naneh lou diu ahi. Amaho hin ihdoh an alhaiyun ahin akengtin'u akika pon ahi. Hijeh achu hiche gancha ho hi nangho dinga sathenglou ahi.
8 Chule vohcha naneh lou diu ahi. Akengtin akika nan ahin ihdoh an alhai pouve, hijeh a chu nangho dia sathenglou ahiye. Hiche gancha ho hi asa jong naneh theilou diu chule athilong jong na tohkhah lou diu ahi.
9 Twikhanglen'a cheng ganhing lah a alip leh alha nei jouse naneh thei diu ahi.
10 Twikhanglen'a um alip leh alha neilou jouse naneh lou diu ahi. Amaho chu nangho dia sathenglou ahi.
11 Nang hon chungleng vacha atheng jouse naneh thei diu ahi.
12 Hichengse hi naneh theilou diu ahi: muthong, mubong, muvom,
13 muthi, sumbupi,
14 va-ah leh ama tobang jouse,
15 muvanlai, muthi-muhchom chule ama tobang jouse,
16 sumbupi nou, sumbupi len, sumbu changlit,
17 muthibong, sumbupi, Egypt mite muthi,
18 bah chule adang phabep jaona naneh lou diu ahi.
19 Tollham a vahle lung lhanei jouse hi nangho dia athenglou ahiuvin naneh theilou diu ahi.
20 Hinlah vacha hihen lung hijongleh alhanei ahivanga hou thudol'a atheng kitiphot chu naneh diu ahi.
21 Ganhing ama macham'a thi naneh theilou diu ahi. Nakhopi sung uva kholjin miho napeh thei diu ahilouleh na hetkhah lou mikom'a najoh thei diu ahi. Amavang nang hon naneh theilou diu ahi. Ajeh chu Pakai na Pathen adia athenga kichom khen nahi tauve. Chule nang hon kelchanou chu kelchapi noitwiya nahon lou diu ahi.
Hopsom peh ding dan
22 Gasoh lah a som’a khat ding nakoi doh diu gasoh jouse lah a, som’a khat kumseh le na todoh diu ahi.
23 Hiche som’a khat chu Pathen houna mun'a nahin choi diu Pakai Pathen'in amin dopsangna dinga alhenna mun'a chu nahin choi diu, hichu Ama angsunga naneh diu ahi. Hitia nabol diu chu chang le mim, lengpiga, olive thao, chule gancha peng masa achal hi ding ahi. Hiche nabol uva hi Pakai na Pathen ginje nakihil diu ahi.
24 Pakai na Pathen uvin phatthei nahin boh tengu leh mun gamla tah hijongleh lousohga tamtah nalo diu, chuteng hoilai mun'a kon hijongleh som’a khat nahin choi diu ahi.
25 Amun chu agamlat behseh a ahileh, hiche gasoh chu najoh diu najohna man u vang chu Pakai na Pathen'u houna mun'a chu nalhut diu ahi.
26 Nahung lhun tengu leh, nang hon nadei chan nasum uva na kichoh diu bongchal, kelngoi, kelcha, lengpitwi chule adang donthei nachoh jeng theiyu ahi. Chuteng nangho leh na insung miteuvin Pakai ansunga an najon khom diu ahi.
27 Chule nalah uva Levi mite nahebol jing diu ahi. Ajeh chu amaho chenna ding gam nei louva um ahiuve.
28 Kumthum lhinsih leh som’a khat achombeh a nahin choi diu, hichu akinaipen khopia nakhol khom diu ahi.
29 Hichu Levi mite napeh diu, nalah uva cheng gam dang miho, naochaga ho, chule khopi ho a meithai ho jong napeh diu, hichu aneh uva lungkim diu ahi. Chuteng Pakai na Pathen uvin phatthei naboh diu ahi.