13
Job In Pathen Heng'a Achungchang Thu Anilnom
1 “Ven, keiman hiche ho jouse hi kamit tah in kamun
chule kanakol tah in kajan tun keiman kahetai.
2 Ken nathil boldoh jouseu kahenai.
Kei sangin nangho naphajo deh pouve.
3 Hatchungnung pa kom'a keija ding seh-seh a jang keija thu kasei ahi.
Ka chung chang thua keiman Pathen ama tah chu kaki nelpi nom ahi.
4 Nanghon vang, jou le nalin ka hinkho nei suhset peh un,
thempu banga nangho hi panna bei kithemput sah nahiuve.
5 Thipbeh chan umthim thei leu chun!
Hichu nangho dinga na chihna pen'u na bolthei sun'u chu hi ding ahi.
6 Mo kachansah nau hi ngaijuvin;
kanilna hou hi phaten ngaijuvin.
7 “Pathen chu jouva nahonbit diu ham?
Ama jeh a chu lungtheng lou puma nanil diu ham?
8 Na umchan hou chu ama nadei sah nau jeh a langnei nadei uham?
Pathen chung chang thu a nang hon ama dinga nanel peh diu ham?
9 Na thilbol hou ahin mudoh tengu leh ipi iti ding hinam?
Bailam tah a mihem ho na ngolbol bang uva ama chu na ngolbol thei diu ham?
10 Ahipoi, guhthim'a ama langa langneina nanei uva ahileh
ama toh naboi dingu ahi.
11 Aloupina hin na kichat sah louvu ham?
Na kichat nau chun nasun khum louvu ham?
12 Na thil geldoh theikit nau jong vutvai bep bou ahi.
Ami huhdoh nau jong leibel tobanga kehbai bep ahi.
13 “Tun umthim unlang chule ka changseh in nei dalha tauvin.
Thu seijing ting, chule thil hung soh jouse kimaitopi tange.
14 Henge, ken ka hinkho chu kakhut in kilah ing ting
chule ka lunggel mong-mong sei tange.
15 Pathen'in eitha maithei ahin, ahinlah kinepna ding dang kanei poi.
Ken kachung thua ama kakinilpi ding ahi.
16 Ahinla hiche hi eihuhdoh dinga chu ahin—keima Pathen neilou kahipoi.
Achuti loule ama masanga kadin jou louding ahi.
17 “Kasei ding jouse hi nai chan ngai uvin.
Kasei hi ngaijun.
18 Ka chung chang thu kaki gontoh soh in;
nolnabei kahi ti eiki photchen peh ding ahi.
19 Hicheng ho chunga hi kon eikinilpi thei ding ham?
Ka thepmona na photchen thei uva ahileh thipbeh chan um ingting thi tange.
Job In Iti Achonset Adoh
20 “O Pathen, thil ni seh-seh neiphal peh in,
chutile nangma toh kimaito dinga kadin jou thei ding ahi.
21 Ka chunga kon'in nakhut ham tah chu neilah doh peh in,
chule ami umpina kichat umtah chun nei kichat sah tahih in.
22 Tun neihin kouvin keiman na donbut inge,
ahiloule ken thu seijing ting chule nei donbut in.
23 Ipi themmona kanei ham? Neiseipeh in.
Ka chonsetna leh nang kadouna nei vetsah temin.
24 Ipi dinga keija konna naki heimang ham?
Ibola na melma khat banga nei bol ham?
25 Huimut lonle thingna banga nei kichat sah kit ding ham?
Changpol gosa nadel ding ham?
26 “Nangin kei dounan themmona thilse tah-tah najihdoh in,
chule ka khangdon laiya ka chonsetna jouse nahin sulange.
27 Nangin kakeng teni nakoi khom'e.
Ka lamlhah jouse nave lhi jinge.
Ka khonung jouse na holdoh in na melchih jinge.
28 Pannabei thingmotsa tobang,
apin anehchaisa toh kabange.