8
Bildad In Job Adonbutna Masa
1 Hichun Shuh mi Bildad in Job chu adonbut e:
2 “Hitia hi itih chan naum nah lai ding ham?
Nathusei chu kichat umtah huinung gin abang'e.
3 Pathen'in thutah chu aletun ding ham?
Hatchungnung pa chun adih chu aletun khah em?
4 Nachate chun ama douna a chonset anabol'u hitei ding ahin,
hijeh a chu ahibep seuva ki engbol'u ahi.
5 Ahinlah Pathen kom'a taova
chule Hatchungnung pa lunglhaina naholla ahileh,
6 chule atheng nahija, lung thengsella nahin leh,
aman atahbeh a nakai thouva na inchen kipana a na semphat peh ding ahi.
7 Chule lhomchan kipan jongleh chun,
tamtah a nachai ding ahi.
8 “Khang masalai chu dongin.
Pu le paten ana mudoh sau chu gah ngaiton.
9 Ijeh inem itile eiho janhi bepma peng ihiuvin imacha ihepouve.
Leisetna ihin nikhou jong nilim mangloi tobang bep ahi.
10 Ahin eiho masanga hunghon nahil diu ahi.
Ama hon gollui lai thu nahil diu ahi.
11 “Doplah hilouva pumpeng sangtah a khang theija?
Doplah hampa chu twibeija khang theijem?
12 Sat lhah phat lou laiya apah jing laijun jong,
hampa ho sanga gang jon agoplhaji tauve.
13 Chutobang chu Pathen sumil te chunga jong chu ji ahi.
Pathen neiloute kinepna chu twihu banga mangji ahi.
14 Atahsan nau jong patjanga kikhai ahi.
Amaho chu maimom pan a kingai ahiuve.
15 Ama hon ahoidohna diuvin a inu atuh un ahinlah ading joupoi.
Ama hon hatuh a tuh ding agot vangun adoujou dehpoi.
16 Pathen neilou khu nisa noija khangdoh hampa abah ho,
honsunga jamdoh tobang ahiuve.
17 Song kise thom lah a ajung kholutna;
songho kah a hing ahi.
18 Ahinlah akibodoh tengleh,
anaum khalou bangin te!
19 Hichu ahinkho kichaina ahitan,
chule amun lo khel dingin adang hung kehdoh tante.
20 “Ahin ven Pathen'in milungtheng ho apaidoh louding,
migilou dinga jong akhut alhandoh louding ahi.
21 Aman khatvei kipah tah a na nuisah kitna,
chule nane tenia kipathu nasap doh ding ahi.
22 Nangma vetda ho chun jachatna ponsil'a akisil uva,
chule migiloute chenna in chu kisumang ding ahi.”