23
Job Thusei Gietna: Eliphaz Adonbutna
1 Hichun Job in aseikit in:
2 “Ka kiphinna tuni chan geijin akhoh cheh-cheh in,
chule pendoh louding hatah in kagoi.
3 Keiman Pathen ama umna bouseh kahol doh thei hileh,
keima athutanna mun'a kache ding ahi.
4 Kachung chang thu hi kaluidoh a
chuleh kaki phin a thu kasei ding ahi.
5 Chutengleh keiman eidonbutna kangaija
chuleh kakom'a ipi asei ham ti kahetdoh ding ahi.
6 Athahatna jousea chu keima einel ding ham?
Ahipoi aman ngainom umtah a eidonbut ding ahi.
7 Milungtheng ho chun ama toh ngaito khom theijun tin,
hijeh a chu keima thutanna'a konna a itih a dinga lhadoh a kaum ding ahitai.
8 Solama kachen, ahin hiche mun a chun ama anaumpoi.
Lhumlam a kachen, ahinlah ama kaga mupoi.
9 Sahlang gam kahol in kaga mu joupoi, ijeh inem itile ama kisel'ah ahi.
Keiman lhanglang gam kaven, ahinlah ama akisel mang'ah ahitai.
10 “Ahin aman hoiya kache ahen ahi.
Chuleh aman ei patep tengleh, sana thengsel banga kahung doh ding ahi.
11 Ijeh inem itile Pathen lampi a um kahin;
kihei mang louhel a alampi chu kajui ahi.
12 Athupeh a kon'in kapotdoh khapon,
ahinlah niseh anneh twidon sangin athusei ho gou khol in kaki khol e.
13 Ahinlah aman khatvei kigel lhahna anei tengleh, koipen in alungthim akhelsah thei ding ham?
Aman abol nom chan chu ipi hijongleh abol jing ding ahi.
14 Hijeh a chu ipi hijongleh kachunga kathilgon jouse chu abolding ahi.
Aman athuneina noija ka lhunna ding akoiye.
15 Datmo louhel in ama aum tengleh kaki cha behseh ji.
Hiche ho kagel tengleh kaki cha behseh ji e.
16 Pathen'in kalung anat sah in;
Hatchungnung pa chun ei tijat sah e.
17 Muthim in ei umkim vellin;
athimdan seijou lou chu muntin'a aum'e.