10
Kitepna thah
1 Hiche phat lai chun Pakaijin kaheng ah aseijin, Songpheng ni masanga toh kibang chat hin choiyin chule thingkhong khat phatah in sem inlang asunga khum ding ahi. Hiche na ding chun molchunga kaheng'a hung kaltouvin,
2 chule songpheng chunga chu masanga na sekeh chunga thucheng kijih bang banga kajih lut ding ahi. Chutengleh thingkhong sunga nakoi ding ahi, ati.
3 “Keiman thinggi thingkhong in kasemin chule amasa a bang bangin songpheng ni ka suitoh in ahi.
4 Chuin Pakaijin avelin thupeh som ho chu ajih lut in, keima eipe tan ahi. Thucheng ho chu thakhat ahin, Pakaijin mol bul'a nakikhop nikho uva meikong lailunga pat ana sei chu ahi.
5 Molchunga kon kahung kiheisuh in, kitepna songpheng teni chu kitepna thingkhong sunga kakoi tan, hichu Pakai thupeh banga keiman kabol ahi. Songpheng teni chu thingkong sunga aum nalaije.”
6 (“Israel mite chu Jaakan twikul mun'a kon'in Moserah kiti Aaron kivuina mun'a chun akitol tauvin ahi. Achapa Eleazar chun thempu chungnung natoh atoh ahi.
7 Hiche mun'a pat chun Gudgodah mun ajon tauvin, aban'in Jotbathah, vadung le vacha tampi lonna gam ahi.
8 Hiche phat lai chun Pakaijin Levi insung mite chu Pakai Kitepna Thingkhong pu dingin achomkhen uvin, chuleh Pakai angsunga ding diu Pakai min'a thempu na atoh diu, Ama min a phatthei bohna aphon diu ahi. Hiche ho hi amaho natoh ding ahi.
9 Hiche jeh achu Israel mite lah a Levi insung chu chenna ding gamtum nei louva um ahiuve. Pakai na Pathen'un asei banga Pakai Ama tah chu agoulupen'u ahi.)
10 “Keima chu, amasa a bangin nisomli le jan somli molchunga Pakai henga kaum in ahi. Pakaijin avelin ka taona asang'in nangho suhmang lou ding pha asah tan ahi.’
11 Chuin Pakaijin kaheng'a aseijin, 'Kipat inlang na kholjin nau jom tauvin, chule napu napa teu peh dinga kakitepna, gou lodin mipi ho lamkai tan,' ati.
Ngailut le jabol dinga kouna
12 Chule tun, Israel, Pakai na Pathen'un nanghoa konna adei chu ipi ham? Aman adei chu Pakai na Pathen nagin uva chule Pakai lunglam jeng nabol diu, na lungthim pumpiuva Pakai lam jeng nakat diu hi ahi.
13 Chule tunia najah uva kasei, Pakai thupeh chengse aboncha na juikim sohkei diu ahi.
14 “Veuvin! Van sangpen leh leiset chunga thil ijakai jouse hi Pakai na Pathen uva bou ahi.
15 Ajeh chu Pakaijin na pului teu ana ngailun hijeh achu, achilhah teu nangho jouse jong namdang jouse sanga Pakaijin na khohsah joh u ahi.
16 Hijeh chun na louchal nauva kon'in, nalung heiyun.”
17 Ajeh chu Pakai na Pathen uhi pathen jouse Pathen chule pakai jouse Pakai ahi. Ama chu Pathen thupi, thahat le jaum Pathen, sihnei langneina neilou ahi.
18 Aman meithai ho leh chaga ho chunga thutah aumsah in ahi. Aman gamdang mi nalah uva chengho angailun, neh le chah chule sile le chen ding apeuvin ahi.
19 Hijeh a chu nang hon jong kholjin mi na ngailut diu ahi, ajeh chu nangho tah jong Egypt gam'a kholjin mi na-na hiu ahi.
20 Nanghon Pakai na Pathen'u nagin uva nahou diu Ama natuh chah diu ahi. Na kitepna hou chu Ama min'a bou nanei diu ahi.
21 Ama bou na Pathen ahin, chule Ama bou choi-at dinga lom, ama bouvin thil kidang ijakai abol in, hichu namit tah uvin namu sohkei uve.
22 Napu napa teu Egypt gam'a achesuh uchun amaho mi somsagi bou ahiuve. Hinlah tun nangho Pakai na Pathen'un van'a ahsi jat in na semdoh tauvin ahi.