20
Zophar In Velnina A Job Adonbutna
1 Hichun Naamath mi Zophar chun adonbut in:
2 “Ka donbut tei ding ahi
ijeh inem itile keima nasatah in eiki sunoh phah e.
3 Nami phosalna hi kahin thoh joulou ahitan,
ahinlah ka lhagaovin donbut nomna eihin neisah ahitai.
4 “Phat kipat tillai,
leiset chunga mihem te ana um masat pen laiju chu geldoh in,
5 migilou te kichoisangna hi phat chomcha bou ahin
chule Pathen neiloute kipana jong chomkhat a ding bou hilou ham?
6 Pathen neiloute kiletsah nan van phahen lang
chuleh alu uvin meibol ga tongkha jongleh,
7 amaho chu tonsot a mangthah ding ahiuvin,
a eh u kipaimang banga amaho jong kipaimang ding ahiuve.
Koi hijongleh ahepha jousen dong uvin tin,
'Hoiya um tauvem?' tiuvinte.
8 Amaho hi janmang bangin mang tauvin tin chule kinung mukit lou diu ahi.
Amaho hi jan a thil kimu aman bangin mangthah tauvinte.
9 Amaho chu amukha sa hon anungmu kit lou diu ahitai.
A inkoten anungmu kit louhel diu ahi.
10 Achate houvin mi vaichate kom'a akhut do uvinte,
ijeh inem itile ama hon aguh u haosatna ho chu anungpeh kit diu ahi.
11 Khangdong hijongleu,
agubuh u leivui lah a kijam ding ahi.
12 “Ama hon agitlou nau chu kipana ana neiju ahin,
alei noi uva hung junlha ding ahi.
13 Ama hon tui asauvin,
akamsung uva sottah akoi uve.
14 Ahinlah hetman louhel in a oisung uva a anneh u chu athuh jitan,
a oisung uva thina thei gu aum jeh chun.
15 Ama hon aval lhum sau anei agou hou chu alodoh uve.
Ahin Pathen'in akoi lhah sah lou diu ahi.
16 Ama hon gulsoh gu hin chop unte.
Gulsen amaho ahintha dingu ahi.
17 Ama hon olive thao twidung banga long
ahilou le khoiju leh bongnoi vadung banga long amukhah kit louhel diu ahi.
18 Ama hon atohman uva amu u thil jouse anungpeh diu ahi.
Anei agou jouseuvin nopsahna hin lhut peh pouvin te.
19 Ijeh inem itile ama hon vaichaho asu genthei un chule lengvai jin adalhauve.
Ama hon asah u hilouhel inho akilah uve.
20 Amaho akilose uvin chuleh lung nachimna anei pouve.
Aval beihella thil jouse nei chamkim ding bou agel gel uve.
21 Imacha khen neilou hel'in amaho changseh in anei jouhel uve.
Hijeh a chu ahaosat nau jong umsot louhel ding ahi.
22 “Neng tah a aumlai tah uvin, hahsat nan ahin lhunkhum un
chule hahsat gentheina achung uva hunglhung ding ahi.
23 Pathen'in amaho chu hahsat gentheina a a oisung dimset uvin peuhen.
Pathen'in alunghanna achung uva hin juhlhah sah hen.
24 Thih hem'a konna jamdoh ding go jongleh,
sum-eng a kisem thalchang in adot pai ding ahi.
25 Thalchang chun atungtun langa konna kibotdoh ding,
chule athalchang muh chu thisan nat dehduh ding ahi.
Thina kichat umtah chu achung uva chu ding ahi.
26 Agou jouse muthim lhangkal kiheh lah a kisep lut ding ahi.
Athil keu jouseu akidalha beihel a,
gamlah meiyin akah gamhel ding ahi.
27 Vanho jousen athemmo nau ahin phon jal ding,
chule leiset in jong ama douna ahin phot chet ding ahi.
28 Ain jouseu twisoh in alhoh mang ding.
Pathen lunghanna chu twi hattah long banga hung longlha ding ahi.
29 Pathen'in migilou apeh ding tohman hiche hi ahi.
Pathen'in achan diuva ateppeh sau chu ahi.”