32
Elihu In Job Golte Adonbutna
1 Job in nolnabei kahi tia apanchah kheh phat in aloi agolte thumho chun donbut be ding anom tapouve.
2 Hichun Ram phunga, Buz mi Barakel chapa Elihu, chu ahung lunghang tai. Job in chonset kana bol nai chuleh Pathen'in eigim bolna hi adih e ti ding anop lou jeh a lunghang'ah ahi.
3 Job in anil nau adonbut thei uva Pathen joh chu dihmo dinga akilah jeh uva Job loi le golte thum chunga jong kinga ahi.
4 Elihu'n adang ho Job kom'a thu asei diu chu anga-nga jeng ahi. Ijeh inem itile amaho chu ama sanga upajo ahiuve.
5 Ahinlah ama hon adonbut be tahlou u amu phat in lunghang tah in ahung paodoh e.
6 Buz mi Barakel chapa Elihun aseijin.
Keima khangdong kahin nangho upa nahiuve,
hijeh a chu nangho kom'a kalunggel kasei ding chu ka khongai ahi.
7 Kei gel'in, 'Ateh jep hon thu seiju hen,
ijeh inem itile upaho a hi chihna hung ahi,' kati ahi.
8 Ahin mihem te sunga chu lhagao um ahin,
Hatchungnungpa hu haikhuma amaho sunga um ahin,
hiche chun achihsah u ahi.
9 Phat khat tengleh upaho jong achingji pouve.
Khatvei vei teng thutan dihje ahe pouve.
10 Hijeh chun kasei ngaijun,
chuleh kalunggel seipeh uving'e.
11 “Keiman nang thusei phat hitih chan sung hin kahin ngah in,
na kinilna hou lunglut tah in kahin ngaijin,
khomu louva nathusei doh hou kangaije.
12 Na thusei hou kangaije,
ahin khat chan jong nanil thei pouvin
ahiloule aminilna nadonbut thei pouve.
13 Amapa hi eiho dingin aching beh seh e,
Pathen bouvin ama athunun jou ding ahi,' tin kakom'a sei hih un.
14 Job chun keima einil hihen hileh,
nang hon na manchah u hettheina bangin donbut ponge!
15 Seibe ding helouva,
lunggim'a tou nahiuve.
16 Tua nangho thipbeh a naum bang uva hi ken kanga nga nahlai dingu ham?
Keijong thipbeh a kaum jing ding ham?
17 Ahipoi, halkhat beh kasei ding ahi.
Ka lunggel kasei ding ahi.
18 Ijeh inem itile kalung in adol joulou thucheng tampi ho seidoh hi,
kasunga ka lhagaovin seidoh dingin eino tun-tun e.
19 Keima ahom umlou jubom tobang kahin,
jupohna thah pohkeh ding sa tobang kahi.
20 Kalung ol theina dinga kasei ding ahin,
hijeh chun ka donbutna penge.
21 Kadei tah in jong kichem ponge
ahilouleh koimacha pachat lhem bol ponge.
22 Keiman joulhep ding kagot a ahile,
eisempan gangtah in eisumang jeng hen.