9
Pathen hepina vanga galjona
1 Ngaiyun, O Israel! Tunia hi nangman Jordan vadung galkaiya namdang te chenna nalut ding ahitan, amaho khu nangho jouse sanga hatthei ahiuve. Khopi sunga acheng uvin chule akhopi kimvel uva pal kigen jouse jong vanthamjol chan'a sang ahi!
2 Amaho khu nangho sang'in asang jouvin chule athahat jouvin abonchauva Anak chilhah ahiuve. 'Anak mite kidintepi ding koi ham?' tia thu kisei naja tauve.
3 Ahinlah nahe sohkei uve tunikhoa hi Pakai na Pathen'un kidangtah a aluchung vum uva meikong akilah sah ding asuh gamhel diu ahi. Aman ahin suhnem diu chuteng Pakaijin atepna banga nang hon gangtah a najo uva na nomang diu ahi. .
4 Pakai na Pathen'un nangho dinga hitobang natoh ahin chaisoh tengleh, 'Mipha te kahi jeh uva Pakaijin hiche gam hi eipeh u ahi!' tia nasei louhel diu ahi. Ajeh chu hiche nam mite phatlou jeh a Pakaijin agam uva konna asoldoh joh ahi.
5 Nangho chonphat vanga hiche gam hi nalo diu ahipoi. Hinlah hiche nam mite phatlou jeh a adelmang ahin chule Pakai na Pathen'un napu napa teu Abraham, Isaac le Jacob henga akitepna asuh bukim ahi.
6 Nangho chonphat vang uva Pakaijin hiche gam hi napeh u ahipoi ti nakihet diu ahi, ajeh chu nangho milouchal te nahi bou uve.
Sana a kisem bongnou geldohna
7 Gamthip noiya Pakai na Pathen'u ichan'a alunghan chu geldoh uvin chule sumil hihbeh uvin. Egypt gam nahin dalhah nikho uva pat tuni chanin Ama dounan nachon jing uve.
8 Sinai Mol jenga jong nasatah in Pakai na lunghansah un Ama nangho sumang dinga gotsa anahi.
9 Hiche hi molchung kaumlaiya thilsoh ahin, Pakayin songpheng ni ah imatih chan'a dingin nangho toh kitepna chu asem tan ahi. Nisomli le jansomli jen an nelou twidon louvin kaum'in ahi.
10 Mol bul'a na kitit laiyun Pakaijin songpheng ni eipen hichu meikong lailunga pat athu seidoh jouse aboncha akhuttah a ajih ahi.
11 Ni somli le jan somli lhin nikhon Pakaijin ajih kitepna songpheng teni chu eipe tan ahi.
12 Chuin Pakaijin kaheng'a aseijin, 'Kipatdoh in! Gangtah in chesuh in, ajeh chu Egypt gam'a konna nahin puidoh miten doumah jeng abol tauve. Chomlou kah in ka thupeh nahsah louvin akihei manggam tauve! Sana asujun uvin amaho ding limsemthu akisem tauve!' ati.
13 Pakaijin kaheng'a asei kit in, ‘Hiche mite lungtah le thungai louna ka muchen tai.
14 Tun keima che ingting hiche mite hi vannoiya ka suhmang jeng diu ahi. Amaho sanga hatjo le chungnung joa keiman na chilhah te ka tundoh ding ahi, ati.
15 Chuin molchung vum'a mei akong jeng tan ahile, keima ka hung kumsuh in monmang theilou kitepna songpheng teni chu kahin choijin ahi.
16 Keiman kahin vesuh in ahileh, Pakai douna chonset nabol tauve ti ka muchen tai. Sana mangchan bonglim doi nakisem thu tauvin ahi. Pakaijin na thupeh nauva kon'in chomlou kah in na kiheimang tauve!
17 Chuin keiman songpheng teni chu tol lham'a kasep lhan na mitmu tah uvin kasep in ahi.
18 Hinlah Pakai angsunga nisomli le jan somli masang chun keiman an jong ka nepon chule twi jong ka don poi. Ajeh chu nang hon Pakai doumah bol in hinkho namang tauvin ahi.
19 Pakai lunghanna na chung uva ahung chuh a na thagam diu chu keima ka kicha lheh jenge, hinlah Pakaijin ka taona eisanpeh kit in ahi.
20 Pakai chu Aaron chunga alung phamo lheh jeng tan, tha ding agon ahi. Aaron dingin ka taovin ahileh Pakaijin ahing hoi tan ahi.
21 Na chonset nau bonglim chu kalan mei lah a ka halvam tan vut kaso tan ahi. Mei kihalna vutvai abonchan kalan molchunga konna vadung twi a ka seplha tan ahi.
22 Massah, Taberah le Kibroth-hattaavah mun'a Pakai doumah nabol uvin ahi.
23 Chule Kadesh-barnea mun'a Pakaijin hiche thupeh mangchan nasol tauvin ahi: Chetou un keiman kapehna gam khu galo tauvin. Hinlah Pakai na Pathen thupeh nahsah louvin hinkho namang uvin ahi.
24 Henge, Pakai doumah jeng nabol uve tihi keiman kahin he jingin ahi.
25 Hijeh a chu nisomli le jan somli Pakai henga ka bohkhup in ahi, ajeh chu Pakaijin na boncha uva suhmang ding nagot u ahitai.
26 Pakai henga hiti hin kataove, O thaneipen Pakai, hiche mite hi sugam hih un. Amaho hi namite ahiuve. Chule amaho hi na goulupen, Egypt gam'a na huhdoh a naban thahat pan a nahin puidoh ahiuve.
27 Hiche mite chonsetna leh louchalna a kon'in ngaidam tan, chule ka puluiyu Abraham, Isaac le Jacob geldoh in.
28 Hiche mite hi na suhmanga ahileh, Egypt miten hitia hi asei diu, “Israel mite athi gam tauve, ajeh chu Pakaijin akitepna gam'a chu apui lhung joulou ahitai.” Ahilouleh “Hiche mite hi Pakaijin avetda jeh a asuhgam ahi tauve; thagam dinga apuile ahi, tia asei diu ahi.”
29 Ahinlah amaho hi na mite ahiuvin nagoulo ding, Egypt gamsunga konna naban thahat pan a nahin puidoh ahiuve.