11
1 Nanghon Pakai na Pathen'u na ngailut diu chule Pakai dan leh thupeh aboncha najui tei diu ahi.
2 Na lungthim'un ching jingun, keiman tua hi na chateu Pakai na Pathen'u sinsah dan hekha loulai ahilouleh aloupina le aban thahatna mukha loulai ho heng'a kasei ahipoi.
3 Amahon Egypt gam'a Pharaoh le agamsung douna a melchihna kidang le detmah thil kibol ho amu hih uve.
4 Amahon Egypt sepai te le sakol ho le akangtalai hou—nahin del lai uva Twipi San a iti alhah lhum sah ham ti amu hih uve. Aman amaho asuhmang uva, chule tuni chan'a kimudoh talou ahiuve!
5 “Na chateuvin ichan a Pakaijin gamthip noiya pat hilai nahung lhun chan uva na khohsah u amu pouve.
6 Na chateuvin Dathan le Abiram insung mite (Reuben chilhah, Eliab chapa teni), aponbuh ule anei agou jouseu chunga athilbol, leiset in akamsah le avallhum amu pouvin ahi.
7 Hinlah nang hon Pakai natoh kidang abonchan namit tah uvin namu sohkei tauvin ahi!
Jabolna jeh a phattheina ho
8 Hijeh chun chingtheiyun, tunia thupeh chengse aboncha na juikim sohkei diu, chutileh na thahat diu na lutna diu gamsung nalo thei diu ahi.
9 Jabolna nanei uva ahileh Pakaijin napu napa teu khanga peh dinga akitepna gam napeh diu ahi, ajeh chu achilhah ten hiche khoiju leh bongnoi lonna gam khu alo diu ahi!
10 Hiche gam nalo diu khu nahin dalhah u Egypt gam tobang ahipon, hiche honsung'a muchi nalhah tengu leh kenga twilam le kotong nasem tobangu ahipoi.
11 Amavang, nalo diu gam hi thinglhang le phaicham a go aneng in—
12 agamsung pumpi hi Pakai na Pathen'un kumlhung lhalhunga avetkolna gam ahi!
13 “Tunia naheng uva ka thupeh chengse phatecha ahile najui uva ahile, chule Pakai na Pathen'u hi na lungthim pumpiu le na lhagao pumpi uva akin nabol uva ahileh,
14 Pakaijin phat bichin kikhel dungjuiya gomasa le gonukhah ahin juhsah ding, chuteng chang le mim, lengpiga thah le olive ga thah nahin pohlut diu ahi.
15 Na gancha te diuva anpha tah tah napeh diu chule nang hon nadu chan’u naneh thei diu ahi.
16 “Hinlah chingtheiyun. Na lungthim'u kilhep lhah sah hih uvin, ajeh chu Pakaiya konna kiheimang a pathen dang nabel lo diu ahi.
17 Achuti louva ahileh Pakai lunghanna chun na halvam jeng diu, Pakaijin vankot akha ding gotwi aum lou teng nang hon ahina banga chang na khop tup theilou diu ahi. Chuteng hiche gampha mun'a chu hetman louva na thigam jeng diu ahi.
18 “Hijeh chun ka thupeh chengse hi na lungthim cheh uva koiyun. Na geldoh jingna diuvin na khut uva kibu uvin chule na chalpang uva kikan uvin.
19 Na chateu henga na seipeh sohkei diu ahi. Insunga na umpet u hihen, lam najot pet, imut kon chule na thodoh kon teng ujongleh na seipeh diu ahi.
20 Thupeh chengse chu kotphung leh kelkot jousea najih diu ahi,
21 chutileh vanthamjol um laisea, Pakaijin napeh nau gamsunga nangho leh na chateu chule na chilhah teu chan geiya lungmonga na chen diu ahi.
22 “Ka thupeh jouse hi chingthei tah a najui diu ahi. Na ngailut nau chu Pakai na Pathen lama nache nau leh na tuhchahna uva musah un.
23 Chuteng Pakaijin na masang uva namdang jouse adelmang ding, amaho lenjoh uhen hatjo jongleu, agam'u nalah diu ahi.
24 Nakal sondohna chan u chu nangho gam hi ding ahi. Na gamgiu kilhun ding dan chu lhanglam'a gamthipnoi apat sahlam'a Lebanon chan, chule solam'a Euphrates Vadung apat lhumlam'a Mediterranean Twipi chan hi ding ahi.
25 Nangho dounan koima ding ngam ponte, ajeh chu Pakai na Pathen uvin akitepna banga na chena chan uva miten na ginna diu le kichatna akoi ding ahi.
26 “Veuvin, tunia phattheina leh gaosapna nakilhen diuva kapeh diu ahi!
27 Pakai na Pathen'u thupeh chengse hi nanit sohkei uva ahileh nangho phatthei nachan diu ahi.
28 Hinlah Pakai na Pathen'u thupeh na nuse uva ama a konna kiheimang'a tumasanga nahet khah lou u pathen dang ho nahou uleh naki gaosap diu ahi.
29 “Pakai na Pathen uvin gamsung'a napuilut uva chule goulo dia napanpi tengu leh, phattheina ho Gerizim Mol'a nasap diu chule gaosapna Ebal Mol'a nasap diu ahi.
30 (Hiche molsang teni hi Canaan mite gam Jordan Phaicham a lhumlam Jordan Vadung, Gilgal khopi toh kinai cha, Moreh gangpiphung apat kigamlat talou ahi.)
31 Ajeh chu nang ho Pakai na Pathen'un peh dinga atepsa gam lut dinga Jordan vadung na galkai ding koncha nahi tauve. Agamsung nalhun uva nachen tengu leh,
32 tunia keiman kapeh u dan jui ding jouse, chingthei tah a nahin jui sohkei diu ahi.