2
Gamthip noiya kum phabep
1 Chuin gamthip lang jondin ikiheiyun Twipisan lam jonin icheuvin, Pakaijin eiseipeh bangin, Seir molsang lama chun phat sottah lungdong in ivahle leuvin ahi.
2 Hichun Pakaijin hiti hin eiseipeh in,
3 'Nangho gamthip lah a lungdong in naum sot lheh tauve; sahlam gamkai mano tauvin.
4 Thupeh hichengse hi mipi henga seiyin: “Nanghon na sopiu Esau chilhah Edom mite chenna Seir mun na jotpa diu ahi. Edom mite chu kichat nan alhun den theiju ahi, ching theiyun.”
5 Aheng uva ima na ngeh lou diu ahi. Ajeh chu keiman Seir gam jouse amaho kapeh ahitan, nangho gambeh neocha jong na kipe theilou diu ahi.
6 An leh twi na ngaichat uva ahileh, aman napeh uva na kichoh cheh diu ahi.
7 Ajeh chu Pakai na Pathen uvin nabol natoh jouseu phatthei abohtai. Aman gamthip noiya kal nason chan geiyuva pat ave lhi jinge. Kum somli sungin Pakai na Pathen uvin ima lhasam louvin na umpiuve.
8 Chuin Esau chilhah ho chenna Seir mun igalkai uvin ahi. Arabah phaicham kiti Elath le Ezion-geber akon hungna lampi vang ipeldoh uvin ahi.
Hiti chun sahlam nelgam lam juiyin Moab lam ino tauvin ahi.
9 Chuin Pakaijin eigih uvin, “Lot chilhah Moab mite na suhgim lou diu, gal jong nabol khum louhel diu ahi. amaho gou dia Ar kapeh ahitan, amaho gambeh neokhat jong nangho kapeh theilou diu ahi.'”
10 (Mihat Emim mite chu Ar mun'a ana cheng kha uvin ahi. Amaho chu asang thei un chule atha ujong ahat in Anak mite tobang chu ahiuve.
11 Emim te le Anak ho chu Rephaim tinjong akiheuvin, Moab miten vang Emim tin akou un ahi.
12 Masang chun Hor mite chu Seir mun'a ana cheng uvin, hinlah amaho chu Esau chilhah teho toh gal ana kibol uvin, Hor mite chu ana jamdoh tauvin ahi. Israel miten Canaan mite adel gam uva agam pumpi Pakaijin apeh tobang’u ahi.)
13 Mose’n aseijomin, ‘Chuin Pakaijin iheng uva aseiye, 'Kipatdoh un. Zered lui galkaiyun,' ati. Chuin igalkai tauvin ahi.
14 “Kadesh barnea ihin dalhah uva kipat Zered Luidung ilhun chan uvin kum somthum le get achetai! Pakaijin hunglhung dia atep bangin pasal galsat thei jouse gamthip lah a athigam tauvin ahi.
15 Pakaijin asuhmanghel kahseuvin, amaho chu adou in ahi.”
16 “Galbol thei pasal jouse athi gam phat chun,
17 Pakaijin kaheng'a aseijin,
18 Tunia hi Ar mun'a Moab gamgi na galkai diu
19 chule Lot chilhah, Ammon mite chenna nalut diu ahi. Hinlah amaho na suhgim lou diu gal jong nabol khum lou diu ahi. Hiche gam hi Ammon mite kapeh ahitan, agam hi nang ho kapeh thei louding ahitai.”
20 (Hiche gam chu Rephaim mite gam'a ana kihe ahin, Ammon miten vang Zamzummim mite tin akou uve.
21 Amaho jong chu asang thei un chule athau ahat thei uvin Anak mite tobang ahiuve. Hinlah Pakaijin amaho chu asugamhel tauvin ahileh Ammon miten agam alo tauve.
22 Pakaijin Seir mun'a Esau chilhah te dinga na atoh bang bangin abol in chule Hor mite asugam in ahileh hiche mun'a chun amaho acheng tauvin ahi. Hijeh chun Esau chilhah te tuni chan geiyin hiche mun achun acheng tauvin ahi.
23 Hiche tobang hin Crete apat Caphtorit mite chunga thilsoh ana lhungin, Avvit mite chu anasu-gam hel uvin, amaho chu Gaza gamkol kho ho a cheng anahiuve. )
24 Mose’n aseijom nalaijin, “Chuti chun Pakaijin aseiye, 'Tun kipatdoh tauvin! Arnon Vakom galkai uvin. Veuvin, Keiman nakhut uva Amor mi Sihon, Hesbon lengpa kapeh doh ding, chule agam pumpi kapeh diu ahi. Nokhum uvin lang agam khu lo tauvin.
25 Tu nikhoa kipat nangho jeh a agam a cheng mihem te chunga tijatna kalhun sah ding ahi. Nachung changu thulhut ahin jah doh tengu leh kichat nan alhun den diu ahi.”
Sihon chunga galjona
26 Mose’n aseikit in, ‘Kademoth gamthip apat Heshbon lengpa Sihon henga chamna thuseiyin palai khat kasol in:
27 'Na gamsung ka jotpa diu ahi. Lampi jeng kajot diu chule akimvel lah kahopa lou diu ahi.
28 Anneh ding le twidon ding neipe uvin, hichu aman kapeh diu ahi. Thil ijakai chung chona kangai chat pipen uchu ahileh nagam ka jotpa uva kagal kai diu hi ahi.
29 Seir mun'a Esau chilhah ten agam kajotpa uva ka galkaina diu eiphal peh uvin, hiche tobang chun Ar mun'a cheng Moab mite jengin jong abol uvin ahi. Hijeh chun Pakai ka Pathen uvin eipeh nau gam Jordan vadung ka galkai theina diuvin na gamsung nei jotsah tauvin,' katiuve.
30 Hinlah Heshbon mun'a Sihon lengpan agamsung hopa ding chu anom tapoi, ajeh chu Pakai na Pathen'in Sihon lengpa lungthim chu asutah in chule Pakaijin eiki thopi uvin ahileh galjona chu eipe tauve.
31 Chuin Pakaijin hiti hin aseijin, 'Vetan, Keiman Sihon Lengpa leh agam leiset na khut uva kapeh doh pan ahitai. Tun kipan uvin agam pumpi lo dingin kon tauvin,' ati.
32 Chuin Sihon Lengpan eiho chunga gal bol dingin Jahaz mun'ah kholhang asamtai.
33 Ahinlah Pakai I-Pathen uvin eiho khut a apedoh tan ahileh, achapa te, chule amite jouse isatgam hel tauvin ahi.
34 Akhopi jouse leh amite jouse abonchan ithat gam hel tauvin—pasal, numei, le chapang jaona ahi. Mihem khat a khat cha jeng jong asohcha tapon ahi.
35 Khopi sunga gancha jouse abonchan ichom tauvin chule thil ijakai manlu jouse jong ichang tauvin ahi.
36 Pakai I-Pathen uvin eipanpi uvin ahileh Aroer kiti Arnon Vakom, Gorge khopi chule agam pumpi Gilead chan geiyin abonchan ijousoh hel tauvin ahi. Eiho dingin baang lhou tah neiya khopi aumpoi.
37 Ijeh inem itileh, Ammon mite gam dalhan Jabbok vadung chule gamsunga khopi ho— Pakai I-Pathen thupeh bang banga idalhah jal’u ahi.