33
Elihu In Job Douna A Achungchang Thu Asei
1 “Job, ka thusei ho hi ngaijin,
ka thusei ding ho hi lunglut in ngaijin.
2 Tun ka thusei hiti hin pan kit ing ting,
banjom tange.
3 Kasei jouse hi lung thengsel'a kasei ahin,
thutah kasei ahi.
4 Ijeh inem itile Pathen lhagaovin eina sem ahin,
chuleh Hatchungnung pa hu haikhumin kahinna hi eipeh ahi.
5 Na kingapchat leh nei donbut in; na chungchang thu kisemtoh in chuleh na dinna mun ah dingin.
6 Ven, nang leh kei inia Pathen a ihi cheh e.
Keijong leingan a ana kisem ah kahi.
7 Hijeh a chu kei nei kichatna ding aumpoi.
Huham tah a kahung kumsuh louding ahi.
8 “Nangin kajah ding thu naseisa ahitan,
chule na thusei ho achang cheh a kajah ahi.
9 'Nangin keima kathengin, kei chonsetna bei kahi;
kei nolnabei themmona kaneipoi; tin naseije.
10 Pathen'in eikinah pin,
chuleh amelma in eingaito e.
11 Kakeng teni khaokol sung ei chotlut sah in
chuleh kakholhahna jouse amelchih e.'
12 “Ahinlah nang nadih poi, chuleh ipi jeh ham ti navet sah inge.
Ijeh inem itile miching ho sanga loupi jo ahi.
13 Ijeh inem itile ipi dinga nadouna a na nokhum ham?
Ipi dinga aman mihem te kiphinna adonbut poi nati ham?
14 Ijeh inem itile mihem ten ahet theilou vanga
Pathen'in avel vel'a asei ahitai.
15 Janmanga ahim, muneina ahim, a mihemte ha imut a aimut pet u,
ajalkhun chunga alup pet uva
aman aseipeh u ahi.
16 Aman anabeng tenia ol chakhat in aseijin
chule kichat tijatna a agihji ahi.
17 Athilse bolnau va konna akinungle sah ji a;
akiletsah nau alahmangji ahi.
18 Lhankhuh a konna ahuhdoh a,
thina lui agalkai diuva jong ahuhdoh jiu ahi.
19 “Ahiloule Pathen'in mihem tehi dammona jalkhun chunga nat le sat toh,
tang louhel a agu achangin achi a hitia hi asuhdih ji ahi.
20 Chutengleh ama hon anneh tui pen-pen
jong aduchatna mangji ahitai.
21 Amaho tahsa agongsuh tauvin,
chule agu achangu akilangdoh sohtai.
22 Amaho chu thina kotkhah gei ahitauvin;
thina vantil chun amaho ana nga jiu ahitai.
23 “Ahinlah vantil khat van'a kon'in hung kilang hen—
thupole chombeh khat chun mikhat dingin tao peh hen,
chuleh amapa hi lungthengsel ahina phongdoh henlang—
24 amapa chu milungset them hihen lang,
'Lhankhuh a kon'in huhdoh tauvin,
ijeh inem itile keiman ahinkhou kilhatdohna man ding chu kamutai,' tin seihen.
25 Chutileh atahsa chu chapang tahsa damthei,
leh khangdon lai phat bangin hung damthei kit inte.
26 Pathen kom'a atao tengleh,
ama chu kisan peh ding ahi.
Chule Pathen'in kipah in sang intin
chule adinmun hoitah in koi kit inte.
27 Amapan aloi agolte kom'a phongdoh intin,
'Keima kachonse tai chule thutah adihlou lamin kaheijin,
ahinlah hichu phatchomna bei ahi,' tinte.
28 Pathen'in lhankhuh a kon'in eihuhdoh in,
chule tun kahinkho hi avahdoh tai.
29 “Henge, Pathen'in hitobang thil ho hi
avel vella mihemte dinga abolji ahi.
30 Aman amaho chu lhankhuh a kon'in ahuhdoh in
hijeh chun amaho chu hinna khovah a chun kipah tauvinte.
31 Job, hiche hi phate chan melchih in. Ka thusei hi ngaijin,
ijeh inem itile keiman seibe ding kaneiye.
32 Ahinlah seibe ding nanei nahlaija ahile, seiben.
Seijin, ijeh inem itile keiman nathem channa chu mukal ngahlel a um kahi.
33 Chuti chu ahilouva ahile, ka thusei ngaijin.
Thipbeh chan um jingin chule keiman chihna thu nahil inge!”