5
Thupeh som ho
1 Mose’n Israel mite akoukhom in aheng uva aseipeh in, “Israel miten phatah in ngaiyun. Tunin Dan thupeh chengse hi jasohkeiyun, kihilnan neiyun lang najui kimsohkei diu ahi!
2 Pakai I-Pathen uvin Sinai Mol a kimaiton kitepna eisempi tauvin ahi.
3 Pakaijin hiche kitepna hi ipu-ipateu toh asem ahipon, amavang tunikhoa eiho toh asem ahi.
4 Mol achun Pakaijin kimaiton meikong lailunga konin nangho na houlimpi uvin ahi.
5 Nangho leh Pakai kah a keima ka dinge, ajeh chu nang hon meikong nakicha uvin mol chu na nailut ngam tapouve. Pakaijin kaheng'a thu aseijin, athusei doh aboncha nangho kapeson in ahi. Pakai thuseidoh chu hiche hi ahi:
6 Keima Pakai na Pathen kahin, Egypt gam'a soh a konna na huhdoh pau chu kahi.
7 Kei tailou pathen dang nanei lou diu ahi.
8 Nang hon nangho dinga lim semthu, itobang lim a hijongleh van le leiset chule twikhanglen sunga nanei theilou diu ahi.
9 Hitobang lim semthu ho angsunga chu naboh khup uva nahou louhel diu ahi. Ajeh chu keima Pakai na Pathen u kahin, pathen dang semthua konna thangtomji kahi, hiche chonsetna chu na chateu khang geiya pap kalhunsah ding; keima ei pam pai insung pumpi chunga, khangthum leh li chan geiya lethuhna ka lhunsah ding ahi.
10 Hinlah ka thupeh nit a keima eingailu jing ho chunga, akhang akhanga ngailutna kalhunsah ding ahi.
11 Pakai na Pathen min na suhboh louhel diu ahi. Koi hileh Pakai min suboh chan chu ngaidam chang louding ahi.
12 Pakai na Pathen thupeh banga Sabbath nikhotheng chu nanit jing diu ahi.
13 Natohna ding nigup naneiyun ahi,
14 hinlah nisagi lhinni Sabbath nikho hi Pakai na Pathen dinga kicholdona nikho theng ahi. Hiche nikhoa hi koima chan insung natoh abol theilou ding ahi. Hiche hi nangho nahiuvin, na chapa teu le na chanu teu, nasoh pasal ho le numei hou, bongchal ho leh sa-ngan ho chule na gancha jouse jaona, chule gamdang mi nalah uva hung cheng ho jaona hi ding ahi. Nangma banga nasoh numeiho le pasal ho jong kichol diu ahi.
15 Hiche hi nasuhmil lou diu ahi, khatvei chu Egypt gamsunga soh a um nahiuvin, hinlah Pakai na Pathen uvin aban thahat pan a nahin puidoh u ahi. Hiche jeh a chu Pakai na Pathen uvin Sabbath nikhoa na kichol diuva thupeh anei ahi.
16 Pakai na Pathen thupeh bangin nanu, napa jabol un. Chutileh Pakai, Pathen'in napeh nau gamsunga na hinkhou sot ding ahi.
17 Toltha nabol lou diu ahi.
18 Jonthanhoi nabol lou diu ahi.
19 Guchat nabol lou diu ahi.
20 Naheng nakom douna hettohsah a napan lou diu ahi.
21 Naheng nakompa ji na deichat lou diu ahi. Chule naheng nakompa in ahilouleh gam na deichat lou diu, asoh numei hihen pasal hijongleh, abongchal hihen asangan hijongleh, naheng nakompa nei ipi dang hijongleh na deichat lou diu ahi.
22 Hichengse hi Mol bul'a na kikhop lai uva Pakaijin aseidohsa ahitai. Meibol le muthim in atomna sunga meikong lailunga pat osangtah a Aman aseidoh ahi. Hiche aseidoh ho chu aboncha songpheng nia ajihlut a keima eipeh ahi.
23 “Ahin nanghon muthim lah a konna a awgin najah uva, mol chu meikong kongjeju a aum pet chun na phung lamkaihou le upaho kaheng'a ahung uvin ahi.
24 Ama hon asei uvin, 'Veuvin! Pakai i-Pathen uvin aloupina le aletna eimusah uvin, chule meikong lailunga konin a awgin kajauve. Tunin Pathenin mihem keiho jah a thu aseije ti kamu uvin, chule keiho kahing nalai uve!
25 Tunvang ipi dinga thi ikichat kit diu ham? Pakai I-Pathen uvin iheng uva thu asei kit a ahileh, thinan eilhun den uva meikonga iki govam jeng theiyu ahi.
26 Haina hu neiya hing itobang hijongleh, eiho banga hingjing Pathen awgin ja a thi louva hing thei aum dem?
27 Nangho cheuvin lang Pakai I-Pathen uvin ipi asei em ga ngai tauvin. Chuteng hung kile kit unlang Pakaijin ipi asei em ti kaheng uva hung seiyun, keihon kangai uva kajui diu ahi.'
28 Keima henga na ngeh chan’u Pakaijin ajasoh tan ahi. Pakaijin hiti hin aseiye, 'Mipi hon nangma henga ipi asei uvem ti keiman ka hesoh keiyin, chule ama hon thudih aseiyu ahi.
29 Oh, hitia hi ama hon lung ngaichatna anei jing diu chule hiche banga chu ama hon keima eigin jing diu, ka thupeh jong anit jing diu ahi! Hitia chu achon jing uva ahileh, amaho leh achilhah teu chan geiya phatthei chang jing diu ahi.
30 Chen lang aheng uva gasei tan, “Na ponbuh cheh uva kile tauvin.”
31 Hinlah nangma hiche mun'a hin ding den nalaiyin chonna dan thupeh aboncha ka seipeh ding nahi. Chule hichengse hi aboncha mipi ho henga na seipeh ding chutileh ama hon achen nau gamsunga chu gouva anei diu ahi.'”
32 Chuin Mose’n mipi ho henga aseijin, “Nang hon chingthei tah in Pakai na Pathen thupeh aboncha jui ding go uvin.
33 Pakai na Pathen uvin na thupeh nau lampi chu jui jing uvin. Chutileh nalut uva nalona diu gamsunga hinkho sot tah nachen thei diu na phatthei diu ahi.