18
Bildad In Aniveina A Job Adonbutna
1 Hichun Shuh mi Bildad chun adonbut in:
2 “Na thusei nangah masang a ichan sauva nasei nahlai ding ham?
Ka donbut diu nadeija ahile chihna thu seijin!
3 Nangin keiho gamsa ho sanga phajo mai-maija neigel uham?
Nangin keiho hi mingol a nei ngaito uham?
4 Na lunghan man in nalujang sam chu botchai theijin nate,
ahinlah hichun leiset asuhmang thei ding ham?
Songpi ho akithin sah thei ding ham?
5 Tahbeh in migilou te thaomei kimutmit peh inte.
Ameikong jengu jong vahdoh louding ahi.
6 Aponbuh uva athaomei jengu jong hung thim ding ahi.
Achung lang uva kikhai thaomei jong kimutmit ding ahi.
7 Migilouvin ama kam'a kitahsan tah a akalson nau kisuhchom peh ding ahi.
Amaho thilgon ma-ma a chu kipal lhu diu ahi.
8 Migilou chu lenna a oh inte.
Kokhuh sunga alhalut jiuve.
9 Thang kikam chun akhotaljum u akhit khan ahi.
Thang chun akhit chah kheh e.
10 Khaokol chu tolla akisel den nalaije.
Alampi uva khao akijung galkai peh e.
11 “Migiloute chu kichat tijatnan aum kimvel un
chule akalson jouse asuboiji e.
12 Akelthoh u chun athau asulhom in,
chuleh vangsetna chun amaho kipal lhuh ding chu anga ahi.
13 Natna in ativun u anen;
thinan atibah u aval lhum tai.
14 Ahoidoh nau ain uva konna kibotkhen uva
chule kichat umtah lengpa henga chun akipui lha tauve.
15 Migiloute in chu akah lhah ding ahi;
a inchung uva kath meikong akijuh lhah sah e.
16 Ajungu golha a,
abah u jong goplha ding ahi.
17 Au monge ti kihetna ho jouse leiset a konna mangthah ding ahin;
koima chan amaho min chu ageldoh kit louding ahi.
18 Khovah a konna muthim lah a kiseplut ding ahiuvin,
vannoi leiset a konna kidelmanga ahi tauve.
19 Ama hon chate hihen tute hijongleh anei tahlou dingu ahin,
achennau gamsunga hung cheng ding son leh pah hung beihel ding ahi.
20 Nilhum lam miten avangset diu akichat peh un;
solam'a mite akichauve.
21 Hiche hi migilou in ahin, Pathen neiloute chenna mun ahi,
tin hinsei uvinte.'”