3
Og chunga galjona
1 Chuban in Bashan lam jonin ikitol uvin, hiche Edrei mun'a chun Og lengpa le agalsat mihon eino khum uvin ahi.
2 Hinlah Pakaijin kaheng'a aseijin, ‘Ama chu kicha hih un, ajeh chu keiman Og lengpa le agalsat ho chunga galjona kapeh diu ahin, chule agam jouse jong kapeh ding nahiuve. Hesbon gamvaipo Amor mite Sihon Lengpa nabolna bang bang uvin bol'un,' ati.
3 Chuin Pakai, Pathen'in Og lengpa le amite abonchan eiho khut a apedoh in, amaho chu ithatgam keiyuvin ahi. Mihem khatcha jeng jong ahing tapoi.
4 Alalna khopi somgup ijousohkei tauvin—hichu Argob gamkai Bashan lenggam pumpi ahi. Khopi khat jeng cha jong asohcha tapoi.
5 Hiche khopi ho jouse chu akimvel aboncha pal phatah a kigen le kelkot phatah a kisem sohkei ahi. Chule kho phabep akimvel'a pal kigen lou jong ilo tauvin ahi.
6 Hesbon lengpa Sihon isuhgam bang uvin, Bashan lenggam pumpi jong abonchan ijousoh hel tauvin ahi. Khopi tin’a mihem jouse —numei, pasal le chapang ithat sohkei uvin ahi.
7 Khopi jousea gancha ho ihinghoi uvin, thil ijakai manlu jouse jong ichom tauvin ahi.
8 Amor mite lengpa lalna gam lhumlam Jordan vadung jong ilo’uvin, hichu Arnon Gorge apat Hermon molsang chan gei ahi.
9 (Sidon mite chun Hermon molsang chu Sirion tin akou un chule Amor miten Senir tin akou uve.)
10 Tun eihon Gilead le Bashan gamkai pumpi ijousoh tauvin, Og lengpa gamvai pohna Salecah le Edrei chan geiyin ijousoh hel tauvin ahi.
11 (Bashan lengpa Og chu Rephaim mite dinga leng nukhah pen ahitan. Alupna chu thih a kisem ahin, chule asan dan adung feet som le thum, availam letdan feet gup alhing in ahi. Hiche lengpa lim hi Ammon mite khopi Rabbah mun'a aum nalayin ahi.)
Jordan solam gam kihop
12 Hiche gam pumpi chu ilo tauvin ahileh, keiman Reuben le Gad insung adingin Aroer apat Arnon Gorge chan gei in chule Gilead gam kehkhat le khopi phabep jaonan kapedoh tan ahi.
13 Manasseh chilhah te dingin Gilead gam kehkhat le Bashan gam pumpi—Og lengpa lalna masa gam chu—Manasseh phung kehkhat ho ka pedoh tan ahi. (Hiche hi Bashan gam Argob gamkai pumpi hi Rephaim te gam'a kihe ahi.
14 Manasseh insunga lamkai amin Jair, ama hin Bashan, Argob gamkai pumpi ajousoh hel in, Geshur mite le Maacah mite gamgi chan gei ahi. Jair chun hiche gam chu ama min aputsah in, Jair Khopi ho asah tan, tuni chanin akihe jing na laiyin ahi.)
15 Keiman Gilead chu Makir phung kapedoh tai.
16 Chule keiman Reuben le Gad phung a dingin Gilead gam phabep jong kapen ahi. Arnon Vakom lhanglam lailung apat Ammon mite chenna Jabbok vadung chan ahi.
17 Jordan phaicham, Galilee dillen apat Twi thi dillen chan, Jordan Vadung chu lhumlam gamgi in apang'e. Solam langa din Pisgah lhaang chu ahi.
18 Hiche phatlai chun keiman ama phung cheh chu lhumlam Jordan a cheng dingin thupeh ka neiyin ahi: Hiche gam pumpi hi Pakai na Pathen uvin nangho gou dia napeh sau hijongleh, na galsat hou chu Jordan galkai uva gal manchah toh amaho khel dia gonsa a um diu ahi.
19 Chule najiteu, nachateu chule na gancha jouseu keiman kapeh nau khopi hoa um diu ahi.
20 Pakaijin nang ho banga Israel mite jouse dinga venbitna napeh uva chule agam nalo teng ule Pakai na Pathen uvin Jordan Vadung galkai chan apeh tengu leh, naboncha uva Keiman kapehna gam a chu nakile diu ahi.'
Mose’n gam achotlut ding kikham
21 “Hiche phat chun Keiman Joshua hiche mopohna hi kapen: Nanghon hiche leng teni chunga Pakai na Pathen natoh abonchan namusoh tauve. Aman Jordan lhumlam lenggam ho a chutobang bang abol ding ahi.
22 Chu a nam ho khu kicha hih in, Pakai na Pathenin nangma dinga gal asat ding ahi.” ati.
23 “Chuin keima Pakai henga katao vin hiti hin kaseiye,
24 'O Thanei chungnung Pakai, nangman keima nasohpa henga naban thahat naki lahsah in ka musoh tai. Koiham pathen dang van leh leiset a hitobang thil kidang bol thei ding?
25 Nalung ahileh, Jordan hi nei galkai sah inlang, gamhoi tah Lebanon molsang ho nei musah tan,” kati.
26 “Hinlah nangho jeh in Pakai kaheng'a alunghang tan, ka taona angaisah tapoi. Chuin aman aseijin, 'Hichu aphatai! Imadang seibeda tan,' ati.
27 Pisgah Molvum'a kaltouvin lang, sim le mal sah le lhang gave tan. Phatah in ven, amavang Jordan vadung na galkai louding ahi.
28 Nangma khel in, Joshua tilkhouvin lang suhat in chule thaneina petan, ajeh chu Joshua in mipi aboncha Jordan agalkaipi ding ahi. Masanga namusa gam jouse aboncha aman alo diuva mipi apeh ding ahi,” ati.
29 Chuin Beth-peor kom'a phaicham achun ium tauvin ahi.