17
Mimol ahina Thu Job In Avenjom
1 “Ka lhagao akisuchip in,
ka hinkho haisam pai ding ahitai.
Lhankhuh jong keima ngah a gotsa uma ahitai.
2 Mi nuisat nom hon eium kimvel uve.
Ichan geija gilouva eiphin lunghang uvem tia kavet vet jeng ahi.
3 “O Pathen, nangin nolnabei kahina nei honbit peh in,
koimacha keima dinga hung dingdoh ding umlouhel ahi.
4 Nangin amaho hi ima ahetkhen thei louna ding uva alung mit u nakha peh ahin,
ahinlah amaho hi lunglhaina pehih in.
5 Amaho phatchomna dingin aloi agol hou chu apedoh jiuvin,
hijeh chun achateu gilkel thoh in kho helouvin umsah in.
6 “Aman mipi ho lah a konna einuisat ding chu asem ahin,
kamaija chil eiset khum uve.
7 Kaka kanan kamit apom doh joutan,
keima hi kana hinasa ale mai-mai bou chu kahi.
8 Michonpha hon eimu tengu leh atija sohji tauve.
Nolnabei miho chu Pathen neilou miho dounan ahung kipatdoh jiuve.
9 Michonpha ho chu malam jonin akitol jing uvin,
chule akhut teni thengsel'a umho chu ahat cheh ahat cheh jiuve.
10 “Nangho nabon chauvin, kinilna a phajep in hung kile kit uvin,
nangho lah a miching khat beh ka mudoh lou vang'in.
11 Keima hin nikho akichai tai.
Ka kinepna amangthah tai.
Kalung ngaichat jouse akeh gamtai.
12 Hiche miho hin jan hi sun ahi tin asei uvin;
ama hon muthim chu khovah ahi tin asei uve.
13 Lhankhuh a chun che ingting
chule muthim lah a chun lupna kisem leng itin tem?
14 Lhankhuh chu kapa nahi tin kou ingting,
chule than chu kanu ahi loule kasopinu tileng itin tem?
15 Ka kinepna hoilamba hitam?
Mikhat touvin amu dem?
16 Ahipoi, kakinepna chu keima toh lhankhuh a kumlha suh khom ding kahi lhone.
Leivui lah a kaki choldo khom ding ahi!”