7
Pathen nam lhen
1 Pakai na Pathen uvin gamsunga nahin pui tengu leh, namdang tampi: Hit mite, Girgash mite, Amor mite, Canaan mite, Periz mite, Hiv mite le Jebus mite khu asuhtheng ding ahi. Hiche nam sagi ho hi nangho sanga hatjo le pungjo ahiuve.
2 Pakai na Pathen uvin akhut a konna nangho nahin pehdoh tengu leh, nang hon abonchauva na suhgam sohkei diu ahi. Amaho toh kichamna ima semlouva abonchauva na thagam diu ahi.
3 Chule amaho toh chun na kichen theilou diu ahi. Na chanu teu le na chapa te hou chu amaho chanu te le chapa te toh na kichen sah louhel diu,
4 ajeh chu ama hon semthu pathen hou dia na chateu apuimang diu ahi. Chuteng Pakai lunghanna nachung uva hung chu jeng ding, chomlou kah a na manthah lo diu ahi.
5 Hitia hi nabol tei diu ahi. Amaicham phung hou le akhom ho aboncha naphuh lhuh peh diu ahi. Chule Asherah khom ho jong naphuh lhuh uva alim semthu u pathen ho meiya na halvam diu ahi.
6 Ajeh chu nangho mitheng te nahiuvin, Pakai na Pathen a nahiuve. vannoiya mijouse lah a hi Pakai na Pathen uvin ama gou phapen dia nalhen'u ahi.
7 Pakaijin namdang te sanga thalhing le hatjo nahi jeh uva nalhen'u hilouvin, amavang nam neopen nahi jeh uva nalhen joh u ahi!
8 Ajeh chu Pakaijin akitepna ageldoh jingin, nachung uva ngailutna anei jingin ahi. Hijeh achu Pakaijin athahat pana Egypt gam Pharaoh akon suhgimna nachan nauva konna na huhdoh u ahi.
9 Hijeh chun hethem un Pakai na Pathen uhi Pathen dihtah ahi. Pakai ngailua athupeh nit jing mite chunga, akhang akhanga akitepna akoi jingin ngailutna jong anei jingin ahi.
10 Hinlah Pakai nahsah louva umho chunga gim genthei alhunsah in asumang jin ahi.
11 Hijeh chun tunia thupeh kapeh chengse hi aboncha na juikim sohkei diu ahi.
12 Dan le thupeh aboncha na juikim sohkei uva ahileh Pakai na Pathen uvin na chung uva alungsetna longlou chu akoi jing ding ahi. Ajeh chu napu napa teu khanga pet akitepna ahi.
13 Pakaijin phattheina leh Ami ngailutna chun naumpi jing diu chule cha jong tampi nahin diu ahi. Pakaijin gam phatah gaphasona ding leh na gancha teu kivahna ding napeh diu, napu napa teu khanga peh dinga akitepna gam nalhun tengu leh louga phatah nachom khom diu, lengpi thah leh Olive thao chule bonghon tampi leh kelngoi hon tampi jaona nanei diu ahi.
14 Chutengleh vannoiya namdang te jouse sanga phatthei nachan diu ahi. Numei, pasal hihen na gancha teu hijongleh chanei louva khatcha na umlou diu ahi.
15 Chule dammo veisetna a konna Pakaijin navenbit jing diu ahi. Egypt gam'a gim genthei nathoh bang uva nathoh sah lou diu, na doumah jouseu aboncha asuhmang ding ahi.
16 Pakai na Pathen uvin namdang te nakhut uva apehdoh chengse aboncha na suhgam diu ahi. Ngailutna beiya nabol diu chule amaho pathen angsunga na bohkhup louhel diu ahi.
17 Amavang nang hon hitia hi nasei diu, 'Hiche nam mite hi eiho sang'in ahatjo uvin, iti iki doupi thei diu ham?'
18 Hinlah na kichat theilou diu ahi! Ajeh chu Pakai na Pathen uvin Egypt gam Pharaoh henga ichan geiya na atoh ham ti na geldoh diu ahi.
19 Pakai na Pathen uvin amaho chunga tijat umtah a na atoh geldoh jingun, hichu nangho mitmu tah a thilsoh ahi. Chule thil kidang ijakai akilahsah ho geldoh jing uvin, aban thahat pan a anatoh thil kidang hoa konna Egypt gam'a pat nahin puiyu chu na suhmil lou diu ahi. Hiche banga chu Pakai na Pathen uvin tua na galmi teu chunga na atoh ding ahi.
20 Pakai na Pathen uvin nalah uva kisel themlhat um nalaiho nomangna dinga tijatna ahin sol ding ahi!
21 Hiche nam mite chunga chu kichatna nanei louhel diu ahi, ajeh chu Pakai na Pathen uvin na umpi jing uve, Pathen thilbol thei kidang ahi.
22 Pakai na Pathen uvin hiche nam mite ho hi athem athem'a asuhmang ding ahi. Khatvei pansa na suhmang jeng thei lou diu ahi. Achuti louva ahile gamsa te hung punglha jeng ding ahi.
23 Hinlah Pakai na Pathen uvin abonchauva nangho khut a apeh doh ding ahi. Amaho abeikahse uva Pakaijin asuhnoh phah diu ahi.
24 Pakaijin aleng hou nangho khut a apehdoh ding, chuteng nang hon leiset a amin hou na suhmang diu ahi.
25 Chule a milimdoi semthu hou aboncha na halvam peh diu, milimdoi tomna a kimang sum-eng hijongleh khat jeng cha na kilah theilou diu ahi.
26 Na insung'u suboh thei ima nanei theilou diu ahi, achuti louleh amaho banga na kisumang diu ahi. Hitobang thil hoa konna gamna kipan ding chule na kidalse jing diu ahi.