5
Esther In Lengpa Kom'a Angeh
1 A anngol nithum lhinni chun, Esther chu lengnu von’in akivon’in, indan sungnung’a alut in, lengpa touna laltouna chu angan aga ding tai. Lengpa chu indan sunga alatouna a chun atouvin, kotphung lam chu ana nga in ahi.
2 Aman lengnu Esther chu indan sungnung lang ngatna a adin chu amutan ahi, hichun aman ana sang'in asana tenggol chu agah lhundoh peh in ahi. Hichun Esther in anailut in atenggol chu atham tan ahi.
3 Hijou chun lengpan adong tan, “Lengnu Esther ipi nadei ham? Ipi ham nathum nom chu? Ka lenggam akehkhat jen hijongleh napeng'e!” ati.
4 Esther in adonbut in, “Lengpa nalung ahi ding leh lengpa dinga kagon golvah ankong’a hin Haman toh tuni hin hunglhon lechun kati,” ati tan ahi.
5 Lengpan alhachaho khat akouvin, Esther in agon golvah ankong um dingin Haman gangtah in hung hen tin aga kousah tai. Hiti chun lengpa le Haman chu Esther golvah ankong um dingin ache lhontai.
6 Hitia chu aneh uva adon laitah un, lengpan Esther jah a, “Tun ipi mong ham nadei chu seitan, ipi ham nathum nom chu? Ka lenggam akehkhat hijongleh kapeh ding nahi!” ati.
7 Esther lin adonbut in, “Hiche hi kathum nom leh kangaichat pen chu ahi.
8 Lengpa nalung lhaina kahi khah a chuleh lengpan kathil thum nei sanpeh ding hi nalung lhaina ahi dinga, kathum nei bolpeh dinga ahileh jing teng jongleh ka golvah ankonga Haman toh hungkit lhon inlang hiteng chuleh ipi kadei ham seichen nange,” ati.
Haman In Mordecai Tha Dia Agot
9 Hiche golvah ankong adalhah chun Haman akipah lheh jenge! Ahinla Mordecai chu leng inpi kelkot phung’a ana touva, amasang a ding dohlou chule jana imacha apehlou jeh chun Haman alunghan adeojah tan ahi.
10 Ahivangin ama le ama akitim ham-ham in ain ajon tan ahi.
Hiche jou chun Haman in aloi agol ho leh ajinu Zaresh akou khom in,
11 Cha tamtah aneijeh leh nei le gou ahao jeh in amaho kom’a chun kiletsah tah in thu aseijin ahi. Lengpan vaipo ho jouse le milen milal ho jouse chunga alenpen’a atahsan na le jana apehho jeh chun aham hoitho lheh jengin ahi.
12 Haman in aseijin, “Hiche ho chung chon'ah, Esther lengnu in golvah ankong agonna a lengpa toh ankong umkhom dingin koimacha dang kou louvin keibou eikouvin ahi, chule jing jongleh lengpa toh kei bou eikoukit lhon'in ahi,” ati.
13 Chuin aseibe nalaijin, “Ahijeng vang'in hiche Judah te mipa Mordecai khu khopi kelkotna atou kamulai sen kakipana ho jouse hi amolsoh jitai,” ati.
14 Hijeh chun Haman jinu Zaresh chuleh aloi agol hon aseipeh un, “Thinglhon hem feet somsagi le nga a sangkhat tungdoh inlang jingkah tengleh lengpa kom’a chun Mordecai khetbehna dingin ga ngeh lechun ahi jenge. Hiche chu akichai tengleh lengnu golvah a ding chun lung mongin chethei tan nate,” atiuvin ahi. Hiche chun Haman alunglhai sah lheh jengin thing lhon chu tundoh dingin thu apetai.