13
Milim hou gihna
1 “Nalah uva gaothusei ho khonunga hunglhung ding aseiyun, ama hon thil kidang melchihna ho akilahsah uva,
2 hiche banga chu gaothua asei doh jouseu agui lhun'a ahileh, Amaho chun hitia hi asei uva, ‘Hungun, tumasanga nahet khahlou u pathen ho—keiho pathen hou tau hite—
3 atiu leh na nahsah lou diu ahi. Ajeh chu na lungthim pumpiu le na lhagao pumpi uva na ngailut u hinam tia Pakai, na Pathen uvin na patep nau ahi.
4 Pakai, na Pathen'u kin jeng nabol uva nagin diu ahi. Athupeh ho nit uvin, a ogin ngaiyun, chule Ama tuhchah uvin.
5 Alam louva gaothu seidoh a khonung ding thilmu ho abonchauva thina chang diu ahi. Ajeh chu ama hon na huhhing pau Pakai, na Pathen'u Egypt gam'a konna nahin puidoh pau doumah jeng abol tauvin ahi. Pakai, na Pathen'u thupeh a kon'in puimang ding nagouvin, hijeh achu thina na chansah teitei diu ahi. Hitia chu nalah uva konna phatlouna ho natol mang diu ahi.
6 Mikhat touvin guhthim in nahin lhem uhenlang—na sopipa, na chanu, na chapa, na ngailuttah na jinu, ahilouleh naloi ngaipen chun, ‘pathen dang hou din cheu hite' tihen—hinlah hiche pathen ho hi napu, na pateu jengin jong ana het khah lou ahi.
7 Nahin lhep patep diu, napu napa teu khanga pat le leiset a nahet khah lou pathen hou tauvin, ati diu ahi.
8 Hinlah athu uva nanun louhel diu ahi. Chule hepina jong nanei lou diu, ven jong na venbit thei louhel diu ahi.
9 Amaho chu thina na chansah teitei diu ahi! Amasa tah in kholhangsam leu chun mipin nahin kithopi diu ahi.
10 Athemmo a chu songa naselih diu ahi ajeh chu ama hon Egypt gam'a nasoh channa uva konna na huhdoh pau Pakai na Pathen uva kon'in puimang ding nagouve.
11 Chuteng Israel pumpin ajah uva kicha diu, chule ngolhoitah a chon kit talou ding ahiuve.
12 Pakai na Pathen uvin napeh nau khopi sunga nachen tengu leh, nang hon hitia thu kisei najah diu,
13 nalah uva michavai hon nasopi hou henga 'Nahet khah louhel'u pathen ho gahou uhite' tia asei uva apuimang diu ahi.
14 Hitobang dinmun hoa konna hi atah chu chingthei tah a na kholchil diu ahi. Nalah uva hitobang thulhut hi adih in aum mong tai ti aki cheh tengleh,
15 hiche khopi chu nalonvuh uva achilhah te jouseu le agancha jouseu geiya na suhmanghel diu ahi.
16 Mun kihong laiya chu thil kichom ho naset uva aboncha na halvam hel diu chule khopi chu Pakai na Pathen uva dinga pumgo thiltoa pang ding ahi. Hiche khopi chu itih a jong sahphat kit louding, ase a um jing ding ahitai.
17 Khopi sahdohna thei thil khat cha jong na umden sahlou diu ahi. Chuteng Pakai milungsetna chu nachan diu chule hepina dimset a napu napa teu khanga akitepna banga nam lentah naso diu ahi.
18 A ogin na ngai uva tunia athupeh jouse nanit uleh Pakai na Pathen'u hepina nachan diu, chutia nabol uchun Ama alunglhai sah ding ahi.