6
Lungthim pumpia kipelut dinga kouna
1 Pakai na Pathen uvin nangho seipeh dinga danthu eipeh hichengse hi ahi. Hiche gamsung nalut tengu leh, najui kimsohkei diu ahi,
2 chutileh nadam sung uva natu nacha teu khang geiya keima eigin jing diu ahi. Pakai thupeh aboncha nanit sohkei uva ahileh, lungmonga naum diu chule na hinkhou jong sot ding ahi.
3 Phatah in ngaiyun, Israel, ajeh chu hichengse hi najui kimsel diu ahi. Chutileh ijakai phachamkim sohkei ding, Pakai, napu napa teu Pathen kitepna banga khoiju le bongnoi lonna gam'a chu nachen diu ahi.
4 O Israel ngaiyun! Pakai hi I-Pathen’u ahi, chule Pakai ama bou ahi.
5 Hijeh chun Pakai le na Pathen'u na lungthim pumpiu le na thanei sunin ngailu uvin.
6 Tunia ka thupeh chengse aboncha chunga kipehna nanei uva najui kimsohkei diu ahi.
7 Hichengse hi na chateu henga avel vel'a na seipeh diu ahi. Inmun'a na umpet u hihen, lam najot pet u hihen, nalup konu hihen, na kithodoh pet u hijongleh, aheng uva na seipeh jing diu ahi.
8 Hichengse chu na khut uva kikhi jingun lang chule na chalpang uva jong nakhi chah jing diu, hitia chu na suhmil lou diu ahi.
9 Na inkot phung uva jong jih unlang chule kelkot mai ajong najih sohkei diu ahi.
10 Ajeh chu Pakai, na Pathen uvin napu napa teu Abraham, Isaac le Jacob henga akitepna gamsunga na puilut vah diu ahitai. Hiche khopi hoa hi ijakai bukimsel, hichu nang hon man beiya namu diu ahi.
11 Insung hoa chu nei leh gou ijakai akilamsa hi ding ahi. Twikul ho jong akilaisa ahin, Olive thingphung le adang hoa konna jong aga naneh diu, hiche ho jouse hi nang hon tulouhel a aga nalo diu ahi. Hiche ho hi naneh tengu leh gamsung pumpi nalodim diu ahitai.
12 Pakai, Egypt gam'a soh a naum laiyuva na huhdoh pau na suhmil louna diuvin chingtheiyun.
13 Nanghon Pakai, na Pathen'u nagin diu chule ama kin jenga na kisah lel diu ahi. Kihahselna nanei ujongleh Pakai min bou napat diu ahi.
14 Na kimvel uva namdang te pathen semthu angsunga na bohkhup lou diu ahi.
15 Ajeh chu nalah uva cheng Pakai na Pathen uhi thangthip Pathen ahi. Ana lunghanna chun leiset chunga konna natol mang jeng theiyu ahi.
16 Nanghon Massah mun'a na patep bang uva Pakai na Pathen'u na patep lou diu ahi.
17 Nanghon Pakai na Pathen'u thupeh phatah a nanit jing diu, Dan jouse najui kim sohkei diu ahi.
18 Pathen mitmua apha jeng bol uvin, chutileh ijakai pha chamkim sohkei ding ahi. Chuteng Pakaijin napu napa teu peh dinga akitepna gampha a chu nalut uva nalo diu ahi.
19 Pakaijin asei bangin, hiche gamsunga na galmi teu aboncha na delmang diu ahi.
20 Khonung le nacha teuvin nahin doh diu, “Hiche dan le thupeh hohi ipi tina hiya Pakai iPathen uvin jabol dinga eithupeh uham?' ahinti diu ahi.
21 Chuteng nang hon hitia hi na donbut diu, 'Keiho Egypt gamsunga Pharaoh soh kana hiu ahi, ahinlah Pakaijin aban thahat a eihin puidoh u ahi.
22 Pakaijin Egypt gamsunga Pharaoh le amite henga thil kidang ijakai akilahsah in, ipu ipateu khanga pat akitepna gamsunga cheng dia eihin puiyu ahi.
23 Pakaijin Egypt gamsunga konna eihin puigal kaiyu ahi, ajeh chu ipu ipateu henga akitepna chu eipeh theina diu ahi.
24 Hijeh achu Pakai iPathen uvin hiche dan thupeh jui ding jouse hi eipeh uva, hichengse ijuikim sohkei uva ahileh ihinkhou sot ding chule imatih chan a phatthei ichan diu ahi. Hichu tuni chan geiya idamnau ahi.
25 Pakai iPathen uvin eithupeh hou ijabol uva ahileh eiho jouse them changa eisim diu ahi.