21
Job Thusei Sagina: Zophar Adonbutna
1 Chuphat in Job in asei kit in:
2 “Ka thusei ho hi ipi ham ti naichan hin ngai uvin.
Hichu kilhamonna neipeh thei sun u chu ahi.
3 Neithoh piuvin chule ken thu sei inge.
Keiman thu kasei jou tengleh, nang hon nei nuisat pan kit nauvin nate.
4 “Pathen kom'a kiphin kahin, mihem ho kom'a ahipoi.
Kanga sot joulou nau ajeh hoitah kaneije.
5 Nei veuvin chule thipchet in um un.
Nakhut uvin nakam kisip cheh uvin.
6 Ken ipi kasei ding ham tia kagel teng, kaki thing tun-tun e.
Katahsa akihot-hot e.
7 “Ipi dinga migiloute hi khangtou touva,
ateh gei uva khang uva chule thahat hiuvem?
8 Chule amaho hi achateu khantou leh a inchen u vedinga hing ahiuvin,
chule atuteu chunga akipah uve.
9 A in hou jong kichat tijatna a kon'in a ongdoh un,
chule Pathen'in agimbol poi.
10 Abongchal hou jong nou nei louvin aum pouv.
Abongpi houvin nou aneiyun athollha jong aumpoi.
11 Kelngoite bangin achateu akichop le sah uve.
Achapang hou chu akichom un chule alam-lam uve.
12 Ama hon semjang saigin leh selang dah toh lhon'in la a asauve.
Theile kimut gin in kipa golnop abol uve.
13 Ama hon ahin nikho hou nopsah nan amangun,
chuti chun lungmong tah in lhankhuh ajonji tauve.
14 Ama hon, 'Chemangin nathil imacha kadei pouvin.
Nang le na lamlhah jong kadei pouve.
15 Hatchungnung kitipa chu koi hija, chule ipi dinga athu kangai diu ham?
Katao uva ka diuva ipi thilpha abol ding ham?’ atiuve.
16 (Ama hon ahaosatna jouseu hi amaho thahat a kilamdoh danin agel un,
ahinlah hitobang lunggelna a chu keiman imacha bol ding kanei louding ahi.)
17 “Ahijeng vang'in migilou thaomei jong akimut mit peh khapoi.
Amaho hin hahsatna anei khah uvem?
Pathen'in lunghang tah a lung gentheina hi amaho ana hoppeh khah em?
18 Changpol banga amaho huijin amasang amutmang khah hitam?
Huipi hat in changvai alhohmang banga alhoh mang khah hitam?
A chutipoi!
19 '“Aphai,' 'Pathen'in achateu beh agimbol ding ahi!' tin nasei uve.
Ahinlah chonset bol pen-pen vang chu agimbol ding ahin,
chutile ama thutanna chu ahet thei diu ahi.
20 Amanthah nau ama hon amittah uvin veuhen.
Hatchungnung pa lunghanna thuhtah chu twidon in don uhen.
21 Ijeh inem itile ama athinung tengleh
a inkoteu iti dingu ham ti angaito pouve.
22 “Ahinlah koipen in Pathen chu ahil thei ding ham?
Mi thahat chung thu jeng jong atanji ahi.
23 Mikhat chu haosa tah le lungmong tah in,
boina beihel in athi jin,
24 mi thahat misalhing ho leh
tahsa damthei ho lim chu ahi.
25 Mikhat vaichatna khonteh in athin,
nopsahna hepha louhel ahi.
26 Ahinlah ani lhon a chu leivui lah a kivui cheh ahi lhon'in,
ani lhonna than hon aneh cheh lhon ding ahi.
27 “Ven, nangin ipi nagel kahei.
Nangin kei douna a na thilgon kahen ahi.
28 Achonset jeh uva ain u mang hella
migilou leh mihaosa tah thu neihin seipeh ding ahi.
29 Ahinlah akimvella um ho hi,
dong le chun ama hon adihtah chu na seipeh dingu ahi.
30 Vangset phat laileh amaho chu akihing hoijin
chule manthahna a konna ajamdoh diu jong akiphal peh e.
31 Koimachan amaho hi lhangphong tah in aseise ngam pouvin
ahilou le anatoh athilbol hou jeh in jong lethuhna akipe pouve.
32 Lhankhuh jonna amaho akiput tengu le,
alhan u chu mihon nidan kah khat bep bou anga peh jiuve.
33 Lhanmol achun mithi kivuina kin akimang e.
Atahsa choldo dinga akilupsahna mun a chun mihon ajanau apeuvin,
chule leiset in kicholdona nomtah in apei.
34 “Nang hon kei hi iti dan a thuhom keova nei lhamon diu ham?
Na hilchetna jouseu jong jou ahi!”