4
Mose’n thunung ahina diuva Israel ahilchah
1 Ahile tun, Israel, chinthei tah in thupeh le danthu kahil ding hou hi phatah in ngaiyun. Pakai na Pathen uvin napu, napa teu khanga pat napeh nau gam nalhun theina diu le agama nachen theina diuvin jabol'un.
2 Ka thupeh ho ima lahdoh le koibe bol hih uvin. Pakai na Pathen thupeh chengse chu jabol jengun.
3 Baal-peor mun'a Pakaijin nangho dinga ipi abol chu namu sohkeiyun ahi. Hiche mun'a chun Pakai na Pathen uvin Baal, Peor pathen hou jouse abonchan asugam sohkeiye.
4 Hinlah Pakai na Pathen uva kitah jouse tuni chanin nadam nalaiyun ahi.
5 Vetan, Pakai, ka Pathen a konna jui ding dan hichengse hi nangho dinga thupeh ahi. Ajeh chu hichengse hi gamsung nalut tengu leh phatah a najui kimsohkei diu ahi.
6 Hichengse hi najui uva ahileh, na kimvel uva cheng namdang te sanga athem leh achinga naum diu ahi. Hitobang nun le khan ahin jahdoh tengu leh, 'Itobanga hiche nam lentah te hi chinga dengchang'u hitam! ati diu ahi.
7 Ajeh chu nam len te pathen akom cha uva aum banga Pakai eiho Pathen ama chu ikou teng einai jeng theiyu tobang namdang ten anei khah ngai em?
8 Hitobanga chu keiman jong na masang uva ka koipeh danthu hijatpi hi, kicheh tah a ka koipeh bang uva koi dang nam in hitobang anei khah ngai em?
9 “Ahinlah veuvin! Nanghon namit tah uva namu uva chun chintheiyun. Hiche hi na damsung uva nalungthim uva konna na kiselmang sah lou diu ahi! Na chateu leh na natu teu chan geiya hilson teiyun.
10 Chule Sinai Mol a Pakai na Pathen'u masanga nadin nikhou chu sumil hihbeh un, chua chun kaheng'a aseijin, 'Mipi ho abonchan kaheng'a hin kouvin, chule Keiman ka tahsa tah a kahil diu ahi. Chutileh ama hon ahinkho uva keima gin ding dan ajil diu, chule amahon achateu jong ahil uva eigin diu ahi.'
11 “Nangho nahung nai uvin chule Mol bul'a nahung din uchun Mol'a konin meikong vanthamjol langa akikho touvin ahi. Mol chu meibol vom nasatah in atomlha tan ha thimin athim tai.
12 Chuin Pakaijin meikong lailunga konin najah uva thu ahin seitan ahi. Nang hon agin naja uvin ahin alim namu pouvin; ogin bou ahi.
13 Aman kitepna asemin—Thupeh som— nanit jing diuva thupeh, chule songpheng ni chunga ajihdoh in ahi.
14 Hiche phat chu ahi Pakaijin eithupeh a nangho kahilson uva chutengleh nang hon gamsung nalut uva nalo tengu leh a danthu najui uva na jabol diu ahi.
Milim hou thudol'a gihna
15 Hijeh chun nangho ching theiyun! Sinai Mol a Pakaijin meikong lailunga pat najah uva thu asei nikho chun nang hon tahmel in namu pouve.
16 Hijeh chun nang hon milim doi itobang lim'a kisem—numei ahilouleh pasal mel a kisem,
17 gancha hihen chungleng vacha hijongleh,
18 tol-lhang lah a ganhing hihen, twipi thuhpen noiya um nga lim'a kisem hijongleh a angsunga na bohkhup lou diu ahi.
19 Chule chunglang navet teng nisa, lha, le ahsite chule vanthamjola thil ho jong bohkhup a akin bol ding na ngaito louhel diu ahi. Hichengse khu aboncha Pakai, Pathen'in leiset a cheng mihemte apeh ahi.
20 Ajeh chu nangho hi Pakaijin Egypt gamsung meilhum lah a kiloidoh a deitum mong mong dinga tunia hi nasemu ahin, hichu nasuhmil lou diu ahi.
21 Hinlah nangho jeh in Pakai ka chunga alunghang tai. Aman kitepna asemin chutobanga gam pha Pakai na Pathen uvin gou hoitah a napehna uva khu lutthei louva keima Jordan vadung galkai louding kahi tai.
22 Hihe gam lo dinga Jordan na galkai diu, ahin keima kahung galkai louding ahi. Keima vang hiche solam vadung a hi thiden ding kahitai.
23 Hijeh chun chingthei un Pakai na Pathen uvin kitepna napeh hou sukeh hihbeh un. Itobang lim'a hijongleh pathen lim semthu ding gohih un, ajeh chu Pakai na Pathen dinga doumah umtah ahi.
24 Pakai na Pathen hi mi sumang meikong ahin; Ama hi Pathen thangthip ahi.
25 Ahunglhung ding phat hoa, tu le cha nahin neiyuva gamsunga na hung chen tengu leh, milim doi kiti sema a-angsunga na bohkhup louhel diu ahi. Hitobang thil hi Pakai na Pathen'u mitmu dinga phalou le lunghan sahna ahi.
26 Tunia van leh leiset kakou hi nangho hettohsahna ding ahi. Ka kitepna na suhkeh uva ahileh, Jordan vadung galkaiya gamsung nalo uhi hetman louva na manthah jeng diu ahi. Chumun'a chu chomcha bou nachen diu; chuteng na kisumang diu ahi.
27 Ajeh chu namdang te lah a naki thecheh uva, themcha bou nahoidoh diu ahi.
28 Chu a, gamdang mite gamsunga, song le thinga milim kisemthu—pathen khomulou, khojalou, netheilou le ima nam jalou chu nahou diu ahi.
29 Hinlah chu a konna Pakai na Pathen'u nahin hol kit diu ahi. Chule nalungthim pumpiuva nahin hol tengu leh, namu bep diu ahi.
30 Ahunglhung ding phat hoa, hitobang din mun'a naum uva gim genthei nan nalhun den tengu leh, Pakai na Pathen angsung nahin bel diu, chule athusei jouse na ngai diu ahi.
31 Ajeh chu na Pakai na Pathen uhi khotona dim Pathen ahin; napu napa teu khang apat akitepna ageldoh jingin Aman na nuse pouvin tin na sumang pouvinte ahilouleh na suhmil lou diu ahi.
Pathen khat seh ahi
32 “Tun leiset ahung kisem apat tuchana Pathen'in ichan geiya mihemte akhohsah ham, ti thusim le vanthamjol'a ijakai jouse kholdoh uvin. Hitobang thil kidang ho hi najah a namu khah uvem?
33 Nanghon meikonga Pathen akilah a, awgin najah bang uva namdang ten hitobang thil kidang atokhah tah uvem?
34 Pathen dangin nampi khat gim hesohna a kon apuidoh a, thil kidang ijakai aki lahsah gal asat peh, ban thahat pan a kithopina, kidang tah a na atohna um kha tam? Ahinlah nangho Pakai na Pathen uvin Egypt gam'a naum lai uva anatoh ijakai namu sohkei tauvin ahi.
35 Aman ijakai na muchen sah tauvin hiche a konna na hetdoh diu chu Pakai chu Pathen ahin ama tobang adang umlou ahi.
36 Pakaijin van'a kon'in awgin na jahsah uvin, thupeh ijakai aneijin ahi. Pakai meikonga akilah in nangho na houpi uvin ahi.
37 Ajeh chu Pakaijin napu napa teu angailun chule achilhah te chan gei phatthei aboh ahi. Pakaijin aban thahat apan in, Egypt gam'a konna nahin pui galkaiyu ahitai.
38 Nangho dingin namdang te gamla tah in achon doh in, Pakaijin nangho chenna ding gamnom tah na peuvin, tunin na cheng tauvin ahi.
39 Hijeh a chu hiche hi na geldoh jing diu leh na lungthim uva na chin jing diu ahi: Pakai hi van'a jong leiset a jong Pathen ahin, ama tobang dang aumpoi.
40 Tunia ka thupeh chengse aboncha na juikim sohkeiyuva ahileh, ijakai pha chamkim sohkei ding na chateu chan geiya phatthei chang diu ahi. Imatih chana gamsunga kipah leh lungmonga nachen diu, na hinkhou asotna dinga Keiman thupeh hichengse hi phat jousea dinga kapeh nahiuve.”
Solam'a Bitna khopi ho
41 Chuin Mose’n solam Jordan Vadunga khopi thum asepkhen in ahi.
42 Koi hileh kitomona masa umlouva mikhat in midang khat atha khah a ahileh, ahoidohna dinga hiche mun a chu jamlut ding ahi.
43 Khopi thum ho chu: Reuben phunga dinga gamthip noiya Bezer khopi; Gad phunga dinga Gilead gamsunga Ramoth khopi; Manasseh phunga dinga Bashan sunga Golan khopi hi ding ahi.
Pathen danthua kihilna
44 Thupeh hichengse hi Mose’n Israel mite henga aseipeh ahi.
45 Hichengse hi danthu jui ding’a Mose’n Israel miten Egypt gam adalhah uva apeh,
46 Beth-peor toh kinai solam Jordan vadung phaicham ngahmun aum laiyuva apeh ahi. (Phat masa chun hiche gam hi Amor mite Lengpa Sihon in Heshbon mun'a konna ana vaipoh ahi. Hinlah Egypt gam'a konna Mose leh Israel mite ahung doh uchun ana sugam hel tauvin ahi.
47 Chuin Israel miten Bashan lengpa Og lalna gam leh anei agou jouse achom chai keiyuvin, solama Amor mite leng teni jaona ahi.
48 Israel miten Aroer apat Arnon Vakom chule Sirion mol Hermon tia jong kihe chan geiyin ajousoh hel tauve.
49 Chuin ama hon solam gamkai Jordan vadung pang leh Twipi Thi chan geiyin ajousoh uvin, Pisgah noilam chan gei ahi.)