7
Mordecai Khella Haman Kikhailih
1 Hiti chun lengpa le Haman chu lengnu Esther golvahna ankong a dingin ache lhontai.
2 Anivei channa kin ahin ankong aum uva ju adonpet uhin lengpan lengnu Esther kom'a asei kittai, “Lengnu Esther, ipi nadei ham nei seipeh tan, ipi ham nathum nom chu? Ka lenggam akehkhat hijongleh kapeh ding nahi!” ati.
3 Lengnu Esther in adonbut in, “Lengpa na mikhotona hi kachan a chuleh lengpan kathil thum hi neipeh ding hi nalung lhaina ahileh, kei hinkho leh kamite hinkho hi hoidoh teijin.
4 Ajeh chu kamite le keima hi eithatgo ho kom’a suhmang ding leh thagam dingin eikijohdoh tauve. Keiho hi soh ding mai-maija eikijoh doh uva ahileh thipbeh a kaum diu ahi, ajeh chu hiti them'a chu lengpa kasuhboi nomlou ahi,” ati.
5 “Koipen ham hitobang bol a chu? Nangma tongkha leuva hitobang bol a chu koi ham?” tin Leng Xerxes in adongtai.
6 Esther in adonbut in, “Hiche miphalou pa Haman eidou ule kagal mipau hi hija hime!” Haman chu lengpa le lengnu kom’a chun amai adangleo jeng tan ahi.
7 Hiche jou chun lengpa chu lunghang tah in adingdoh in khopi honlei langa chun apotdoh tan ahi.
Haman vang chu lengnu Esther in ahinkho ahuhdohna dinga tao dingin aum den tan ahi, ajeh chu lengpan ama chu ahinghoi louding akihet ahitai.
8 Alungkham man’in lengnu lupna chunga chun abohkhup jengtan ahileh lengpa khopi honlei langa konna ahung kilekit langtoh akitoh khan ahi.
Lengpan asamjah jengin, “Ama hin kamaikoh tah jenga jong lengnu hi hitia hi adelkhum jeng ding hitam?” ati. Lengpa agah paodoh jou chun alhacha hon Haman chu amanthahna ding vetsahnan amai pon in akhu tauve.
9 Hiche jou chu lengpa dinga nukiso khat Harbona atiu chun ahin seijin, “Haman hin thinglhon amuh hemkhat feet somsagi le nga a sao aleitol a akoije. Hiche chu aman lengpa min athana dinga ana huhdohpa Mordecai chu thana dinga anagon chu ahi,” ati.
“Hichu ahileh hichea chun Haman chu khailih tauvin,” tin lengpan thupeh aneitai.
10 Hiti chun Haman in Mordecai khailihna dinga anasem thinglhon achun ama joh chu akhailih tauve.