9
Job Thusei Thumna: Bildad Adonbutna
1 Hichun Job in asieikit in:
2 “Henge, keiman alhangpin hiche hi adih e ti kahei.
Ahinlah Pathen mitmua mihem chu khopholou tia kiphong doh thei ding ham?
3 Mikhat touvin Pathen chu kihehpi ding nom taleh,
ama chu khatveija sang khat vei kidonbut jou thei ding hinam?
4 Ijeh inem itile Pathen chu ha chih a chinga, chule thahat tah ahi.
Koipen in ama chu aphin doh a anel jou ding ham?
5 “Aman hetsahna masat beijin molsang ho achon mang jin,
alunghan tengleh aleh khup jin ahi.
6 Aman aumna mun'a kon'in leiset ahot ling jin,
chule abul akithing ji e.
7 Aman thu apeh a ahile, nisa soh tapontin
chule lha jong vah taponte.
8 Vanho jong aman achanga apha jal'a
chule twikhanglen kinong jong gamgi asempeh ji ahi.
9 Aman Ahsi somleng, Bombiel leh juhei suhtum,
vantham jol lhanglang kaija ahsi ho jouse abon'a aman asem ahi.
10 Aman hetphah hoi hilou thil loupi tah-tah ho asem e.
Aman sim senglou thil kidang aboldoh e.
11 Ahivangin, ahung naiji teng, ama kamu theipoi.
Ama ache teng jongleh, ache kamu dehpoi.
12 Mikhat chu ahinna alahpeh a ahileh kon a suhtang thei ding ham?
'Ipi bolla nahim?' tin adong ngam dem?
13 Chutia chu Pathen'in alunghanna chu atuhtang lou ding ahi.
Twikhanglen'a ganhing tamtah ho jong akengto noija achilngim ding ahi.
14 “Hijeh a chu kei koi kahija, Pathen chu donbut dia kagot a
ahilouleh ka kinilpi jeng ding ham?
15 Keima ana dih kha jeng jongleng, kihonna ding kanei louding ahi.
Eihepina dinga bou katao thei ding ahi.
16 Chule keiman ama chu kouving lang chule aman eihou nama jongleh,
aman ka thusei angai ding kaging chapoi.
17 Ajeh chu aman huipi gopi a eino khuma
chule ajeh beija tang louhel'a eisuh nat ding ahi.
18 Aman ei haijom sah thei pontin,
ahinlah gentheina khaveng vungin eisun dim khum'e.
19 Thahat sanna no ding hijeng jongleh, ama chu thahat tah ahi.
Thudih a tan ding kiti jongleh koipen in ama chu thutanna mun'a dinga akou ngam ding ham?
20 Keima hijeng jong leng, keima kamtah in themmo eichansah ding ahi bouve.
Themmona neilou hijongleng chonse a eikisim nalai ding ahi.
21 “Keima nolnabei kahi,
ahinla hichun keija dingin kikhelna eibolpeh deh pon—
kahinna jong kadei tapoi.
22 Nolnabei mi hihen michonse hijongleng, Pathen dingin abonchan akibang cheh e.
Hijeh a chu, 'Aman themmona neilou le michonse ania asuhmang cheh ahi,' kati.
23 Vangset nan ahin lhun khum teng,
nolnabei mi thina chu aman anuisat bep e.
24 Leiset pumpi hi migiloute khut a um ahin,
chule Pathen'in thutanho mit asuh chotji ahi.
Ama bol ahilou le, koibol ba hi ding ham?
25 “Mi lhaihat pa sangin ka hinkho achegang joi.
Kipana mukha louhel'in aleng mang jitai.
26 Pumpenga kisem kong bangin akitol mang jin,
muvanlai aneh ding kimat dinga gangtah a hung lenglha abange.
27 Keiman ka kiphinna ho sumil ingting,
ka lunggimna maiso pailhang ting, thanom tah in um inge tia kaki gelji vang'in,
28 kanat thoh gentheina ho hi nasatah a kichatna leh lunggimna kaneiye,
ajeh chu O Pathen, nolna beija neimu louding kahei.
29 Ipi iti henlang hijongleh themmo changa eikimu ding ahi.
Chutileh ipi phachom dinga ei kibol gim-gim ham?
30 Kei le kei sabon in kisil ngim jeng jong leng
chang-al in kakhut sop theng jong leng,
31 nangin bonlhoh umna kotong sunga nei sonlut in natin,
chule keima vonnen hon jong eideimo diu ahi.
32 “Pathen chu kei banga thibai hilou ahin,
hijeh chun ama toh kakinel theipoi, ahilou jongleh thutanna mun'a kapuilut theipoi.
33 Keini eisucham thei lhon khat anaum hihen lang,
mikhat touvin thakhatna eipui khom thei lhon hen.
34 Misuchampa chun Pathen chun eijep a asuhtang thei hileh,
ama bolgenthei kichatna chu kanei louding ahi.
35 Chutileh kichatna beihel a ama kom'a thu kasei thei ding,
ahinlah keiman keima thahat in hichu kabol theipoi.