16
Job Thusei Ngana: Eliphaz Adonbutna
1 Chuin Job apaodoh kit in:
2 “Hicheng ho jouse hi masanga kanajah sa ahitai.
Itobang genthei um milham nahiu hitam!
3 Hui sathethu nung hi na suhtang theilou uham?
Ipi hin tang louhel'a thu nasei sah-sah jengu ham?
4 Kei umna mun'a hi um hileu chun ken jong hitobang hi kasei thei ding ahi.
Ken vang douna thu twilon banga kalon doh sah a chule kalu kathin khum ding nahi.
5 Ahinlah kei chu ana hileng, ka tilkhou ding nahi.
Na lengvaina ho lahmang peh ding kagot ding ahi.
6 Hiche ho khel hin, ka thohgimna in kei le kei kaki vengbit in,
chule thusei ding kada jongleh kathoh natna alhom chom dehpoi.
7 “O Pathen, nangin tollhanga nei koilhan
chule ka chilhah na sugam tai.
8 Kana chonsetna ho photchet peh ding bangin, nangin kavun le kagu keuseh in nei koitai.
Ka tahsa gong lhenglhung hin kei douna aphochen tai.
9 Pathen'in eivet dan chule lunghang tah in eibottel e.
Aha eigel khum khumin
chule amitchang sal tenin eihin vei.
10 Mihon eijapi uvin chule einuisat uve.
Ama hon isahlou tah in ka bengphe eibeh peh ui.
Kei dou dingin mipi ahung kikhom uve.
11 Pathen'in michonse ho khut a eipedoh tai.
Aman migiloute khut a eiseplut tai.
12 “Aman eisat teldeh kahsen thipbeh in kaum e.
Kalol in eiman in ahal-hal'in eisuchip jenge.
Chuti chun abidoi dingin eitung doh in,
13 chule tun athalkap them hon eium kimvel uve.
Athal chang uvin lungsetna beihel in eisun uve.
Tollhanga kathisan avei jenge.
14 Kei dounan avel-vel in eisu teldeh jengin,
gal hatpa mibolna bangin eino khume.
15 Ka genthei vetsahnan khaodip pon kakisil tai.
Kaki letsahna leivui lah a akijam tai.
16 Kaka kanan kamit asan lhatan;
kamit teni athim sohtai.
17 Ahijeng vang'in thil dihlou kabolpon
chule ka taona athenge.
18 “O leiset, ka thisan selmang hihbeh in.
Kei khel'in hung kapdoh uhen.
19 Tu jengin jong eihetdoh sah ding van'a aum'e.
Ka chung thu eiseipeh ding chu chung sanga aum'e.
20 Kagol kapai ten eideimo uvin,
ahinlah ken ka mitlhi Pathen a kasung lhai.
21 Gol le paiho sucham theipa banga,
Pathen le kei kikah eikicham sah thei ding mi khattou kangai chai.
22 Kahung kinung lekit tah louna ding lamlen a chu
chesuh vah ding kahitai.