6
Lengpan Modecai Ajabol
1 Hiche jan chun lengpa chu a ihmu thei pon , hijeh chun avaihomna sunga thilsoh jihlutna thusimbu chu ahinchoi uva akom’a asimdoh diuvin alhacha ho khat thupeh anei tan ahi.
2 Hiche thilsoh kijihlutna achun lengpa achang’a aumna leng indan’a kot ngah nukiso teni Bigthana le Teresh teni tohgon Mordecai jin ana matdohna kijihlut chu amudoh tan ahi. Amani chun leng Xerxes chu anatha got lhon ahi.
3 “Mordecai hi athilpha bol jeh a kipaman ahilouleh hetpehna ipi kibolpeh am?” tin lengpan adongin ahi.
Alhacha pan adonbut in, “Imacha akibolpeh poi,” ati.
4 “Polang leitol'a um khu koi ham?” tin lengpan adongin ahi. Hiche aseipet tah chun Haman khopi polam leitol ahunglhung chet in, lengpa kom’a Mordecai chu atundohsa thinglhon chung’a khailih ding phalna thum'a ahung pettah chu ahi.
5 Lhachapa chun lengpa chu ana donbut in, “Haman in leitol'ah kimupi dingin na ngah e,” ati. Lengpan “Hin puilut in,” tin thupeh anei tan ahi.
6 Hiti chun Haman ahunglut in ahileh lengpan aseitai, “Keima eikipasah tahbeh mi chu itobang jana kapeh ding ham?” ati.
Haman ama le ama akigelin, “Lengpan jana apeh ding mi chu kei tailou koidang hi ding ham?” tin akinem lheh in ahi.
7 Hijeh chun aman hitin adonbut in, “Lengpan mi khattou jana apeh nom'a ahileh,
8 aleng loupi von chu ahin lahdoh ding, lengpa ama tah touna sakol aluchanga lengte loupina jem kibeh ding ahi.
9 Hiche lengte von loupitah chuleh sakol chu lengpa noija vaihom mithupi ho lah a khatpen khut a pehlut ding ahi. Chuleh lengpan ajabol ding mipa chun lengpa von loupi chu akivon ding lengpa sakol a chu touva khopi sunga chu kaile ding ahi. Hiche vaihompa chun ache pum'a asap ding, 'Lengpan ajabol nompa chu hitia hi kibol ding ahi!' tia asei ding ahi,” ati.
10 Lengpan Haman kom’a chun, “Apha behseh jenge, gangtah in pon loupi chu choijin lang chule kasakol chu kaijin lang tua nasei tobang bang chun hiche khopi kelkot kom’a tou Mordecai kiti Judah pa khu hiti chun gabol tan. Tua nasei ho chu halkhat cha alhinglal umsah hih hellin!” ati.
11 Hiti chun Haman in pon loupi chu achoijin Mordecai asilpeh in, lengpa sakol a chun atousah in, khopi leitol achun akailen, “Lengpan ajabol nom mi chu hitia hi kibol ding ahi,” tin asamin ahi.
12 Hiche jou chun Mordecai chu khopi kelkot a chun akile kit in, Haman vang chu kisuhnemna noinung pen’in akisunemin jumthet in a ina akile kittai.
13 Haman in thilsoh ho chu ajinu le aloi agol ho aseipeh phat in ama thumop a pang miching ho leh ajinu chun aseitai, “Tunia najumso pa Mordecai hi pen danna Judah te ahijeh in ama douna a na tohgon hi lolhing joupon nate. Ama nakidoupi jom leh na thilo ding ahi bouve,” atipeh tauve.
14 Amaho hitia hi akihoupet un lengpa dinga nukiso ho ahung lhungun gangtah in Haman chu Esther golvah ankonga dingin ahung pui tauve.