19
Job Thusei Gupna: Bildad Adonbutna
1 Hiti hin Job in asei kit e:
2 “Itih chan nei suhgenthei nahlai dingu ham?
Itih chan na thusei uva chu suhchip ding neigot nahlai diu ham?
3 Nanghon somvei jen nei jumsou ahitai.
Apha louva neibol uhi na jachatpi louvu ham?
4 Keiman chonsetna nei jeng jong leng,
hichu keija bou ahin nangho a ahipoi.
5 Kei sanga phajon nakigel uvin,
nei suh jachat nau hi ka chonset hettohsahna a man ding natiu ahi.
6 Ahin themmo eichanna chu Pathen ahin,
alen a eimat ahi.
7 'Nei kithopiuvin!' tia ka penjah vang'in, koima chan ei donbut poi.
Kanilkal in, ahinlah thudih a thu kitanna aum dehpoi.
8 Pathen'in kalampi akhotan jeh in kachat theipoi.
Ka lampi muthim lah a eilhunlut peh e.
9 Aman kaloupina eilahmang peh in
chule kalu chunga kon'in kalal lukhuh eilahdoh peh tai.
10 Aman kasih lang jousea eikai lhun, chuleh abeipai kahitai.
Thingphung lhusa bangin ka hinna jung jouse eibodoh peh tai.
11 Alunghanna chu kachunga ahung deujah jengin;
amelma khat bangin eisem e.
12 Asepai honpi amasan ama hon kei buluna ding lampi asem uve.
Ka ponbuh kimvel'a ngahmun asauve.
13 “Kasopi jouse kakom'a kon'in gamla tah a aum uvin,
chule kaloi kagol te jong kei doudin akihei gam tauve.
14 Ka inkote akichai soh tai,
chule kakinaipi kagol ten jong eisumil tauve.
15 Kasohte le kasoh numei ten hetkhah lou mi danin eigel tauve.
Kei hi amaho dinga gamchom mi toh kabang tai.
16 Kasohpa kakou chun, ama ahung tapon;
amapa kom'a katao ding angaije.
17 Kahai jong kajinu dinga theida um ahi.
Kei hi ka inko ten eilemang'u ahitai.
18 Chapang neo cha-cha ho jengin jong ija se louvin eibol uve.
Thusei dinga kadin doh chun, ama hon anunglam eingat uve.
19 Kakinaipi kagol ten eikidah uve.
Kangai tah-tah hon jong eidou tauve.
20 Kavun leh kagu kachang bouseh a eikikoi ahitan
chule kanevun teni khu kaha kaven mai-mai jeh a thina a konna jamdoh kahi.
21 “Nei khotouvin, kagol kapai ho, nei khoto uvin,
ijeh inem itile Pathen khut in eitham khah ahi.
22 Pathen'in eibolna banga, nangin jong nei bolgim ding ham?
Nei lhaingem lou jeh a hi chimlou nahim?
23 “Oh, ka thusei ho hi khumdoh thei hihen.
Oh, hiche ho hi hetjingna thei khat a kiminchon sah hile,
24 thih paicha in kikheng doh henlang chuleh ngentwi kisunkhum leh,
a itih a um jing din songpi chunga kikheng doh hen.
25 “Ahinlah keija dingin vang, eilhandampu ahing'e ti keiman kahen,
akhonna leh leiset chunga hung ding ding ahi.
26 Chule katahsa akemsuh jou nung hijongleh,
hijeng jongleh katahsa tah a Pathen kamu ding ahi!
27 Keima mong-mongin ama chu kamu ding ahi.
Heng'e, kamit tah a kamu ding ahi.
Keima hiche lunggel chun eijouve!
28 “Keima gimbolna dinga ichan geija na hansan a,
'Hiche hi ama thepmo ahi,' nati jiu ham?
29 Nang chunga chu ding gimbolna chu naki chat ding ahin,
na chonna toh kitoh bep a gimbolna nachan kihet in.
Chuteng thutanna hi aum mong'e ti nahet ding ahi.”