11
Zophar In Job Adonbutna Masa
1 Hichun Naamath mi Zophar chun Job adonbut in:
2 “Twilon banga long thucheng hi mikhat beh in adonbut louding ham?
Thu tamtah kisei hin mi khat chu nolnabei ahi ti aphotchet ding ham?
3 Nasei sei laija hi kei kamoh umthim jeng ding ham?
Pathen na nuisat teng, mikhat in na jachat sah louding ham?
4 'Katahsan atheng'e,'
chule 'Pathen mitmun keima kangime,' tin naseije.
5 Pathen ama among-mongin seihen;
ama mong-mongin alunggel naseipeh ding hileh!
6 Ama mong-mongin chihna thuguh ho chu naseipeh ding hihen,
ajeh chu chihna dihtah chu thu mai-mai hilou ahi.
Ngaijin! Pathen'in na themmona sanga lhomjoa
nabol genthei joh nahlai ahi bouve!
7 “Pathen chihna thutah a kiselguh chu naholdoh jou ding ham?
Hat chungung ahina ho jouse chu naholdoh jou mong ding hinam?
8 Hiche tobang chihna hetna hi van sanga sangjo ahin—
chule nang koi nahim?
Hiche hi noimigam sanga jong thuhjo ahi—
Nangin ipi nahet em?
9 Hiche hi leiset sangin alenjon
chule twipi sangin alenjoi.
10 Pathen chu hungin mihem khat songkul'a koihen
ahilou le thutanna mun'a kou taleh, ama chu kon apho tang thei ding ham?
11 Ajeh chu aman midihlou ho chu ahet ahin,
chule achonsetna hou aboncha amelchih ji ahi.
12 Mi lhohbei chu hung ching louding
hicheng jouse chunga chu gamlah sangan in anou ahin thei joh ding ahi.
13 “Ijem tia nangma tah in nalung nagel phatna
chule taona a nakhut tenia amalam nasanna ahileh!
14 Pathen'in na chonsetna abon'a na onthol sah a,
chule themmona jouse nanunga na dalhah sah ding ahi.
15 Chutengleh nolna beija namai hung vahdoh ding ahi.
Hung hatdoh in natin chule gin nanei tahlou ding ahi.
16 Nalung gentheina jouse sumil tan natin;
twilong mang tobang bep hi ding ahi.
17 Na hinkho chu sunlai nisa sangin hung vahhoi jonte.
Muthim jeng jong jingkah sangin vah hoi jonte.
18 Kinepna nanei chun hansanna napente.
Na huhdoh a chule lhamong tah a na kicholdo ding ahi.
19 Kichatna nei louvin um in natin,
chule mi tamtah in kithopi nom a navet diu ahi.
20 Ahinla migiloute vang amit u kisucho a,
ama hon jamdohna aneilou diu ahi.
Amaho akinep nau chu thina bou chu hi ding ahitai.”