24
Job In Ibol'a Migiloute Gotna Kipelou Ham Tia Adoh
1 “Ipi dinga Hatchungung pan migiloute khu thutanna a dinga ahin puilou ham?
Ipi dinga Pathen ging ten panna beija ama anga-nga diu ham?
2 Miphalou ten gamgi melchihna achonun gam leiset agu jiuve.
Ama hon gancha akiguh uvin chuleh amaho gamsunga hamhing lah a alha lut uve.
3 Ama hon chaga te sangan akilah un
meithai ho bongchal batman a apeh diuvin angeh jiuve.
4 Mivaicha te chu lampam ah asondoh un;
migiloute chu ahoidohna diuvin akisel khom jiuve.
5 Gamlah a sangan ho gammang lah a aum bangun,
mivaicha ten aphat jouseu neh ding holnan amangun
achateu neh ding nelgam sanna aga hol uve.
6 Amaho a hilou loujau lah a chang a-at jiuvin,
chule migiloute lengpilei lah a akhai achom khom uve.
7 Jan khovah vah in daplah ah akeuvun ponbeijin,
ahilou le kikhukhum ding nei louvin alum jiuve.
8 Amaho chun mol'a konna hung phinlha gotwijin akot soh jiuvin,
chule chenna in ngaichan songpi bel din alhai khom jiuve.
9 “Migilou ten meithai ho chasen chu anu oplhanga kon'in aloilhah peh un,
naosen ho chu thil manna tun din alahpeh jiuve.
10 Mivaicha te chu ponsil beijin akeuvun acheleuvin ahi.
Amaho tah anngol pumin midang ding chang a atkhom peh uve.
11 Ama hon olive thao achil lhauvin ahinlah ate diu jong akiphal peh pouve,
chule dangchah thoh pum-pumin lengpi thei hehna khol ah na atohsah uve.
12 Khopi a kon'in mithi ding kon ho ahung pengdoh uvin,
chule maha pu hon kithopi ngaichan akap uvin,
ahivangin Pathen'in ataonau imachan agelpeh poi.
13 “Migilou te chun khovah adouvui.
Ama hon alampi hetpeh ding anom pouvin
ahilou le alampi a jong aum pouve.
14 Mivaicha ho leh mi genthei ho
that dingin tolthat ho chu jingpi phelvah in athou jiuvin;
jan teng amapa chu guchan apang jin ahi.
15 Numei jonpi pan khomut chip chep angah jin,
hiche phat chuleh 'Koiman eimu taponte,' ati.
Koiman ahetdoh louna dingin amai asel jin ahi.
16 Migucha ho chun jan tengleh mi in asuse jiuvin
chuleh sun leh a ihmu jiuve.
Amaho chu khovah toh kihekha lou ahiuve.
17 Jan muthim chu amaho din jingkah ahi.
Amaho tah hi khojin kichatna toh kijopmat ahiuve.
18 “Ahinlah amaho hi twinoi langa twihu bangin amangji tauve.
Athil nei jouseu hi gaosapna ahin,
chule amaho alengpi lei uva alut diu jong akichauve.
19 Nichangsat leh sat in buhbang twi ajop banga
lhankhuh in jong michonse ho avallhum ahi.
20 Ahingnu tah un jong hin sumil unte.
Than hon amaho chu tuitah in hin neuvinte.
Koima chan amaho chu geldoh tapouvin te.
Migilou te chu huipi gopin thingphung amutlhuh tobang hiuvinte.
21 Kithopi ding chapa neilou meithai ho alhemlha jiuve.
Meithai gentheiho kithopi ding amaho anom pouve.
22 “Pathen, thanei nan, miho chu akaimangji.
Amaho chu kichoisang maithei unte, ahinlah ahinkhou iti ding ham ti hetchetna anei pouve.
23 Amaho hi lungmong tah a ahin diu kiphal peh jeng jongleh,
Pathen'in amaho chu avelhi jing jenge.
24 Chuleh tuhin amaho hi loupi lheh jong leu,
mitphet kah louvin adang ho bangin che mang tauvin tin,
changvui bangin satlhah in um uvinte.
25 Ahilou jongleh khat touvin achu thei ham?
Koipen in kadih louna aphotchet thei ding ham?”