9
Judah te Galjona
1 Hiti chun Lhakao nisim 7 nichun lengpa dan thusoh teni chu ahung chelha paitan ahi. Hiche nikho chun, Judah te kidoupi ho chun amaho chu matchom jeng ding anagot u ahin, ahinla akaleh lang tah in asohtan ahi. Judah te joh chun agalmi hou chu anoinun tauvin ahi.
2 Judah te chu amaho khopi ho leh gamkai ho jousea pumkhat in ading khom un ahin nokhum hou chu asat chap jeng’un ahi. Koima chan amaho chu akimaito ngam tapouvin ahi, ajeh chu mijousen amaho chu aging tauvin ahi.
3 Gamkai a milen milal ho ahin, vaihom lenpenho ahiuvin, gamvaipo ahiuvin, chuleh lengpa vaihom ho ahiuvin, Mordecai akichat jeh un abonun Judah te akithopi gam tauve.
4 Ajeh chu lengpa khopia chun Mordecai chu sangtah a tunlet ahitan, gamkai jousea jong aminthang cheh-cheh jengin chuleh athahat cheh-cheh jeng tan ahi.
5 Hijeh chun Judah te chu anikho kitep nikhon agal miteu chu chemjam in asat chap jengun ahi. Ama hon agal miteu athat un asumang gamji tauvin amaho hin vetdaho jouse chu anop-nop in abol jeng jiuvin ahi.
6 Susa khopi sung seh-seh a jong Judah ten mi 500 athat un ahi.
7 Ama hon Parshandatha, Dalphon leh Aspatha,
8 Poratha, Adalia, Aridatha,
9 Parmashta, Arisai, Aridai le Vaizatha—
10 Judah te galmi, Hammedatha chapa Haman chate som jong chu athatdoh tauvin ahi. Ahinla athil alo hou achom pouve.
11 Hiche nikho tah chun Susa khopia atha jat uchu lengpa kom’a ahetsah tauvin,
12 Hiche jouhin lengpan lengnu Esther akouvin ajah a, “Judah ten hiche Susa khopi seh-seh a jong mi 500 athat un chule Haman chate som jong athat tauve. Ama hon hilaitah a bon chujat atha uleh gamkai dang ho a ijat athat tadiuvem? Tua hi ipi nadeibe nahlai ham? Naki bolpeh ding ahi, seijin ipi thumbe ding nanei nahlai em? Nathum chan chu kibolpeh nalai ding ahi,” ati.
13 Esther in adonbut in, “Lengpa nalung lhaina ahi ding leh Judah te chu Susa khopia tunia abol tobang un jing jongleh bolsah kit inlang chuleh Haman chate 10 chu mol lhon chunga kikhai sanghen,” ati.
14 Hiti chun lengpan anoppeh tan Susa khopi sunga hiche dan chu akiphong doh in chuleh Haman chate thilong um ho chu mol-lhon chunga chun akhaisang tauve.
15 Hichun Susa khopi a Judah te ho chu pumkhat in ading khom’un alha Lhakao nisim 8 nin mi 300 atha be kitnun athil u vang achom pouve.
16 Hiti chun lengpa gamkai jousea Judah te chu amaho kihuhna dingin ading khom un ahi. Avetda uva pang mihem 75,000 athat gam’un, agalmi teuva kon'in a-ongthol tauve. Ahinla ama hon athil le lo imacha akichom pouve.
17 Hiche thilsoh ho chu Lhakao nisim 7 nia thilsoh ahi, ajing nikho nisim 8 nin akicholdo uvin agaljo nau chu kipahtah in golvah abol'un lopna aneiyun ahi.
18 (Susa a Judah te hon agal mite Lhakao nisim 7, chule Lhakao nisim 8 geiya mi athauva chule Lhakao nisim 9 nin akicholdo un kipana golvah anabol'un ahi.)
19 Hijeh chun, tuni chan geijin thinglhanga um Judah te khogamla a umhon hiche nikho leh, phalbi kichai kon lamleh kumlhun golvah abol'un akipah khomun neh le chah thilpeh ho akithotto jiuvin ahi.
Purim Kut Kiman
20 Mordecai in hiche thilsoh ho hi ajihlut in Xerxes gamsung jousea anai ahin agamla a um ahin Judah te hi lekha anathot jin ahi.
21 Hiche ni-ni sung hi kumseh a golvah abolji diuvin ana seipeh tan ahi.
22 Ama hiche nikho sunga hi kipana golvah bolding leh neh le chah kipehto a, gentheite manbeiya peh dingin ana seipeh in ahi. Hiche hin Judah te agalmi teuva konna kipana amunau, alunggim nauva konna thanopna amunau ageldoh jingna diu ahi.
23 Hiti chun Judah ten Mordecai thilgon ho hi anoppeh un, hiche hi kumseh in achepi tauvin ahi.
24 Judah te galmi Agag mi Hammedatha chapa Haman chun Judah tehi suhmang helna dinga nikho khat lhendohna dinga vangvetna ananei ahi. (Hiche avangvetna chu purim akiti).
25 Ahinlah lengnu Esther hi lengpa anga ahunglut phat in, aman dan chomkhat ahin sem’in hichun Haman tohgon phaloutah chu ama chunga achuhlo tan ahi. Haman le achate chu mol lhon hemjet chunga akhailih tauve.
26 Hijeh a chu hiche golnopna hi Purim kiti ahi, ajeh chu hiche hi gollui paova vangvetna kitina ahi.
Amaho tah in ana thoh khah sau ahijeh leh Mordecai in ana jihlut ahijeh in ahin chepi tauvin,
27 gam jousea Judah ten hiche chonna hi chepi dingin anom’un chuleh achilhah te jousen jong ajui diuvin ana kilol’un ahi. Ama hon hiche nikho teni hi kumseh leh akitepna nikho a hi alopna nei jing dingin ana phongdoh un ahi.
28 Hiche nikho ho chu lenggam sunga khopi ho leh gamkai ho jousea insung jousen akhang-akhanga ageldoh jing uva anit jing diu ahi. Hiche Purim golvah ankong hi Judah te lah a itih hijongleh mangthah louva anit jing ding chuleh ipi thil anasoh ham tihi akhang akhanga mansah louhel ding ahi.
29 Abihail chanu lengnu Esther le Judah mi Mordecai in lekha khat anajih lhon'in, masangjep a Mordecai in ana sutsa Purim kiman ding thudol se-se chu, lengnun thaneitah in namdetna anei tan ahi.
30 Hiche lekha chu Judah te jouse anathot un chule Xerxes lenggam a gamkai 127 sungah ana thot sohhel un ahi. Lekhathot a chu Judah te lah a chamna le lungmonna leng hen akitin ahi.
31 Judah mi Mordecai leh lengnu Esther in dan a ana tundoh lhon Purim golvah hi anikho kipeh dungjuiya kumseh a nit dinga ana kiphutdoh ahi. (Mipite hin amaho ding leh achilhah ho diuva anngolna leh lunghemna ana thoh khom bang uva hiche Purim golvah jong hi ana tundoh u ahi).
32 Hitia hi Purim chonna hi Esther thupeh in namdetna anei hetjing dingin lekhajol khat a akijihlut tai.