22
Eliphaz In Thumveina A Job Adonbutna
1 Hichun Teman mi Eliphaz in adonbut in:
2 “Pathen kithopina dinga mikhat in abol thei ding um'em?
Miching khat jeng jong chu Pathen dinga kithopi pha hithei ding ham?
3 Michonpha ana hile chun Hatchungnung pa a dinga phachom na-na hikha dem?
Mipha chamkim hile chun Hatchungnung pa a dinga phachom nahi dem?
4 Pathen thengtah a nahou jeh a ama chun themmo na chansah a
chule nang douna a thutan ahin pohlut ding ham?
5 Ahipoi na gitlouna jeh ahi bouve!
Na chonsetna angahna umlou ahi.
6 “Vetsahnan, na golpa chu sumbat din pen lang
nabat man dingin aponsil ho chu neipen tin.
Henge, agu achang geijin lahpeh jengin.
7 Nangin adangchah ho twi peh ding nom hih inlang
chule agilkel an peh ding nom hih le chun.
8 Nangin gam chu athahatpa a ahi timai theijin natin
ahinlah hiche a chu mikhat bouvin thaneina anei ding ahi!
9 Meithai khat tou chu khutgoh keova nasol mang hikhat inte
chule chaga te kinepna jong nasuhkeh thei ahi.
10 Hiche ho jeh a chu thang’a naki umkimvel ahin
chule hetman louva kichatna jeh a kiti hot-hot nahi.
11 Hiche ho jeh a chu muthim lah a namu theiji lou ahin,
chule twi kinong in achup ji ahi.
12 “Pathen chu alen behseh in—vanho sangin jong alen jon,
ahsite lah a agamla pen sangin jong agamla joi.
13 'Hiche jeh a chu Pathen'in kanatoh ho hi amuthei jilou ahi!
Muthim jing lah a hi iti thu atan ding ham? tin na donbut e.
14 Ajeh chu meibol satah chun ana velkol le-le a hiche jeh a chu aman eimu theilouvu ahi.
Ama chung sangpeh a khun aumin van'a thil kholna mun ho a chu vahle ahi.'
15 “Migiloute lamlhahna lampi lui chu
najot nahlai ding ham?
16 Ahinkho kibul patna twijin alhoh manga,
ahinkhou it um laitah le asalhah pehji ahi.
17 'Hatchungnung pa chun kachung uva ipi abolthei ding ham?
Kachangin nei dalhauvin!' tia Pathen kom'a asei jeh u chun.
18 Henge ama chu a insung uva thilpha tamtah dipset a chu ama ahi,
hijeh a chu keiman hiche tobang lunggel a bolthei ding imacha kaneipoi.
19 “Michonpha ho chun migiloute manthahna chu amu tengu leh kipah unte,
chule nolnabei miho chun isah loutah a anuisat dingu ahi.
20 'Veuvin melmate akisuhmang tai.
Anukhah pen chu meiyin akavam tai,' tin sei uvinte.
21 “Pathen a kipelut in, chutile lungmong a naum ding ahi;
chutengleh nanga dinga ijakai phasohkei ding ahi.
22 Ngaijuvin athuhil hi,
chuleh nalung chang ah khollin.
23 Hatchungnung pa kom'a nakile kitna ahile, nakilepeh kit ding ahi.
Ijeh inem itile na hinkho chu sutheng in.
24 Sum ngailutna napeh doh a ahile
chule na sana man tamtah chu vadunga naselut a ahile,
25 Hatchungnung pa ama tah chu nagou hijeng ding ahi.
Ama tah chu nanga dinga dangka manlutah hi ding ahi.
26 “Chutile Hatchungnung pa kom'a kon'in nomsahna kilah in natin
hiteng chule Pathen chu ven.
27 Ama kom'a taovin natin, chule aman na taona najah peh ding,
chule nangin ama kom'a na kitepna chu namolso ding ahi.
28 Ipi hijongleh bol dinga nagot chan namolso ding,
chuleh namasanga lamlen chu vah in hinsal vah peh tante.
29 Mihemte chun hahsatna ahin nei teng ule, 'Kithopi uvin,' tin seijin natin,
Pathen'in ahuhdoh diu ahi.
30 Michonse ho jeng jong huhdoh in um unte;
nakhut thenna jeh a chu huhdoh a um diu ahi.”