8
Pathen sumil hih un
1 Tunia ka thupeh chengse hi chingthei tah in jui bukim sohkei uvin. Chutileh nahin thei uva napun diu, Pakaijin napu napate khanga pat peh dinga akitepna gam nalo thei diu ahi.
2 Pakai na Pathen uvin kum somli gamthip lah a konna nahin puidoh nau geldoh jingun, ajeh chu Pakai thupeh ijakai nanit kimsohna diuva nangho patepna ahi.
3 Henge, Pakaijin gilkiel'a naum pettah uvin manna na peuvin ahi. Hiche tobang an hi napu napa teu khanga jong um khalou ahi. Ajeh chu mihem te hi changlhah jengseh a hing jou ahipoi ti, Pakaijin nahetsah nau ahin; amavang Pakai kam sunga konna hung potdoh thuchenga bou hinga nahiuve.
4 Kum somli sungin von-ah ding jong na ngaicha pouvin chule nakeng ujong apom pon ahi.
5 Hichu geltem uvin: Minu mipan acha ahilna banga, Pakai na Pathen uvin nangho phatchomna dinga bou na khoukhah u ahi.
6 Hijeh chun Pakai na Pathen'u thupeh chengse abonchan nit kimsoh keiyun lang, Pakai ging jinga hinkho naman diu ahi.
7 Ajeh chu Pakai na Pathen uvin na gam'u phatah twi nenna thinglhang le phaicham a vacha twi le twikul, twisam putna mun a napuilut u ahi.
8 Hiche gam pumpi hi mimchang le kolbulei jeng ahin; theiba phung, kolbuthei phung, Olive phung leh khoiju lonna gam ahi.
9 Hiche gamsung hi anneh thalhinna imacha vatlou ahi. Agamsunga thih jong song banga kimang ahin, thinglhang gam songmantam jeng uma ahi.
10 Agamsungga naneh tengu leh Pakai na Pathen'u thangvahna napeh jing diu ahi.
Kiletsah jeh a gihsalna
11 Hinlah hiche phat chu chingthei tah a um phat ahi! Na ninglhinna jal uvin tunia kapeh u Pakai na Pathen'u thupeh na suhmil louna diuvin chingtheiyun.
12 Nanghon innom nahin kisah doh diu chule haosatah a na inchen diu,
13 chule na gancha teu jong hung pung cheh cheh ding, sana leh dangka ijakai kimsel'a nahin nei diu, chuteng chingtheiyun.
14 Chutengleh kiletsah hoithona le Egypt gamsunga soh a konna na huhdoh pau Pakai na Pathen'u na suhmil lou diu ahi.
15 Aman gamgo le gamsa tijat umtah gamthip noiya aipi hang leh gulse holah a nahin puidoh nau na geldoh jing diu ahi. Aman songpi a konin twi nape uvin ahi.
16 Aman gamthip noiya manna in navah uvin, hichu napu napa teuvin ahet khahlou anneh ahi. Hiche hi na kineosahna diu leh patepna dinga Aman nangho phatna dinga abol ahi.
17 Hiche ho hi 'Keima hatna a gou kaki lamdoh ahi' tia nasei louna diuva Aman abol ahi.
18 Pakai na Pathen'u na geldoh jing diu ahi. Pakai bouvin nangho lolhin theina dinga tha napeh u ahi, ajeh chu napu napa teu khanga pat kitepna guilhun sahna ding ahi.
19 Hiche hi nahet jing diuva ka thupeh ahi: Pakai na Pathen'u sumila pathen dang nahou uva ahileh, na kisumang jeng diu ahi.
20 Pakai na Pathen nahsah louva naum uva ahileh, Pakaijin namdang asuhmang ho banga nangho jong na suhmang diu ahi.