38
Pakaijin Job Achouna
1 Chuti chun chimpei kipei lah a kon'in Pakaijin Job chu ahin donbut tai:
2 “Koi hiya hitobang hetna neilou chu chenga
ka chihna thu hin donga chu?
3 Pasal pha bangin nakong kigah in,
ijeh inem itile keiman nangma thu kadoh ding,
nangin hiche ho chu nei donbut ding ahi.
4 “Leiset bul kaphu a chu hoiya na-na um'em?
Nahet leh, nei seipeh in.
5 Kon alet aneo dan aga te a
chuleh ageigol ho hi akaitoh ham?
6 Abul hi ipin atheh ham,
Aninga songpi chu koi koi ham
7 jingvalpa ten la asahkhom uva
chuleh vantil jouse kipah a hung pengdoh diu ham?
8 Naobu sunga hung pengdoh banga
twipi hi gamgi chin kah khat sunga kon akoija,
9 chuleh meibol ponsil'a kakisil a
chuleh muthim lhangkhal a kakitom ham?
10 Ajeh chu vapam kasem peh a,
anunga kotpi akhel louna dinga kakam khum ahi.
11 'Hichan a gamla chule hisanga gamlajo a nahung louna ding ahi.
Hiche mun a hi kiloupi sah tah a nakinon nangah ding ahi!' tin kaseije.
12 “Jingkah khovahna dinga thu napeh khah a
khovah jong solam'a konna hung kipan dinga nahil khah em?
13 Khovah hin leiset kolmang geija asalvahna dinga nasem'a,
gitlouna jan muthim chan gei bou vah dinga nasem khah em?
14 Khovah ahung nai tengleh,
leingan chunga mahor kinam bangin
leiset jong agong ahung kilangdoh jitai.
15 Khovah hin migiloute asunoh phah in
chuleh kihatsah tah a kidom sang banlhang jong asuhai tai.
16 Twipi hung londoh patna twinah phung naga holdoh khah a ham?
Athuh dan nakhol doh khah hitam?
17 Thina kelkot hoiya um'em ti nahet khah tah em?
Muthim lhangkhal kihehna kelkot namu khah tah em?
18 Leiset letdan na geldoh khah em?
Nahet leh nei seipeh in!
19 “Khovah hoiya konna hung kipan doh ham,
chuleh muthim hoilanga cheji hitam?
20 Khat cheng chenga a in'a napuilut theijem?
Chuleh amun lhunje chu nahet em?
21 Ahinlah hicheng chu nahet maithei ahi!
Ijeh inem itile thil ijakai kisem masanga penga nahi tan,
hijeh a chu ijakai nahet themsoh ahitai.
22 “Buhbang kikhol khomna mun naga chelut khah tah em
ahilou le gelchang kikhol khomna mun naga mu khah tah em?
23 Genthei hesoh nikho a gal manchah dinga kakhol ahin,
kidou nikho leh kisat nikho a dinga kakhol khom ahi.
24 Khovah hung kondohna lampi chu hoilai hija?
Solam hui chenna chu hoilai ham?
25 “Go hattah a hung long jung-jung twilam chu kon asem ham?
Kolphe vahna lampi kon adopeh ham?
26 Hampa kelouna gamgo lah leh nelgam mihem chenlouna gam'a chu,
kon go ajuhsah ham?
27 Tolgo lah sunouva dangchim sah dinga go juhsah chu koi hija
chule hampa louhing kedohsah a koiham?
28 “Go in pa aneijem?
Daitwi kon ahin pendoh sah ham?
29 Buhbang lhang hingnu chu koiham?
Van'a hung kon buhbang twi hi kon ahin ham?
30 Ijeh inem itile twi chu song banga tah akisoh jin,
chuleh twi chung chu akanden jin ahi.
31 “Ahsi ho kitol ding dan khu nahil theija—
bombiel akoi ho khu alom'a nakan theija,
ahilou le juhei suhtum khu akhao nalhap kang thei ngeijem?
32 Kum kiheichin ho hi aban-ban cha che dinga nahil theija
ahilou le ahsi somleng chu anoute toh van jotpai dinga napuile theijem?
33 Thilsem jouse chondan hi nahet sohkei em?
Leiset hi dan dungjuiya na manchah thei ding ham?
34 “Meibang lom chu nakouva
chule go nasosah theijem?
35 Kolphe chu nakilah sah theija
chule na seina mun chu navah sah thei ding ham?
36 Lungchang thil het jeng theina pea chu koi hija
chule lungthim angaina a khohetna pe a chu koi ham?
37 Meilhang ho sim jouna dinga chihna lhingsetna nei koi hija,
van'a twi kikholna mun loukhoija khoileh jou ding koi ham?
38 Tolla leiset hi akikoi gotset a
chule leiset chu leilhanga atahsah thei ding ham?
39 “Keipi dinga neh ding namat khom peh a
chule keipi bahkai noute gilkel chu alung nachim a navahva jouva
40 akosung uva alupna uva
ahilou le nang noija abohmat pet teng ule?
41 Vavomte khu kon an apeh a
anoute khu Pathen jah dinga apen a
chule gilkel'a amoh toilele tengu leh kon an apeh jiu ham?