35
Levi Te Khopi Ho
1 Israel te Moab phaicham Jordan vadung pang Jericho mun a abusah laiyun Pakaiyin Mose henga thu aseijin,
2 “Isreal chaten agou uva konna akhopiu phabep leh akimvel'a hamhing kena gam ho Levi te apeh diuvin thu pen.
3 Khopi ho a chu Levi te cheng diu, hamhing kena gambeh chengse chu bong ho, kelcha ho chule agancha dang hou vahna a anei diu ahi.
4 Levi mite gancha ho vahna dinga napeh diu gambeh chu khopi pal apat feet 1,500 kimvel hi ding ahi.
5 Khopi baang apat solam, lhanglam, lhumlam, sahlam a feet 3,000 cheh na tedoh diu alaiya chu khopi um ding ahi. Hiche gamkol chu khopi mite dinga hamhing gam hi ding ahi.”
6 “Khopi gup Levi te napeh diu hichu kiselna khopi hi ding, hiche khopi ho chu mi khat in adang khattou suhkhel jeh a atha khah leh akihuhhingna dia ajamlutna khopi hi ding ahi. Achung chon'a, khopi dang somli le ni jong napeh diu ahi.
7 Aboncha, khopi somli le get toh akimvel a hamhing gam ho Levi te napeh diu ahi.
8 Khopi ho hi Israel chate gamsunga konna hung ding ahi. Phung lenjep hon Levi te dinga khopi ho apeh tamjep diu, phung neojep hon apeh lhom jep diu ahi. Phung jousen ama ama gam neo le let dungjuiya gou apeh diu ahi.”
Bitna Khopi Ho
9 Pakaiyin Mose henga aseijin,
10 “Israel chate jah a anoiya hilchahna ho hi pen.
“Jordan na galkai uva Canaan gam nalut teng uleh,
11 suhkhel jeh a akitha khah uleh ajamlut uva akihuhhingna diuvin bitna khopi ho lhengdoh un.
12 Khopi chengse hi nangho ding’a phulapa akon kiselna leh kihuhhingna mun'a pang ding ahi. Ajeh chu koi hileh mithat penpen chu athu kicheh tah a akikhol doh masangse a kithat louhel ding ahi.
13 Na kihinsona diuvin bitna khopi gup lhengdoh un,
14 thum chu solam Jordan Vadung a chule thum chu lhumlam a Canaan gam hi ding ahi.
15 Hiche khopi ho chu Israel te, nalah uva cheng gamdang mi, chule sumkolvei kholjin miho dinga hoidohna ding ahi. Na lah uva koi hileh mi that a khutsoi aum khah leh abitna dinga jamlut ding ahi.”
16 “Ahinlah koi ham khat in thih a mi avoh a atha khah a ahileh, hichu toltha ahin, chule mithat pa chu athepmona jeh a tha ding ahi.
17 Ahilouleh koi ham khat in akhut a song achoiya midang khat atalih khah a ahileh, hichu toltha ahin, chule mithat pa chu tha ding ahi.
18 Ahilouleh koi ham khat in thingtum mangcha a midang khat asuhlih khah a ahileh, hichu toltha ahin, chule mithat pa chu tha ding ahi.
19 Athipa kinaipi pen pa chu mithat pa thana dinga amopo hi ding ahi. Akimuto teng uleh, aphu la ding pa chun mithat pa chu atha ding ahi.
20 Mi khat touvin mihem khat chu achan lhih a, asotlhuh ham thil khat a ase a chule ama chu athi leh, hichu toltha ahi.
21 Ahilouleh koi ham in mi khat chu avetda a chule akhuttum'a asuh a chule ama pa chu athi khah leh, hichu toltha ahi. Chutobang thu ho a chu, phula pa chun mithat pa chu amu muna a atha ding ahi.”
22 “Ahinlah avetsahnan koi ham khat in kitomona masa jong umlouva mi khat chu asot a, ahilouleh ipi ham khat a tupten hilouva asekhah a ahileh,
23 ahilouleh songtum a midang khat ase khah a, amani chula kidou hilou, chule akisepkha pa chu athi tai.
24 Hitobang chu aso khah leh, mithat pa leh aphula ding pa kikah, athi pa kinaipi pen pa chunga thutanna chu mipin asem uva ajui diu:
25 Mipi chun mithat pa chu phula ding pa a konna aven diu chule mithat pa chu ajamlutna ding khopi a ahin pui diu ahi. Hiche mun a chu thao theng kinu pa, thempulen thi kahsea mithat pa chu um ding ahi. “
26 Ahinlah hiche mithat pa chu bitna khopi akon chun ana chedoh taleh,
27 chule phula ding pa chun mithatpa chu khopi pam a ana that jeng taleh, phula pa chu tolthat a kisim louding ahi.
28 Mithat pa chuthempulen thi kah a bitna khopi a chu um jing ding ahi. Ahinlah thempulen thi jou tengleh, mithat pa chu ama gou umna a kile ding ahitai.
29 Hiche hi hoiya cheng jong leu chun akhang khanga chonna dan a na nei jing diu ahiye.”
30 Mithat jouse chu tha a um ding, hinlah hichu ahetoh mikhat sanga atamjoh le bou hi thei ahi. Mikhat bou hettohna a koima kithat louding ahi.
31 Chujongle, mikhat tha theina dia achunga dihloutah a thutan bolna dia aman nakilah louhel ding ahi; tolthat a chu itih hijongleh tha ding ahi.
32 Akihuhhingna dinga khopia jamlut tolthatpa jal'a longman jeng jong thempulen thi masanga nakilah louhel diu ahiye.
33 Hitia hi na gamsung’u na suhboh thei loudiu, ajeh chu toltha jeh a gamsung bohji ahi. Tolthat chu tha ding tilou gamsung suhthengna dingin thilto bol ding aumpoi.
34 Hijeh chun nachen nau gamsung suboh hih un, hiche gam achun keima ka cheng'e. Keima Pakai kahin, Israel mipi ho lah a ka cheng'e,” ati.