4
Mordecai In Esther Panpina Angeh
1 Mordecai jin hitobanga thilsoh hi ahetdoh phat in, apon abot-eh in khaodip pon akiah in vut akinun, chuin khopi achun alhailut in awging tah le lungna tah in apengjah jeng tan ahi.
2 Hiti chun ama leng inpi kelkot geijin ache in ahi, ajeh chu hitobanga lung hesohna von pum in koima leng inpi kelkot a lut theilou ahi.
3 Chuleh hiche lengpa dan aga kiphondohna gamkai jousea chun Judah te ho lah a lunghemna nasatah alhungtai. Ama hon an angol’un, akap un, apeng un, chuleh mi tamtah in vut akinu uvin khaodip pon akisil un ahi.
4 Lengnu Esther jenle nungah ho leh nukiso hon Mordecai umchan chu aseipeh phat un, ama jong alungkham lheh jengtan ahi. Amanun khaodip pon akisil khella akisil dingin pon agah thotnin ahinla Mordecai chu anompon ahi.
5 Hiche jou chun Esther in lengpa dinga nukiso ho lah a ama lhacha dinga kipansah pa Hathach chu akouvin, Mordecai chun ipi hahsatna atoh ham chule ibola lunggim tah a uma ham ti gakholdoh dingin asol tan ahi.
6 Hijeh chun Hathach chu khopi kelkot mai lang leitol a um Mordecai kom’a chun agachen ahi.
7 Mordecai in thusoh ho jouse leh Judah te suhmang’a aumna dinga Haman in sum ijat lengte sumkholna a dinga atodoh got ham tichu hoitah in ana seipeh sohkeijin ahi.
8 Judah te jouse kisuhmangna dinga Susa khopi sunga kisodoh dan lekha pehkhat chu Hathach anapen ahi. Aman hiche lekha chu Esther ana vetsah ding chuleh thil umdan chu hoitah a ahilchet dingin Hathach chu angen sen ahi. Aman Hathach jah a chun Esther chu sol'in lang lengpa kom’a amite dingin taohen ati.
9 Hiti chun Hathach chu Mordecai jin angensena pum chun Esther kom’a chun ahung kile tai.
10 Hiche jou chun Esther in Mordecai kom’a, athu lepoh dingin Hathach chu asolkit in:
11 “Lengpa vaipo ho leh gamkai hoa cheng mipi ho jouse jengin jong, koi hileh lengpan akou hilouva lengpa kom’a lut aum a ahileh lengpan a sana tenggol ahin lhunlut louleh thi tei-tei ding ahi ti hi mijousen ahet khat chu ahi. Tuhin lengpan eikou louna ni somthum alhingtai,” ati.
12 Hathach chun Esther thusei chu Mordecai kom alhut kittai.
13 Mordecai in Esther chu adonbutna alethot in, “Khopi sunga naum man in Judah te jouse akithagam teng kihoidoh nante tin kigel hih in.
14 Hitobang phat a hi thipbeh a naum a ahileh, hoilang ham khatna kon a hi Judah te dinga hoidohna le olna hung sohdoh ding, amavang nang le na insung mite thi ding ahi. Kon ija ahet em hitobang phatna ding jeh a hi lengnu mun nalo hithei tah ahi?”
15 Hiche jou chun Esther in Mordecai chu hiti hin thu athot kit e:
16 “Susa khopia um Judah te jouse gakoukhom inlang kei dingin an-ngollin hung taovun. Nithum sungin anjong nelou twijong don louvin asun ajanin um un. Ka nungah ho leh kenjong hitima a chu kabol diu ahi. Hiche jouteng chuleh dan in aphallou hijongleh, kathi le kathi, kahin le kahin, lengpa kom’a kagalut ding ahi,” atipeh tai.
17 Hiti chun Mordecai apotdoh in Esther in ahin thupeh dungjui chet chun aga boltai.