30
Job In Agentheina Thu Asei
1 “Ahinlah tun vang apa teu kelngoi chinga pang ka uicha ho toh
lhaikhom dinga jong lhing joulou mihem,
kasanga dong jo gollhang khangdong ho nuisat bep in kaum doh tai.
2 Amaho khu keija dinga tamtah a pha ahiuvin—
hiche ho chu von sesa lungset um ahiuve.
3 Amaho chu akel thoh jeh uva gong ahiuve.
Chuleh nelphai gam mihem chen louna leh gaso talou leiset muthim gam'a chu jam ah ahiuve.
4 Hiti chun ama hon hamboh lah a kon'in gamlah a na eng ho chu akilo uvin
chuleh muntheh phung jung ho chu akilah un aneji uve.
5 Amaho chu mihem kiloikhomna a konna kidel mangah ahiuvin,
chuleh gucha ahijeh uvin mihem ten amaho chu asamse jiuvin ahi.
6 Hiti chun kokhuh thuh tah-tah lah a timul thou pumin,
songpi ho lah a songko ho achun acheng uve.
7 Amaho chu hamboh lah a sa loupitah a aum bangun a ao chehchuh jiuvin,
thahpi ho noija chun alhaikhom jiuve.
8 Amaho chu kiloikhomna a kon kipaidoh,
mingol minbei ho ahiuve.
9 “Chuleh tun ama hon pao ngailou louvin isah loutah in einuisat jiuvin
eiphin phin jiuve!
10 Ama hon iman eisep pouvin kakom'ah ahung pouve,
kamaija chil set khumpeh ding tailouvin.
11 Ijeh inem itile Pathen'in kathal khao eisattan peh tai.
Aman eisuhnem ahin,
hijeh a chu thuneina umnaho jouse chu apaimang u ahi.
12 Hiche akideldoh ho chun ka maichang tah a eidoudal uve,
Kilhon nampet dingin eisol un
chuleh kalampi ah thang eikampeh uve.
13 Ama hon kalamlhah jouse eikha peh un
chule keiman eisuhmang nathei diuvin abolthei jouseu abol'un ahi.
Eikithopi ding koimacha kaneilou ahet jeh uvin.
14 Amaho muntin'a kon'in kakom'ah ahung uve.
Keima ka lhahsuh pet in amaho ka chungah akichom uve.
15 Tun vang kicha tah in kahing'e.
Eikijabolna jouse huilah a akithe mangin,
kanei leh kagou jouse meilhang kitolmang bangin amangthah soh tai.
16 “Chuleh tuhin ka hinkho along mang ahitai.
Ka nikho ho jong genthei hesoh nan eihen den tai.
17 Jan teng kagu kachang ho natnan alodim jin,
hichun tang louhel in eichip-eichip ji e.
18 Khut hattah in, Pathen'in ka sangkhol eilahpeh e.
Ka sangkhol ngong ah eimanchah kheh in ahi.
19 Aman bonlhoh lah a eisep lut e.
Keima hi leivui leh vutvam sanga jong panna beijo kahi.
20 “Na henga hung tao kahi, O Pathen, ahinlah nangin nei donbut poi.
Na masang a ding kahin, ahin nangin vet dingin jong neigo poi.
21 Keija dinga lungsetna beihel nahung hitai.
Na thahatna chu kei engbol nan namang'e.
22 Nangin chimpei lah a neisep lut in
chuleh huipi kinong in nei sumang'e.
23 Chuleh nangin kathina ding mun'a chu neisol ahi ti kahei—
mihing jouse lhunna ding mun chu.
24 “Tahbeh mongin genthei hahsatna a kithopi ngaicha ahung tao tengule
koimacha hiche genthei thoh ho lang ngan kihei pouvinte.
25 Hahsatna toh ho dinga kapji kahi lou ham?
Vaicha genthei te dinga nasatah a ka gentheipi ji hilou ham?
26 Hijeh chun thilpha kavejin, ahinlah thil phalou joh chu ahung jin ahi.
Keiman vah chu kangah in, ahin muthim ahung lhung'e.
27 Ka lungthim agentheijin chuleh cholngahna kanei theipoi.
Ka gentheina nikho te hin eisu genthei lheh e.
28 Nisavah umlouna, muthim lah a kavah lei.
Mipi kigoltoh chet lah a ka dingin kithopi ngaichan kakap e.
29 Hiche ho khel'in, keima gam-ui sopipa
simbupi toh kikop pa'n eiki ngaiton ahi.
30 Kavun ho aduplha soh tan,
chule kagu kachang ho jouse khosih in kati apeh henhun e.
31 Ka selangdah gin in jong lungkham la ahin sa in,
katheile gin jong kana ogin in aginge.