3
Haman In Judah te Suhmang Dia Agot
1 Phat chomkhat jouvin leng Xerxes in Agag mipa Hammedatha chapa Haman chu atohmun akalsah in amithupi ho lah a achungnung pen’in apansah in, alenggam sunga vaihom ho jouse lah a thanei pen’in apansah tan ahi.
2 Lengpa dinga vaipo ho jousen lengpa thupeh dungjuiya Haman masanga hi dilsu sohkei diu jana apeh cheh diu ahi. Ahinlah Mordecai hi adilsu nompon jana jong ape nompon ahi.
3 Hichejou hin lengpa kelkot kom’a um lengpa khopi vaipo a panghon Mordecai jah a, “Nangin ipi dinga lengpa thupeh nanit louham?” atiuvin ahi.
4 Ama hon niseh in aseipeh jingun ahinlah aman thupeh chu ajui dehpon ahi. Hijeh chun ama hon Mordecai chu Judah te ahi chu ahet utoh kilhon chun Haman chun i-alo am ti in Mordecai um chan chu Haman chu aseipeh un ahi.
5 Haman in Modecai chun a anga abohkhup lou chuleh jana apehlou chu amun alung ahang lheh jeng tan ahi.
6 Aman Mordecai chu koi nam mi ahi ti ahin hetdoh phat in, Mordecai chung seh-seh a thilse bolding chu ahin sit tan ahi. Hijeh chun Xerxes lenggam pumpin Judah te jouse suhmang dingin ahin gong tan ahi.
7 Hiti chun leng Xerxes vaipoh kum somni le kumni channa Lhatun lhasung in athilgon ho tohdohna dinga hi ipi lha pen pha ding ham tichu Haman kom’a vangvetna ana um'in ahi (Hiche vangvetna chu Purim akiti). Anikho kilhengdoh chu Lhakao nisim 7 ni ahin, hiche nikho chu kumkhat jou anahi.
8 Hijou chun Haman in leng Xerxes kom’a chun achen agasei tai, “Na lenggam sunga hin namchom jatkhat aum'in amaho hi gamkai jousea hin akithe thangsoh hellun, chule midanga kon'in atumbeh in aumin ahi. Ama hon midanga toh kibanglou dan chombeh aneiyun, lengpa na dan sem jong hi anit pouvin ahi. Hijeh chun amaho hinghoi ding lengpa dingin thilpha hiponte.
9 Hijeh chun lengpa nalung lhaina ahi ding leh amaho hi suhmangna dingin dan khat semdoh jengin lang hiche hin tongdoh ding ho chu keiman dangka talent 10,000 pe nange, ama hon hiche lengpa sumkholna insunga koi nauvinte,” ati.
10 Lengpan aphatsah in, athulhuhna chu suhdetna in akhut a kon'in akhutjem aladoh in Agag mipa Hammedatha chapa Haman, Judah te gal mipa kom’a chun apetan ahi.
11 Lengpan aseijin, “Hiche sum chuleh mipi ho chu nang khut a aum’e phante nati dan dannin boltan,” ati.
12 Hiti chun Lhatun nidan nisom le nisagi ni hin lengpa lekha sun ho chu akoukhom un chuleh Haman dei dungjuitah chun dan khat jihdoh in aumtai. Hiche chu lengpa vaihom lenpen ho, gamkai a gamvaipo ho, chuleh gamkai jousea milen milal ho, amaho lekha jem leh apao cheh un akijihdoh in ahi. Hiche dan chu leng Xerxes min'in akijih in achunga lengpa mohor chu akinam khum in ahi.
13 Hiche lekha ho chu gangtah a aga hopdoh loi diuvin thupole a pangho chu akisoldoh in, ama hon lenggam sunga gamkai ho jousea aga homdoh un Judah te ho jouse khangdonga patna tehse gei, numei chapang puma nikhat sunga thadoh ding, chuleh suhbeihel ding ahi, akiti. Hiche kin hi kumkit alha Lhakao nisim 7 nia tohdoh tei dinga thupeh ahi. Hitobanga kithat Judah te ho thilkeo chu athat ho chang ding ahiuve.
14 Hiche dan kijihna lekha hi gamkai jousea thotlut soh ding chuleh mijouse lekha phondoh ding hitia chu akitep nikho ahunglhun teng atohdoh jeng theina diuva kigong ahi.
15 Lengpa thupeh a kon'in, dan kisodoh ho chu thupole hon gangtah a ahopdoh diuvin, Susa khopia akiphongdoh tai. Hiche jou chun lengpa le Haman atou lhon'in adonkhom lhontai, ahinla Susa khopia mipite lah achun lungkhamna le boina alhungtai.