2
Esther Lengnua Akipansah
1 Xerxes lunghan adailhah phat in, Vashti in ipi ana bolla chule aman ama chung chang ipi dan anasem am ti ahin gelpan tan ahi.
2 Hijeh chun lengpa kinaipi, thumop phabep in akom'ah, “Na lenggam sunga nang dingin nungah theng, amel hoitah khat lhengdoh uhite.
3 Na lenggam sunga gamkai sung tinnah khangdong numei mel hoitah ho hinpuija Susa khopi sung lengte numei kholna mun'a hinkhol khom ding nganse phabep kipansah henlang, lengpa inpia nukiso ho lah a lamkai Hegai hin numei kikholna mun'a umho chu amel'u ahoi theina diuva akijen ding dan'u hin vesui dingin kinganse hen.
4 Hiche jouteng chuleh khangdong numei ho lah a lengpa lunglhai sah theipen chu Vashti khel'in lengnu kihisah hen,” atiuve. Hiche thumop hin lengpa alunglhai sah lheh jengin, hijeh chun hiche tohgon chu achelhah sahtai.
5 Hiche laitah chun Susa khopi sunga chun Jair chapa Mordecai kiti Judah mikhat ana um'in ahi. Ama chu Benjamin phung sunga Kish le Shimei chilhah khat anahi.
6 Ama hi Nebuchadnezzar lengpan Judah lengpa Jehoiachin, Jerusalem'a konna Babylon a ahin kailut tha holah a insung mikhat ahi.
7 Hiche mipa hin Hadassah ahilouleh Esther tia jong kihe, apangahpa chanu khat ana vahdoh ahin, amanu hi mi mel-hoitah leh dei umtah nungah ahi. Ama hi anu le apa athi phatna Mordecai hin a insung mikhatna ahin kilahlut a achanu tobang banga ahin kikhoukhah ahi.
8 Lengpa dan thupeh dungjuiya khangdong numei dang tamtah toh Susa khopi sunga leng ina numei kikholna mun'ah ahin puilut un Hegai vetsuina noijah akoi tauvin ahi.
9 Amanu hin Hegai chu alung lhaisah lheh jengin hijeh chun aman jong Esther chu khohsahna neitah in ajen pantan ahi. Aman gangtah in neh le chah atuipen agonpeh in, amel hoina dinga akinu ding jong agonpeh loi jengin ahi. Aman amanu jenle dingin leng inpia kon'in nungah sagi agonpeh in numei kikholna a mun nompen laitah a ajenle nungah hotoh aumsah in ahi.
10 Mordecai in aseipeh dungjuijin amanu hin koi nam mi koi insunga kon ahi koimacha kom’a aseidoh pon ahi.
11 Niseh in, Mordecai chun Esther chunga chu itobang thu sohtam ti ahetnom jeh in numeiho kikholna mun laitah leitol vella chun avah le-le jin ahi.
12 Hiche nungah ho chu lengpa jalkhun'a akipuilut masangin lhasom le ni mel-hoina dinga kijenna phat chu kipea ahi—lhagup sung chu Myrrh thao kinu ding, lhagup ma chu gimnamtui phapen ho akinu diu ahi.
13 Lengpa kom’a ache ding tengleh numei kikholna a konna chu numei kijep pahna thil itobang hijongleh akichoi nom penkhat akichoi ding ahi.
14 Hiche nilhah teng chuleh amanu chu lengpa indan tumbeh khatna kipuilut ding, chujou teng ajing jingkah tengleh lengpa inpi numei kholna ani channa lengpa jite chenna a chu puilut ding ahi. Hichea chu lengpa thaikem ho chingpa Shaashgaz vetsuina noija um diu ahi. Ama chu ijemtia lengpan ngaichatna aneija amin'a ahinkou tilouva lengpa kom’a chu lutkit louhel ding ahi.
15 Esther chu Mordecai pangah Abihail chanu ahi (Mordecai jin apangahpa chanu khangdongcha Esther chu ahin vahdoh ahi). Lengpa kom’a Esther chephat ahung hiphat in, numei kholna a avesuiya pang nukiso Hegai in ahilna chengse chu akimelchih in ahi. Amanun thil dang imacha don louvin amapan aseipeh bou chu akichoijin ahileh amu jousen a-otcha lheh jengun ahi.
16 Esther chu leng Xerxes avaihomna kum sagi channa phalbi hunglhun tilchun lengpa khopia lengpa kom'a chun apuilut un ahi.
17 Lengpan khangdong numei dang ho sangin alungset jon ahi. Lengpan amanu chu adei lheh jengin, hijeh chun lallukhuh chu akhuhpeh in Vashti khel'in lengnun atung tan ahi.
18 Hiche chu alopna in Esther min’in milen milal ho leh vaihom ho chu golvah abolpeh in gamkai ho jousea nikhat choldo nikho alhapeh in kipa thilpeh jong mijouse apen ahi.
19 Khangdong numei ho chu numei kholna ani channa a chu asollut jouvun, chule Mordecai chu khopi sunga vaihom khat in ahungpang tan ahi.
20 Hichan geijin jong Esther chun anam leh a konna insung aphongdoh hih laiye. Aman Mordecai ina aum laija athu angai bangin tunjong athupeh ajui nalaije.
Mordecai In Lengpa Ahuhdoh
21 Nikhat hi Mordecai chu lengpa kotpi kom’a anatohna mun'a ana toupet chun lengpa dinga nukiso, lengpa achom’a agena indan ngah teni Bigthana le Teresh chu lengpa Xerxes chunga alunghang lhon'in thadoh dingin agong lhon tan ahi.
22 Ahinlah Mordecai jin athilgon lhon chu ana jadoh in lengnu Esther kom’a chun thu chu analhut in ahi. Amanun hichu lengpa kom’a aseidoh in Mordecai a konna kihedoh ahi chu ana hetsah e.
23 Hichu kholtohna aneiyun ahile Mordecai thusei chu adih monge ti photchetna aum phat in nukiso teni chu thing chunga akhailih tauvin ahi. Hiche hi Xerxes Lengpa Thusimbu a akijih lut tan ahi.