12
Houna mun dinga Pakaijin alhen
1 Hichengse hi Pakai napu napa teu Pathen'in dan leh thupeh jui dinga napeh u ahin chinthei tah a najui diu ahi. Nadam sung uva jana neitah a nabol diu ahi.
2 Hiche gam khu nalhun uva, namdang te abonchauva nano mang tengu leh, a pathen milim semthu jouseu molchunga hihen, gammang lah chule thingphung tinchenga hijongleh na suhmanghel diu ahi.
3 Amaicham hou nasuh set diu chule maicham phung jouse jong nasuh chim diu ahi. Asherah ho jong meiya nahalvam diu chule a pathen min jouseu aboncha na suhmanghel diu ahi!
4 Hiche lim semthu hou miten apathen'u ahou bang uva nang hon nahou lou diu ahi.
5 Amavang nang hon Pakai na Pathen houna ding mun'a Israel insung aboncha kikhop khomna mun'a chu gin leh jabol tah a nahou diu ahi.
6 Hiche mun'a chu nacham tah uva pumgo thilto nahin choi diu, na thilto diu som’a khat, kitepna suh bulhitna ding thilto chule na gancha penglha masa jouseu jong na todoh cheh cheh diu ahi.
7 Hiche mun'a chu nang leh na insung miten Pakai ansunga anneh khom nanei diu, Pakai phatthei na ho nachan diu ahi, ajeh chu nangman Pakai na Pathen thupeh nanit jal ahi.
8 Pakai kin nabol danu jong kikhel ding ahi. Tunin nangho dei danin nabol uvin,
9 ajeh chu Pakai na Pathen'un atumbeh a napeh nau gam nangho jouse dinga choldona gam chu na lhun nailou u ahi.
10 Hinlah nang ho chomlou kah a Jordan vadung na galkai diu Pakai na Pathen'un napeh nau gam'a chu nachen diu ahi. Aman nagal miteuva konna na kicholngah sah uva chule gamsunga chu bittah a a na khosah tengu le,
11 naboncha uva keiman ka thupeh chengse nahin choi diu—pumgo thilto, na thilto diu ho, kitepna suh bulhitna ding thilto hichengse hi, Pakai na Pathen min jabolna dinga alhenna mun'a chu nahin choi sohkei diu ahi.
12 Hiche mun'a chu na chanu teu ahin, na chapa teu chule nasohte jouseu jaona Pakai na Pathen henga thangvahna nanei khom diu ahi. Chule khopi sunga nachen khompiu Levi mite na geldoh jing diu ahi. Ajeh chu ama hon gam chanvou anei lou’u ahi.
13 Nangho chingtheiyun, ajeh chu mun jousea pumgo thilto na todoh theilou diu ahi.
14 Na insung miteu chenna mun, hichu Pakaijin adeilhenna mun'a vang chu natodoh thei diu ahi. Hiche mun'a chu pumgo thilto natodoh diu chule ka thupeh aboncha na bolkim sohkei diu ahi.
15 Na ganchate vang chu na kitha uva khopi nadei dei nauva naneh jeng theiyu ahi. Pakai na Pathen'un phatthei aboh ganchaho chu naneh jeng theiyu ahi. Hou thudol'a thenpet hihen bohpet hijongleh nabon uva Sakhisa leh Sapeng tua naneh bang uva hi naneh thei diu ahi.
16 Ahin gan thisan vang chu naneh lou diu, chule tollham a twi banga nasun lhah diu ahi.
17 Hinlah nang hon na thilto hou chu na khopi sung uva naneh theilou diu, hichu som’a khat ahin, gathah, Olive thao, na gancha asoh masaho ahin chule kitepna thilto, chule mimal kipehna thilto ho hijongleh khopi dunga naneh lou diu ahi.
18 Hichengse chu Pakai na Pathen utoh aman adeilhen na mun'a chu naneh diu ahi. Na chateu ahin, nasoh teu ahin chule khopi sunga Levi mite jaona a nabol jouseu Pakai na Pathen'u umpina a nabol diu ahi.
19 Chule na damsung uva Levi mite na geldoh jing diu ahi.
20 Pakaijin akitepna banga nagam'u ahin kehlet tengleh, nang hon sa na duchat tengu leh itih hijongleh naneh thei diu ahi.
21 Pakai na Pathenin ama houna dinga adeilhenna mun chu na chenna a konna lamsao tah hi ding hijongleh na jabol diu ahi. Chutia lamsao chu ahileh, keiman ka thupeh bang uva gancha lah a na kelcha hon, na kelngoi hon chule na bong hon lah a nadei na kitha uva naneh jeng theiyu ahi.
22 Nalah uva koi hijongleh atheng hihen aboh hileh tua Sapeng le Sakhisa naneh jiu banga hichu naneh jeng thei diu ahi.
23 Ahin gan thisan vang naneh louhel diu ahi, ajeh chu thisan hi hinna ahin, hinna thisan chule asa naneh kop lou diu ahi.
24 Hiche sang chun, athisan chu twi banga tol lhama nasun lhah diu ahi.
25 Gan thisan chu naneh lou diu ahi, chutileh nangho leh nacha teu chunga ijakai pha sohkei ding ahi, ajeh chu Pakai lunglam chu nabol diu ahi.
26 Atumbeh a na thilpeh diu leh kitepna thilto chu choiyun lang, Pakaijin adei lhenna mun'a chu naga koi diu ahi.
27 Nanghon Pakai na Pathen adia pumgo thilto gan thisan naga todoh teitei diu ahi. Gan thisan jouse chu Pakai maicham'a nasun khum diu, asa vang naneh diu ahi.
28 Ka thupeh jabolna dingin chingtheiyun, chutileh nangho leh nacha teu chunga ijakai pha sohkei ding ahi, ajeh chu Pakai lunglam chu nabol diu ahi.
29 Pakai na Pathen na masang uva ache a namdang ho asuhmang tengleh nanghon na nomang uva agam uva nachen diu,
30 achon chan’u jui ding nagot louhel diu chule apathen hou kin jong nabol louhel diu ahi. A pathen hou chung chang hetnomna jong nei louva, 'Hiche nam mite hin pathen iti ahou uham? A chon dan u kajui nom'e' tia jong nakhol lou diu ahi.
31 Nanghon namdang ten apathen’u ahou bang uva Pakai na Pathen nahou louhel diu ahi. Ajeh chu ama hon Pakai lama dinga doumah jeng abol uvin, achapa teu leh achanute hou jeng jong apathen diuva akatdoh jiu ahi.
32 Hijeh chun ka thupeh jouse hi chingthei tah a najui diu ahi. Nanghoa konna ima kilahdoh sah hih unlang chule imacha lah ding nagot lou diu ahi.