Mose Lekhabu Ngana
DANBU NINA
Danbu nina sung thu umdan
Hiche lekhabua kon hin thohgimna, patepna, lung opkaina, kitepna, kinepna leh tahsanna hichengse mudoh in aum'in ahi. Tahsan kiti hi acham'a thilsem banga semthu thei ahipoi, ti vetsahna chule tahsan kiti hi mimal tompanna leh Pathen mingailut kiguijopna akon bou ahi.
Danbua kon hin Israel te Canaan gam jon a Jordan vadung agalkai nau ahilchen in, Mose’n mipi henga aseijin, Egypt gamsunga thil kidang tah tah Pakaijin akilah sah ho ageldoh sah sohkei uve. Mose chun Pathen thangvahna jeng aseijin, Pathen'in ichan geiya amite akhohsah a chule ahuhdoh ham, ti thudol jong aseijin ahi. Hichea kon hin Pakaijin genthei te, meithai, chaga khohsahna nasatah aneiye, ti muchet ahi.
Lekhabu jihpa, akijih kum chule akijih lona
Danbu hi Mose’n 1406 BC kum'a ana jih ahi. Chule Danbu Lekhabu hin Israel te Canaan gam alut kon uva thil umdan ho aseijin, Mose chun Israel mite chu milim semthu ahou nauva konna akiheimangna diuvin temna aneijin, apu apateu khanga Pathen toh kitepna chu athah beh in alah uva akilahsah in ahi.
1
Mose’n Pathen thupeh banga ahilchah
1 Mose’n thu hichengse hi Israel mite solam Jordan vadung gamthip noiya aum pet uva aseipeh u ahi. Amaho Jordan phaicham langkhat a Paran aumin, langkhat a Tophel, Laban, Hazeroth le Di-zahab aumin, akikah a Suph kom'a abusa uve.
2 Sinai molsang apat Kadesh-barnea chan chu angaiya banga nisom le khat kenglam ahin, chule Seir molsang kijotpa ahi.
3 Ahinlah Israel ten Egypt gamsung ahin dalhah kal'u kum somli jou, lhasom le lhakhat lhinna nikho masapen ni'n, Mose'n Israel mipi ho henga, sei dia Pakaijin athupeh ho chu abonchan asei tan ahi.
4 Amor mi Leng Sihon in Heshbon avaipoh lai, chule Bashan Lengpa Og in Ashtaroth avaipoh laiya Edrei mun a ajo jouva asei ahi.
5 Israel mite Moab gam Jordan vadung solam'a aum pet uvin, Pakai thupeh ho chu Mose’n jong chingthei tah in bannei chan ahilchen in ahi.
Sinai dalhah dinga thupeh
6 “Sinai molsanga ium laiyun Pakai I-Pathen uvin eiho dingin aseijin, 'Hiche Mol ahin naum sot tauve.
7 Tua hi ngahmun phetlhah a chule kitol phat ahitai. Amor mite chenna thinglhang gam chule akinaipi lhaang ho le Jordan phaicham, thinglhang gam, lhumlam gam ho, Negev, chule twikhanglen panga phaicham ho a gache uvin. Canaan mite gam chule Lebanon, chule Euphrate Vadung chan geijin cheuvin.
8 Vetan, Keiman hiche gam leiset jouse hi nangho kapeh nahiuve! Cheuvin lang galo uvin, ajeh chu Pakaijin napu napa teu Abraham, Isaac chule Jacob chule achilhah te jouseu lodinga akihahselna gam ahi,” ati.
Mose'n ama phung cheh lamkai alhendoh
9 Mose’n aseijom'in, “Hiche phatlai chun kana seiyin, 'Nangho jouse chunga kavaihomna pohgih hi keima din alen behseh jeng tai.
10 Pakai na Pathen'in na punsah uvin, ahsi jat in na semdoh tauve!
11 Chule napu napa khanga pat Pakai na Pathen chun asang sang'in napunbe sah uhen, akitepna bangin phatthei naboh uhen!
12 Nangho vetsui hi abai tapoi! Naboina hou le na kinahna hou iti kachanga ka suhlhap jou ding ham?
13 Hijeh chun ama ama insung kaiya kon'in miching le thu hethem upa jana chang phabep lheng doh uvin, keiman amaho chu nangho lamkaiya ka pansah ding ahi.' tin kana seijin ahi.
14 Chuin nei donbut uvin, ‘Na thilgon hi aphalheh jenge,' natiuvin ahi.
15 Keiman upa ching le thil hethem phabep ama insung kaiya konna na lhendoh hou chu nangho thutan vaihom dinga ka pansah ahi. Mi phabep chu mi asang chunga, mi jakhat chunga, mi somnga chunga chule mi som chunga dinga vaihom din apangun ahi.
16 “Hichun keiman thutan vaihom ho henga ka seiyin, ‘Nanghon na sopiu Israel mite le gamdang mi nalah uva hung cheng hoa konna thutan ding nahin mudoh diu ahi. Na dinmun cheh uva dettah in pang cheh uvin
17 chule thutanna hoa sihneina ima nei hihhel uvin. Ahao hihen avai ho chung hijongleh thutan ding chu phatah in kholchil sohkeiyun. Mi khattou lunghan jeh in kicha hih uvin, ajeh chu adih e tia thu natan uchu Pathen dei ahi. Amavang thutan ding ahahsa behseh aum leh keima henga hin lhut uvin, keiman hichu katan ding ahi.'
18 Hichun keiman ijakai bol ding jouse naheng uva ka seipeh sohkeiyun ahi.
Gamvelhi hon gam aga kholchil'u
19 Chuti chun, Pakai I-Pathen uvin eithupeh bangun, Sinai Mol dalhan tijat umtah gamthip noiya ikitol uvin, Amor mite chenna lam ijon tauvin ahi. Kadesh-barnea ilhun uchun,
20 najah uva kaseijin, ‘Tun nangho Amor mite chenna gam Pakai I-Pathen'in eipeh nau gam ilhung tauvin ahi.
21 Veuvin! Pakaijin na masang lam uva gam nakoi peh tauvin ahi. Cheuvin lang galo tauvin ajeh chu Pakai, napu na pate Pathen chun nangho dinga kitepna anei ahi. Kicha hih uvin! Lungthoi hih un!'” ati.
22 “Ahinlah nabon'un kaheng'a nahung sei uvin, ‘Amasan, agam kholchil dingin mi sol masaute. Ama hon hoiche lampia iche uva, hoiche khopi a ilut diu chu aphapen dia eithumop diu ahi,'” natiuve.
23 “Hichu keiya din geldan phatah ahin, hijeh chun gam velhi ding mi som le ni ka lhengdoh in, ama ama insung kailhah a konna mikhat cheh ahiuve.
24 Amaho gamthip lama chun achepeh uvin chule Eshcol phaicham alhungun akholle tauvin ahi.
25 Ama hon agam gasoh phabep ahinpo uvin ahi. Chule ama hon thu ahinlhut un, 'Pakai, Pathen'in eipeh nau gam khu tahbeh in apha lheh jenge'” atiuvin ahi.
Pakai douna a Israel phunchelna
26 Ahinlah nang hon Pakai, na Pathen'u thupeh nadeh uvin agamsunga che ding nanom pouve.
27 Na ponbuh sung uva na kiphin'un nasei uvin, ‘Pakaijin eimudau hinte. Hijeh a chu Amor mite khut a pehdoh a satchen sah ding bep a Egypt gam apat eihin puidoh u ahi.
28 Hoiya iche diu hitam? Isopi hou hin thulhut chun ima ihilou u akihe tai. ‘Agam mite khu eiho sang'in asangjo uvin chule eiho sangin athahatjo uve, chule akhopi hou alen theijin, khopi bang hon jong vanthamjol aphai! Hiche gam achun keihon Anak chilhah milentah ho chu kahin mu uve!’ ” atiuve.
29 Ahinlah keiman nangho ka seipeh uvin, ‘Amaho jeh chun tija hih un chule ki jong kicha hih un!
30 Na masang uva Pakai na Pathen'u achenai. Egypt gam'a athilbol namu bang uva Pakaijin nangho dinga gal asat ding ahi.
31 Mipan acha akhohsah bangin Pakai na Pathen uvin najot nau gamthip noiya iti nahinpui u namu tauve. Tua hi Aman hilai mun'a hi nahin pui u ahi.'
32 Ahinlah hichan geiya anatoh jouvin, nang hon Pakai na Pathen'u na tahsan hih laiyuve,
33 ama chu na masang lam uva achen munpha laipen achun ngahmun asemin, janteng meivah khoma naveng jiuvin chule sunteng meibol khoma na lhonpi jiuvin ahi.’
34 Pakaijin na phunchelna hou ahin jadoh tan ahileh, alunghang lheh jeng tan ahi. Aman lungtheng tah in kitepna aneijin,
35 'Nang ho khanga gilou miten napu napa teu khanga pat peh dinga katepsa gam khu mu dinga hing nalai naum louhel diu,
36 Jephunneh chapa Caleb bouvin amu ding ahi. Aman hiche gam hi amu ding ahi ajeh chu lunglha louva Pakai thupeh juijing ahi. Ama le achilhah ten hiche gam sung phabep masanga agamu masat bang uva alo diu ahi.
37 Nangho jeh in keima chung jenga jong Pakai alung phamo tai. Aman aseijin, “Mose, nangma jeng jong Gamtep Gam nalut louding ahi!”
38 Nangma khela, Nun chapa Joshua chun, mipi aboncha gamsung chan a alamkai ding ahi. Ama chu tilkhouvin, ajeh chu aman Israel miten alodiu gamsung chan a alamkai ding ahitai.
39 Keiman gam khu na chate kho hepha loulai ho ka chensah ding ahi. Ajeh chu ama hon eimat gam diu ahi tin na kichauve, hinlah ama hon alo diu ahi.
40 Tun nangho kileuvin gamthip jotpeh un, Twipi San lam jonin che tauvin.
41 “Chule na chonset phong uvin, 'Pakai douna a chonse kahi tauve! Pakai ka Pathen uvin eithupeh bang uva, gamsunga khu kache uva gal kaga sat diu ahi.' Ajeh chu na mite hon agal manchah cheh akichoiyun, gamsung lo ding khu baikhen chan agel un ahi.
42 Amavang nangho seipeh ding Pakaijin kakoma thu aseiye, ‘Gal nakon loudiu ahi, ajeh chu keiman ka lhonpi pouvin ahi. Nangho cham a na cheuva ahileh, nagal miteuvin nasat gam diu ahi.'
43 Hiche hi keiman ka seipeh nahiuve, hinlah na ngaisah pouvin, avelin Pakai doumah bolin galsat in nakon un ahi.
44 Chuin Amor mite chu khoite jat bangin ahung kon tauvin, Seir le Hormah chan geiyin nahin delkhum tauve.
45 Chuin Pakai henga kappum in nakile uvin, hinlah Aman na taonau asang tapoi.
46 Hiti chun Kadesh mun'a phat sottah nacheng tauvin ahi.