8
Judah te Kithopi Dinga Lengpa Thupeh
1 Hicheni ma-ma chun Xerxes lengpan Judah te galmi Haman thil leh lo ho jouse chu lengnu Esther apedoh tai. Hiche jou chun Esther in Mordecai chu insungmi ahi lengpa kom’ah aseidoh tan ahileh Mordecai chu lengpa kom’a ahin puilut tauvin ahi.
2 Lengpan Haman’a konna ana nung lahdoh asoi namna khutjem chu aladoh in Mordecai chu apetai. Hiti chun Esther chun Mordecai chu Haman thil le lo chunga vaihom in ana pansah tan ahi.
3 Hijou chun Esther chu lengpa kom’a ache kit in akeng khopi muh a abohkhup in Agag mi Haman in Judah te douna thil giloutah ana gon chu suhtangna dingin mitlhi pumin ana taovin ahi.
4 Avellin lengpan Esther dingin asana tengol chu ahin lhungdoh in hiti chun ama athoudoh in a angsung’ah adingtai.
5 Esther in ajah a, “Lengpa na lunglhai dinga chuleh khotona kamu thei ding ahija chujongleh nalung lhaina kachan thei dinga ahile Agag mipa Haman thupeh ho hi suhbeina dingin dan khat semdoh le chun kati, ajeh chu aman lengpa gamkai jousea cheng Judah te ho jouse suhgamna dinga thupeh ananei ahi,” ati.
6 Ajeh chu ka mipite le ka insung mite akitha gam'a akisuhmang ding ken iti kathoh ding ham?” ati.
7 Hichun Xerxes lengpan lengnu Esther le Judah mi Mordecai kom’ah, “Keima Haman thilkeo jouse Esther kape tan chuleh aman Judah te suhmang ding agot jeh in thinglhon chunga ama joh akikhailih tan ahi.
8 Tun lengpa min’in Judah te chu nadei dan-dan’in thu thot tan chuleh lengpa khutjem chun mohor namkhum tan. Chule lengpa min'a khatvei mohor kinamsa chu kinung lahdoh kit thei talou ding ahi, ti melchih lhon'in,” atipeh tai.
9 Hiti chun Lhadou nisim 25 ni chun, Mordecai in lengpa lekha jih a pangho chu akikou khomin chuleh Mordecai jin jih in ati dungjui chun ajih tauvin ahi. Hiche chu Judah te ho komlah a vaihom ho jouse kom, gamvaipo ho kom, gamkai 127, India a patna Ehiopia chan geijin milen milal ho jouse kom’ah akithot dohtan ahi. Hiche dan chu lenggam sunga mipite Judah te pao pum'in ama-ama pao le ama lekhajem cheh in akisunin ahi.
10 Hiche dan chu Xerxes lengpa min'a kisun ahin, akhut jem'a mohor kinam khum'ah ahi. Mordecai in hiche thu hi gangtah a homdoh dingin lengpa kin’a kimang sakol lhaihat cheh chu asoldoh in ahi.
11 Hiche leng thupeh hin khopi tinna um Judah te chu kipun khomna kihuhdohna a anei thei diu ahi. Koi nammi hihenlang hoilai gamkai a konna hijongleh aji achateu leh amaho hindel buluho jouse chu athauva, asuhmang diu chuleh asuhgamhel thei diu chuleh agalmi hou thilkeo akichom thei diu ahi.
12 Xerxes lenggam jousea hitobang tohna dinga nikho kilhengdoh chu kumkit Lhakao nisim 7 hi ding ahi.
13 Hiche dan kisodoh hi gamkai jousea mijousen ajui dia phondoh ding, hitia chu Judah ten hiche nikho a hi agalmi hou chunga phu alah theina diu ahi.
14 Hiche leng thupeh chu akinotah ahijeh in, thu homjal leho chun lengpa kin’a manchah dinga kikoi Sakol hatcheh aman uva gangtah a ahopdoh diu ahi. Hiche dan chu Susa khopi sunga jong akiphong doh tan ahi.
15 Hiche jou chun Mordecai chun lengpon loupi adup le akang akisil’in, sana lallukhuh akikhuh in, tupat ponnem le pondup akisil’in lengpa a kon'in ahung potdoh in ahileh khopi sunga mipi chu akipah in othong jejun asam-sam jengun ahi.
16 Judah te chu kipana le thanop nan adimun achena chan uva miho jana achang un ahi.
17 Gamkai tinle khopi tin'a, lengpa dan lhunna chan'ah Judah te akipah un lopna aneiyun anikho nit ding leh mipin golvah neikhom dingin aphongdoh un ahi. Gamsunga mipi lah achun Judah te chu ahung pungjal jengun ahi, ajeh chu Judah te chun eibolse get unte tia akichat u ahitai.