31
Lunglha Louva Aum Job In Aseidoh
1 “Keiman kamit teni toh kigahna kasemin
khangdong numei chu jon lunga velou dingin.
2 Ijeh inem itile chunga Pathen chun eiho ipi dinga eilhen u ham?
Chung sanga um hatchungnung pa a konna goulo ding chu ipi ham?
3 Migilou te dinga vangsetna hilou hija
chule thil phalou bolte dinga vangset umtah dinmun chu hilou ham?
4 Pathen'in kabol katoh jouse amulou hija
chuleh kakalse jat jong ahet hilou ham?
5 “Mikhat tou kom'a jou kasei khah a
ahilouleh mikhat tou kalhep khah em?
6 Thudih kitena chun Pathen'in eitetoh hen,
ijeh inem itile aman kalung thenna hi ahet ahi.
7 Alamlhah a konna ka vamang'e,
ahilouleh ijem tia kamuji ho a kalungthim jon lung ngaichatna kanei khah a,
ahilou le chonsetna dang khat a themmona kanei khah a ahile,
8 hiti chun mikhat touvin chang le mim kaphu na ana nejeng hen.
Ka phudoh chengse abonchan kibotdoh soh jeng hen.
9 “Ijem tia ka lungthim in numei khat tou alheplhah a,
ahilou le ka inheng pa jinu jon lunga kavet khah a ahile,
10 chuti chun kajinu jong pasal dang ji hijeng hen;
pasal dang khat in luppi jeng hen.
11 Ijeh inem itile jon lungput hi jachat umtah chonset ahin,
hiche dandih louva chon ho chu gimbol ding ahi.
12 Hichu damun lampi lhung keija meiyin akah tobang ahi.
Kanei jouse kamanghel ding ahi.
13 “Ijemtia kasohpa ham kasoh numei adih louva kabol'a ahileh
ama hon akiphin nau kakom'a ahin lhut tengu leh,
14 Pathen chu iti ka kimaitopi ding hitam?
Aman thu eihin doh teng ipi kasei tadem?
15 Ajeh chu Pathen'in kei leh kasoh te eisem kop u ahi.
Aman naobu sunga eisem cheh u ahi.
16 “Vaichate panpi ding kada khah em,
ahilou le meithai ho kinepna ka suhkeh peh khah em?
17 Ka anneh chunga kachip khah em,
chaga pabei te toh nehkhom ding kada khah em?
18 Ahipoi, mipa bangin kaneo laiya pat in chaga te kahin hoitup in,
chule ka hinkho lhumin meithaite hoitup nan kahin mange.
19 Itih lai hijongleh chenna ding neilou ponbeija umho
chule von ding neilou gentheiho kamu tengleh,
20 akisillum diuva samul pon kapehji jeh a
eipachat jiu hilou ham?
21 “Thutanpa kalanga apanna dinga,
chaga khat douna a kakhut kadop khah a ahile,
22 hiti chun ka lengkou aumna a kon'in kisatlha jeng hen!
Ka banjang jong akisuhtona a kon'in kisatlha jeng hen!
23 Hichu Pathen thutanna kimaitopi sangin phajonte.
Ijemtia loupi Pathen chun einan chahkheh a ahile, kinepna ipi kanei ding ham?
24 “Keiman ka tahsanna sum'a kakoi khah a
ahilou le ka sana a hi kakison khah em?
25 Kanei kagou jouse leh
kakhol khom jouse jeh a kakipa khah em?
26 “Vanthamjol a vah nisa khu kavet em,
ahiloule alampia chesuh lha kavet em,
27 chuleh aguh a kalungthim kalheplhah a
amaho houna a kaga galchop khah em?
28 Achuti tah a ahile, thutan vaihom hon eigim bol uhen,
chuti chu ahitah leh van Pathen thusei kangaipeh lou hinte.
29 “Ka melma te chu manthah nan ahin phah tenga kakipa khah em,
ahilouleh alampiuva hahsatna ahung tengleh ka thanop em?
30 Ahipoi, keiman mikhat tou samsea chonset hihen
ahilouleh phulah dingin kasei khapoi.
31 “Kasoh pan jong, 'Adang ho chu gilkel in kachesah tai,'
tin asei khapoi.
32 Hetkhah lou mi jong kakihei mangsan khapon
ahinlah mijouse din kot ka honpehji bouve.
33 “Midang ho banga ken ka chonsetna selmang ding kagot a,
kasuhkhel kalungthima ka imden khah ham?
34 Mipiho kakichat khah a
ahilouleh kikhop khomna ho kadeimo khah a,
hiche ho jeh a chu thipbeh a insunga kaum den khah ham?
35 “Mikhat tou beh in ka thusei eingai peh hen!
Ven, ka kihonna dinga kasoi kakai ding ahi.
Hatchungnungpa chun eidonbut hen.
Eiheh pan kei douna thu sundoh hen.
36 Keiman eithemmo nau chu kiloupisah tah a ka kimaitopi ding ahi.
Lallukhuh banga ka kikhuh ding ahi.
37 Ijeh inem itile keiman ka thilbol adihtah chu ka seipeh ding ahi.
Ama masanga chu leng chapa te banga kahung ding ahi.
38 “Kagam in themmo eichansah khah a
tucha maha jouse kitoh tah a ahung ka sohkei uva,
39 ahilouva achang leh amim kana guh khah a
ahilouleh anei ho kana tha khah tah a ahile,
40 chuti chun gehu khel'in ling leh khau agama chun keh henlang,
chang khel'in hampa keh hen.”
Job thusei ho akichaitai.