36
Goulo Ding Chanu
1 Chuin Gilead phung ho a lamkai ho—Makir chihlhah ho, Manasseh chapa, Joseph chapa—chule Israel insung lamkai ho chu Mose henga thumna nei dingin ahung uve.
2 Amahon aseiyun, “Pu, Israel mipi ho vang sanna a gam na hoppeh dingin Pakaijin na hilchah in ahi. Ka sopipau Zelophehad in agam achanu te apeh dinga na phatsah peh dingin Pakaijin na seipeh e.
3 Ahinlah amahon phung dang mi akichenpi uleh, akiphal peh gam chu ajinei nau phunga che tha ding ahitai. Hitia hi, keiho goulo ding gamsung hi neojep jep ding ahitai.
4 Chutileh Jubilee ahung lhun tengleh, agambeh chu phung thah a chutoh kigom ding ahitan, kapu kapa teu gam chu a itih a mang den ding ahitai.”
5 Hijeh chun Mose’n Pakaiya kon hiche thupeh hi Israel te apeuvin: “Joseph phung mite thusei hi ahi ding dol ahi.
6 Hiche hi Zelophehad chanu te chung chang a Pakai thupeh ahiye: Pu le pate phunggui sunga ahi pouleh, adei deiyu toh kicheng tauhen.
7 Koima a konna gam hi phungkhat a konna phung dang changson thei louding, ajeh chu ama ama phung kipe cheh gam chu akipeh dungjuiya um den cheh ding ahi.
8 Hijeh a chu Israel chanu te a konna apa goulo chanvou chang hon apa phung sunga konna mi akichenpi ding, hitia chu Israel chate hon apu apa te khang uva pat agoulo chengseu chu amahon achenpi jing diu ahi.
9 Goulo gam hi phungkhat a konna phung dang a kichon thei louhel ding, ajeh chu Israel chaten ama ama chenna gam cheh chu kitup tah a akivet kol cheh ding ahi.”
10 Zelophehad chanu ten Pakai thupeh bang bangin abol uvin ahi.
11 Mahlah, Tirzah, Hoglah, Milcah, chule Noah abonchauvin apa sopi pasal hotoh akicheng tauve.
12 Amaho chu Joseph chapa Manasseh phunga ajinei uvin ahi. Chuti chun, agoulo gam’u abonchan apau phung sungah aum jing tan ahi.
13 Hiche thupeh ho hi Moab phaicham, Jordan vadung pang Jericho a Pakaijin Israel chate chonna dinga Mose ana peh ho chu ahi.