10
Job In Ahinkho Adeimo Cheh
1 “Keiman ka hinkho hi kahechen tai.
Lhangphong tah in kiphin inge.
Kahin gentheina jeh a hi kiphin ding ahi.
2 Pathen kom'a ima hilouvin nei themmo sah hih in—
kei douna a mona eihin lhut khumpeh ding chu nei seipeh in.
3 Kei nei suhgentheina chu ipi phatchomna naneijem?
Nakhut monga nasemsa kei hi ibola nei paidoh ham?
Migilou thilgon chunga meheuva naumpet nahi?
4 Namit teni hi mihemte mit tobang hija?
Mihem hon amuthei hou bou hi namu thei ham?
5 Na hinkho hi mihem hinkho chanbep bou saova ham?
Na hinkho hi chomlheh jenga ham?
6 Hijeh chun ka themmona ho kintah in nei kholchil peh inlang
chule ka chonsetna na hol-hol jeng ding ham?
7 Themmona bei kahi nahet jeng vang'in
nakhut teni a kon'in koiman eihuhdoh jou ponte.
8 '“Nakhut tenia nei gon a neisem ahijeng vang'in
tun nei sumang hel tai.
9 Leivuija konna neisem ahi nei geldoh inlang—
leivui nei nungso sah loi kit ding ham?
10 Nangin ka thilgon hoa neipui hoijin
chule naobu a neigong in ahi.
11 Katahsa leh kavunin neitomin,
kagu le kachang ho neijop mat peh e.
12 Nangin hinkho neipen chule na ngailutna thonlou neimu sah e.
Na hoidamna noija ka hinkho nei hoitup peh e.
13 '“Ahijeng vang'in na chaloh dan adihtah—
nathilgon dihtah ho—
14 nangin neivet lhih jinga, chule ka chonset a ahileh,
ka chonsetna chu nei ngaidam pon nate.
15 Ka chonset khah a ahileh, keija dinga phamo lheh jeng ahin;
chule nolnabei hijeng jong leng kalu kadomsang theipon,
ajeh chu jachatna leh gentheinan eikidip letset e.
16 Ijem tin kalu domsang taleng, nangin keipi bahkai sadel bangin neidellin natin
kei douna a kichat tijat na umna na thaneina chu nei musah bep ding ahi.
17 Kei douna a na natoh chu avel vellin na hettohsah ji.
Na lunghanna khangtou jing chun ka chunga neisun khumin
chule kei dou dingin sepai hon thah-thah nahin puilut ji e.
18 '“Chuti chu ahileh ipi dinga kanu naobua konna nei lahdoh ham?
Kapenna chu ipi dinga nei thiden sah lou ham?
19 Chutile ahung peng khalouhel kabah a,
naobua konna jangkeija lhankhuh ana che tadinga.
20 Keiman nikho lhomcha bou kanei ahitan, hijeh chun kachangin nei dalha tan,
phat chomcha khat beh nopsahna phat kaneina dingin
21 kile kit lou dinga—ka dalhah a—
khojin le muthim lhangkhal kihehna gam kajot masangin.
22 Jan khangkim lai banga khojin nagam,
muthim leh nohphahna gam,
khovah jeng jong jan khangkim lai khojin toh abahna gam chu.'”