15
Eliphaz In Avelnina A Job Adonbut
1 Hichun Teman mipa Eliphaz in adonbut in:
2 “Michingin hitobang thuhomkeu chu donbut ponte!
Nang hi imacha hilou nahin chule khohui hungnung bep nahi.
3 Michingin tang louva thuhomkeu sei din akigo jipoi.
Hitobang thu a chu ipi phatchomna um'em?
4 Pathen ginna neilou nahim,
ama dinga jana neilou nahi.
5 Na chonsetna ho chun nakama ipi sei ding ham ti na seipeh unte.
Na thucheng ho hi joulhep themtah chunga kingam ahi.
6 Nangma kam tah chun themmo nachan sah ahin, kei kahipoi.
Namuh ma-ma chun nang douna a thu asei ahi.
7 “Nang hi mihem lah a apeng masapen nahim?
Mol le lhang ho kisem masanga peng nahim?
8 Pathen'in guhthima nahilna ho na ngai hinam?
Chihna chu nangma tum dinga nanei hinam?
9 Keihon kahet louvu ipi nahet em?
Keihon ka hetkhen theilou u nangin nahet khen thei um'em?
10 Keiho langa hin upa tah-tah samkangsa apangun
amaho chu napa sanga hatah a tahjo ahiuve!
11 “Pathen'in na lhamon chu nang dinga neo behseh a ham?
Nem'a athusei chu lhing joulou ham?
12 Naki gellhahna chu ipin na lahmang peh ham?
Na khomu theina chu ipin alhahsam sah ham?
13 Hiti chun Pathen dounan nakihei mangin
chule hitobang thuphalou hi naseije.
14 Thi thei khattou chu theng theijem?
Numeija pengdoh mihem chu adih a um thei ding ham?
15 Ven, Pathen'in vantil ho jeng jong atahsan joupoi.
Ama mitmu in vanho jeng jong athengsel poi.
16 Chonsetna dimho leh lheplhahna dimho leh gitlouna a dangchah ho chu
ichan geijin thenna alhasam tadem!
17 “Ka thusei nangai ding leh keiman navet sah inge.
Ken katahsa tah a kahet ho a kon'in na donbut inge.
18 Apa teuva konna hiche thu ma-ma hi ajah uva
michingho hetsah dungjuiya hiche hi kisudet ahin—
19 gamdang miho hunglhun masang sot laipeh a chu
koiham khat hitobang ho a konna gamkhat ana kipe ahi.
20 “Migiloupa chu ahinkho lhum keijin natgim genthei thoh in akipeh peh e.
Lungsetna neilou ho dingin hahsat gentheina kum jat tamtah kikhol ahi.
21 Ama banga kichat tijatna O aging jinge.
Chule nikho phaho jeng jong misumang hon ahin delkhum diu kichat nan aneiye.
22 Muthim lah a chedoh ding ama hon angapcha pouvin
kichatna jeh a ama hon tol atha dingu ahi.
23 Gamtin'ah avahle leuvin, “Changlhah hoiya kakimu dingham?” tin asei uve.
Ama hon amanthahna diu nikho anaije ti aheuve.
24 Muthim nikhon amaho chu akichat sah uve.
Galkon dinga kigong lengpa bangin lung gentheina leh,
lung natna dimset in ahing uve.
25 Hatchungnung pa akhuttum athinkhum'un,
Pathen achou uvin ahi.
26 Alum'u hattah chu akichoijun,
ama dounan isahlou tah in anokhum jiuve.
27 “Migiloute chu athaovun chule sum le paijin akhangtou cheh-cheh un;
akongu jong athaovin apomdoh sah uve.
28 Ahinlah akhopi hou hi kisumang thah ding ahi.
Amaho chu dalhahsa ingem'a hung cheng uva
sotlhuh ding sa a um cheh ahiuve.
29 Ahaosat nau jong sot tapontin,
anei agou hou sot ponte.
Anei agou hou jong kolmong geijin hung kikho khong soh taponte.
30 “Muthim lah a kon'in jamdoh thei pouvinte.
Ajih hung dondoh ho jong nisan halgop intin,
chule Pathen hu haikhum chun amaho asuhmang ding ahi.
31 Haosatna homkeu tahsanna chun amaho leh amaho kilhem lha sot tapou vintin,
amaho dinga akipaman u chu ahomsa hi ding ahi.
32 Ahinkhou hoilai tah le thingbah kilhamlha bangin kisat lhauvin tin;
abah hou jong avellin hung engdoh kit tapou vinte.
33 Amaho chu lengpi phung aga matah a kilou lha bang le,
olive thingphung aga kisem masanga apah pullha bang diu ahi.
34 Ijeh inem itile Pathen neiloute chu ahomkeu ahiuve.
Nehguh chahguh a haosa ho in chu kavam ding ahi.
35 Ama hon boina naovop bangin avop un chule gitlouna ahing doh jiuve.
Anaobu houvin jou le nal asodoh uve.”